Am Rhii isch der Titel von ere Samlig mit Tegscht i verschidene alemannische Mundarte.
Es isch es drübändigs Wärch, wo 1996 z Roosche, z Doarabira und z Vaduz usecho isch. D Redaktoore sind dr Liechtaschteiner Sproochwüsseschaftler Roman Banzer, dr Otmar Gassner vo Fealdkirch, dr Felix Marxer vo Vaduz, dr Rainer Stöckli vo Rüüti und dr Adolf Vallaster vo Mäder gsi, wo für d Rhiitaalisch Gränzgmeinschaft die Stück zämetreit und zum Truk vorbereitet hend. Si schrybe i de usfüerleche Kommentäär drvo, was d Mundartliteratur für en Bluescht in irere Regioon het, si prichte über d Chraft und die farbegi Bildersprooch vo de Mundartwärch, wo ire Platz i der Literatur verdiene, über d Situazioon vo de Mundartschriftsteller und au was me für Tieläkt im Rhyydaal und drum umme redt und schrypt.
I dere Blüetelääsi sind Gedicht und Prosategscht vo Autoore usem Vorarlbärg, vo Liechtaschtei und vo de Oschtschwiizer Gägende em Rhii noo verträtte. Me findt Arbete vo Schriftsteller us es baar Generazioone, fascht us em ganze 20. Joorhundert. Und für das Projäkt sind bsunders au jungi Lüüt yglade worde zum Sache in en Deil vo der Antology z schrybe.
Im erschte Band sind 24 Autoore verträtte, wo ane 1966 nümme gläbt hend. Die eltischte zää sind no im 19. Joorhundert uf d Wält cho. Im zwöite sind’s 52 Autoore, wo ane 1996 no läbig gsi sind, und im dritte Band het’s Stückli vo drissg dozmol no ganz junge Lüüt im Alter zwüsche sibezää und einezwänzg Joor.
Am Schluss bringt die Samlig au no e zimli grossi Lischte vo de Büecher us dr Mundartliteratur i dr Regioon. Und als Bylaag isch en CeeDee im ene Umschlag, wo me Stück vo 22 vo dene Autoore chan lose.
Trukt worde isch s Wärch bim Löpfe-Benz z Roosche, und d CD het dr ORF produziert.
Titel
- Roman Banzer, Otmar Gassner, Felix Marxer, Rainer Stöckli und Adolf Vallaster: Am Rhii. Mundarttexte aus Vorarlberg, Liechtenstein und der rheinnahen Ostschweiz. Rorschach, Dornbirn, Vaduz 1996.