dr Alain Tanner, 1993
dr Alain Tanner im Interview mit em André S. Labarthe

Dr Alain Tanner (* 6. Dezämber 1929 z Gämf; † 11. Septämber 2022) isch e Schwyzer Filmregisseur un Draibuechautor gsii. Me het en gchännt fir visionäri, yyfielsami Film wie Jonas qui aura 25 ans en l’an 2000, Eine Flamme in meinem Herzen un Messidor.

Lääbe

Dr Alain Tanner het an dr Uniwersitet Gämf Wirtschaftswisseschafte studiert. Anne 1951 het er dr Filmclub vu dr Hochschuel glaitet, wu dr hite au bekannt Filmregisseur Claude Goretta grindet ghaa het. No sym Hochschuelabschluss het er chirzi Zyt fir internazionali Reedereie gschafft, s het en aber bal zum Filmschaffe zoge.

Ab 1955 het er Arbet gfunde am British Film Institute z London, är het dert Film untertitelet, ibersetzt un s Archiv organisiert. Sy erschte aigene Free-Cinema-Churzfilm «Nice Time» het er 1957 zäme mit em Claude Goretta verwirkligt. Där Erschtlig het uf em Filmfeschtiwäl z Venedig e Bryys un vyl Kritikerlob gwunne.

Dr Tanner isch fir e Wali uf Frankrych gange, wun er bi verschidene kommerziälle Film assischtiert het. Z Paris het er e baar vu dr wichtigschte Regisseur vu dr Nouvelle Vague chänneglehr un au dr Henri Langlois, dr Diräkter vu dr Cinémathèque française. Kritiker hän zum Dail Yyflis vum Jean-Luc Godard un vum Robert Bresson in syre Filmsproch gfunde. D Atmosphäre in dr dertige Filmerkrais het em aber nit seli gfalle, är het si as «halsabschnyderisch» krakterisiert.

Zwische 1960 un 1968 isch er retuurchuu in dr Schwyz, in däre Zyt het er iber 40 Film un Dokumäntazione fir s franzesischsprochig Färnseh gmacht. 1962 het er d Schwyzer Verainigung vu dr junge Filmmacher Groupe 5 mitgrindet.

Sy erschte große Film Charles mort ou vif? vu 1969 het im nämlige Johr dr Erscht Bryys bi dr Internazionale Filmfeschtspiil vu Locarno gwunne. 2002 isch er in dr Berlinale-Retroschpektiv wider zaigt wore. Vu syne negschte vier Film sin drei (La Salamandre, 1971; Le Milieu du monde, 1974 un Jonas…, 1976) in änger Zämenarbet mit em Schriftsteller John Berger entstande.

Syt 2014 isch dr Nooloss vum Alain Tanner im Forschigs- un Archivierigszäntrum vu dr Cinémathèque suisse z Penthaz. Dr Tanner isch am 11. Septämber 2022 im Alter vu 92 Johr gstorbe.[1]

Filmografy

  • 1957: Nice Time
  • 1961: Ramuz, passage d’un poète
  • 1962: L’École
  • 1964: Les Apprentis („Die Lehrlinge“)
  • 1966: Une ville à Chandigarh
  • 1968: Docteur B., médecin de campagne
  • 1969: Charles mort ou vif?' („Charles – tot oder lebendig“)'
  • 1970: James ou pas – Reschy: Michel Soutter – Produktion dur dr Alain Tanner
  • 1971: La Salamandre („Der Salamander“)
  • 1972: Le Retour d’Afrique („Rückkehr aus Afrika“)
  • 1974: Le Milieu du monde („Die Mitte der Welt“)
  • 1976: Jonas qui aura 25 ans en l’an 2000 („Jonas, der im Jahr 2000 25 Jahre alt sein wird“)
  • 1979: Messidor
  • 1981: Les Années lumière („Lichtjahre entfernt“)
  • 1983: Dans la ville blanche („In der weissen Stadt“)
  • 1985: No man’s land („Niemandsland“)
  • 1987: La Vallée fantôme („Das Geistertal“)
  • 1987: Une flamme dans mon cœur („Eine Flamme in meinem Herzen“)
  • 1989: La Femme de Rose Hill („Die Frau aus Rose Hill“)
  • 1991: L’Homme qui a perdu son ombre („Der Mann, der seinen Schatten verlor“)
  • 1993: Le Journal de Lady M („Das Tagebuch der Lady M. “)
  • 1995: Les Hommes du port
  • 1996: Fourbi
  • 1998: Requiem („Lissabonner Requiem“)
  • 1999: Jonas et Lila, à demain(„Jonas und Lila“)
  • 2002: Fleurs de sang
  • 2004: Paul s’en va

Uusgläseni Filmbryys

  • 1972: Bryys vum New York Film Critics Circle fir «Der Salamander» (Bestes Drehbuch)
  • 1976: Bryys vum New York Film Critics Circle fir «Jonas…» (Bestes Drehbuch)
  • 1981: Grand Prix Spécial vu dr Jury vum Filmfeschtiwäl Cannes 1981 fir «Les Années lumière» (dt. Titel: Lichtjahre entfernt)

Literatur

 Commons: Alain Tanner – Sammlig vo Multimediadateie

Fueßnote

  1. ↑ Der Genfer Filmregisseur Alain Tanner ist gestorben. In: swissinfo.ch, 11. Septämber 2022.
Dä Artikel basiert uff ere fräie Übersetzig vu dere Version vum Artikel „Alain_Tanner“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.