Dialäkt: Undermarkgreflerisch

D Agnes Dünneisen (* 17. Septämber 1955 z Baasel) isch e Schwyzer Theater- un Filmschauspiileri.

Lääbe

D Dünneisen het e Schauspiiluusbildig an dr Zürcher Schauspiilakademy gmacht un anne 1975 mit em Diploom abgschlosse. Ire Theater-Debüt het si anne 1974 am Stadttheater Bärn gee as Hedwig in Die Wildente vum Hendrik Ibsen (Reschy: Frederik Ribell). Vu 1975 bis 1981 het si ne Engaschmänt am Schauspiilhuus Bochum ghaa, wu si unter anderem d Bella in Gaslicht vum Patrick Hamilton, d Constance in Die drei Musketiere vum Alexandre Dumas, d Agnes in Der Untertan noch em Heinrich Mann, d Heidi in Fürsorgezöglinge no Bambule vu dr Ulrike Meinhof gspiilt het. Syter anne 1982 schafft si as freiberuefligi Schauspiileri. Si het Verdreeg fir ainzelni Stuck ghaa an dr Ruhrfeschtspiil Recklinghausen, an dr Wirttebäärgische Staatstheater Stuegert, am Schauspiilhuus Züri (unter anderem 1982 d Sandra Möller in Züglete vum Hansjörg Schneider in dr Raie D’Familie Chäller, Reschy: Jean Grädel) un am Theater an dr Winkelwise z Züri. Vu 1984 bis 1986 het si z Paris gschafft. Syter anne 1987 wohnt un schafft si in dr Schwyz. Si het Engaschmänt ghaa am Schauspiilhuus Züri (1987 d Lisa in Wassa Schelesnowa vum Maxim Gorki, Reschy: Gerhard Klingenberg), am Od-Theater Baasel (d Sigune in Parzival noch em Wolfram von Eschenbach, Reschy: Hans-Dieter Jendreyko, in dr eemoolige Schlotterbeck-Diefgaraasch 1990; verschiideni Rolle in Jugend ohne Gott vum Ödön von Horváth, Reschy: Jendreyko, im Baadische Bahnhoof Baasel 1997), am Theater Darum Baasel (d Nancy in Strandläufer vum Albee, Kulturwerkstatt Kaserne 1994), an dr Helmut Förnbacher Theater Company Baasel (d Susanne in Schloofzimmer Farce vum Ayckbourn, Reschy: Helmut Förnbacher, Mäss Baasel 1995), am Freie Schauspiil Baasel (d Nelly in Thrill vum Martin Roda Becher, Tabourettli 1997).

Näbe ire Aarbet am Theater het si au ne Hufe Rolle im Raadioo, im Fäärnsee un in Film ghaa, unter anderem in Dr gsund Paziänt mit em Ruedi Walter noch em Molière un in verschiidene dytsche Serie wie Der Kommissar, Tatort, Derrick, SOKO 5113, in dr Wynäächtserie Patrik Pacard (1984) un in Mit Leib und Seele (1989).

Derzue duet d Dünneisen us e Änglisch, Franzeesisch un Iteliänisch ibersetze.

Dr Martin Roda Becher isch ire Lääbespaartner.

Filmografie

  • 1975: Der Kommissar; Folg: Die Kusine
  • 1976: Tatort: Kassensturz
  • 1977: Halbe-Halbe
  • 1977: Derrick; Folg: Tod des Wucherers
  • 1978: Wann heiraten Sie meine Frau? – Fäärnsehfilm
  • 1978: Die Frau gegenüber
  • 1978: Derrick; Folg: Abitur
  • 1978–79: Lemmi und die Schmöker (4 Folge) – Fäärnsehraie
  • 1979: Die Nacht mit Chandler
  • 1979: Achtung Zoll! – Fäärnsehraie
  • 1980: SOKO 5113; Folg: Kokain
  • 1981: Jeans – Fäärnsehfilm
  • 1982: Ich fühle was, was Du nicht fühlst – Fäärnsehfilm
  • 1983: Kontakt bitte... – Fäärnsehraie
  • 1984: Führer durch die Welt – Fäärnsehfilm
  • 1984: Patrik Pacard – Fäärnseh-Mehdailer
  • 1985: Die schwarze Perle
  • 1985: Der Fahnder; Folg: Liebe macht blind
  • 1989: Mission Eureka – 7-dailigi Fäärnsehraie
  • 1990: Black Money – Verfilzung... Macht... Korruption
  • 1990: Der Gatte – Das Dossier
  • 1990: Mit Leib und Seele (5 Folge) – Fäärnsehraie
  • 1992: SOKO 5113; Folg: Feuer im Herz
  • 1994: Verliebt, verlobt, verheiratet – Fäärnsehraie
  • 1994: Blankenese (12 Folge)
  • 1994: Die Gerichtsreporterin; Folg: Mutterfreuden
  • 2000: Der Onkel vom Meer
  • 2000: Usfahrt – Joy Ride

Literatur

  • Judith Niethammer: Agnes Dünneisen. In: Andreas Kotte (Hrsg.): Theaterlexikon der Schweiz. Band 1. Chronos, Zürich 2005, ISBN 3-0340-0715-9, S. 498 f.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.