Dr Ursprung

Dr erst Achaiisch Bund isch noch fr Iifüerig vo de demokratische Verfassige im 5. Joorhundert v. d. Z. um e Kult vom Zeus Homagyrios entstande. 373 v. d. Z. isch die füerendi Polis Helike von ere Fluetwälle vollständig zerstöört worde. Aigai, Olenos und Rhypes si in son eme schlächte Zuestand gsi, as d Bevölkerig si ufgee het. Keryneia und Leontion si ufblüet und häi dere iiri Blätz im Bund gfüllt.

Dr Kampf gege Makedonie

Dr Bund het gegen e Köönig Philipp II. Politik gmacht. und isch verschwunde, wo dä Griecheland underworfe het. Um 280 v. d. Z. isch er under dr Füerig vo Aigion nöi gründet worde zum wie dr Polzbios schribt, d Makedonier z verdriibe. Im Chremonideische Chrieg het dr Bund zämme mit Athen und Sparta vergääblig gege Makedonie kämpft. Au nidachaiischi Gebiet si Mitgliider vom Bund mit Bürgerrächt. Der Bund het e Volksversammlig ghaa, e Root und Beamti. Am Aafang isch er vo zwäi Stratege aagfüert worde, woorschinlig vo 255 v. d. Z. nume no vo äim.

Im Kampf gege dr makedonisch Köönig Demetrios II. het sich dr Bund 239 sine alte Riwale, de Aitoler zämmedoo. S Bündnis mit Sparta het nid lang ghebt, wil bäidi Site iir Gebiet häi welle vergössere. Dr Spartanerköönig Kleomenes III. het im Bund e Hufe Stedt chönne abspängstig mache, woorschinlig wil si nid freiwillig zum Bund ghöört häi, wie das dr Polybios suggeriert. Wo s usgsee het, wie wenn d Spartaner dr Bund chönnte vernichte häi d Achaier 225 v. d. Z. ihri antimakedonischi Politik ufgee und dr makedonisch Köönig Antigonos III. Doson gege Sparta um Hilf bittet.

S Bündnis mit Makedonie

Mit dr Hilf vom Doson häi d Achaier groossi Däil vom Peloponnes übernoo, under anderem in dr Argolis und am Isthmus vo Korinth, aber au in Arkadie. 222 isch Sparta in dr Schlacht vo Sellasia entschäidend gschlaage worde. Wääred em Zwäite Makedonische Chrieg si d Achaier 198 v. d. Z. vo dr Site vo Makedonie under em Philipp V. uf d Site vo Rom übere, und dr Bund het in de Joor druf si grössti Usdeenig ghaa.

Dr Partner vo de Römer

Im Joor 188 v. d. Z. häi d Achaier über dr ganz Peloponnes gherrscht, wo d Aitoler, wo gege Rom kämpft gha häi, alles verloore häi. Wo d Rämer gegen e Köönig Perseus vo Makedonie Chrieg gmacht het, het sich dr Bund brobiert uusezhalte und het zur Stroof 168 v. d. Z. 1000 Mitgliider vo dr Oberschicht as Gäisle uf Rom müesse schigge, under en dr Polybios. 147 v. d. Z. isch s zum Chrieg mit Rom choo. D Achaier häi verloore, Korinth isch zerstöört worde und 146 isch dr Bund ufglööst worde. E chli spööter isch er seer vil chliiner no äinisch gründet worde, het aber politisch kä Rolle me gspiilt. Südgriecheland isch schliesslig 27 v. d. Z. zur römische Brovinz Achaea worde.