d Élisabeth Baume-Schneider (2024)

D Élisabeth Baume-Schneider (* 24. Dezämber 1963 z Saint-Imier; haimetberächtigt z Les Breuleux) isch e Schwyzer Bolitikeri (SP). Am 7. Dezämber 2022 isch si as Noofolgeri vu dr Simonetta Sommaruga in Bundesroot gweelt woore.

Lääbe

D Élisabeth Baume-Schneider het an dr Uniwersiteet Nöieburg Wiirtschaft un Bolitik studiert un anne 1987 mit em Lizänziaat abgschlosse. Vu 1989 bis 2002 het si as Soziaalarbaiteri gschafft.

Si isch ghyroote un Mueter vu zwai Chinder. Si woont z Les Breuleux, im Weschte vum Kanton Juura.[1] In Les Breuleux het sie au e Härde Schwarznaseschoof.[2]

Bolitischi Laufbaan

Iri bolitischi Aarbet het si as Studänti bi dr Sozialistische Arbaiterbartei aagfange,[3] speeter isch si in d SP yydrätte. Si bschrybt si sälber as links: «Ich stand immer eher links. Aber ich habe auch immer als Minorität gearbeitet. Und da musste ich immer mitmachen, mit Leuten, die weniger links waren oder eher rechts oder aus der Mitte. […] Ich habe immer gezeigt, dass ich etwas beitragen kann, auch wenn ich sehr links bin.»[4]

Kantonaal

Vu 1995 bis 2002 het si em jurassische Kantonsbarlemänt (Parlement) aagheert, wu si im 2000 bresidiert het.[5] Anne 2002 isch si in d Kantoonsregierig (Gouvernement) vum Kanton Juura ufgnoh woore. Si het deert s Erzieigs-, Spoort- un Kultuurdepartemänt glaitet.[5] 2006, 2008 un 2012 het si s Gouvernement bresidiert,[5] bis 2015 isch si Mitgliid dervu gsii. Speeter het si vier Joor lang d Hoochschuel fir Soziaali Aarbet un Gsundhait z Lausanne glaitet.[6]

Aidgnessisch

Bi dr Waale 2019 isch d Baume-Schneider in Ständeroot gweelt woore. Si isch Bresidänti vu dr Kummissioon fir Umwält, Ruumblaanig un Energy (UREK), Mitgliid vu dr Gschäftsbriefigskummissioon (GPK), vu dr Kummissioon fir Wisseschaft, Bildig un Kultuur (WBK) un vum Biro vum Ständeroot gsi. Si isch au Vizebresidänti vu dr SP Schwyz gsi.[1]

D Baume-Schneider het fir d Bundesrootswaal 2022 as Noofolgeri vu dr Simonetta Sommaruga kandidiert, wu zum Änd vum Joor zrudrätten isch. Am 26. Novämber 2022 het d SP-Fraktion bschlosse, d Baume-Schneider zäme mit dr Eva Herzog uf ire Waalvorschlaag an d Bundesversammlig ufznee.[7]

Am 7. Dezämber 2022 isch d Baume-Schneider im dritte Waalgang as Ussesyteri zur Bundesreeti gweelt woore.[8] Mit ire wiird zum eerschte Mool au dr Kanton Juura im Bundesroot verdrätte syy.[8] Si het ir Amt am 1. Jänner 2023 aaträtte[8] und isch die erschti Zyt mit de Migration im Zämmehang mit im Russisch-Ukrainische Krieg beschäftigt gsi.[9]

 Commons: Élisabeth Baume-Schneider – Sammlig vo Multimediadateie

Fuessnote

  1. 1 2 Elisabeth Baume-Schneider geht ins Rennen um Bundesratssitz. In: swissinfo.ch, 11. Novämber 2022.
  2. ↑ Thomas Knellwolf: Die Unterschätzte ist ganz oben angekommen. In: Der Bund. 7. Dezember 2022, abgruefen am 7. August 2023.
  3. ↑ Adrian Schmid: Baume-Schneider war nicht in der Revolutionären Marxistischen Liga. In: Tages-Anzeiger/SonntagsZeitung, 3. Dezämber 2022.
  4. ↑ Die neue Bundesrätin - Elisabeth Baume-Schneider – Teamplayerin mit Regierungserfahrung. In: SRF.ch. 7. Dezember 2022, abgruefen am 7. Dezember 2022.
  5. 1 2 3 Elisabeth Baume-Schneider, Bundesrätin Vorsteherin des Eidgenössischen Justiz- und Polizeidepartements EJPD. In: Schweizerische Eidgenossenschaft. Abgruefen am 7. August 2023.
  6. ↑ Über mich uf dr Websyte vu dr Élisabeth Baume-Schneider, abgruefen am 4. Dezämber 2022.
  7. ↑ Herzog und Baume-Schneider auf SP-Zweierticket. In: SRF.ch. 26. November 2022, abgruefen am 6. Dezember 2022.
  8. 1 2 3 Im dritten Wahlgang: Baume-Schneider schafft die Überraschung. In: SRF.ch. 7. Dezember 2022, abgruefen am 7. Dezember 2022.
  9. ↑ 100 Tage im Bundesrat - Elisabeth Baume-Schneider will nun sichtbarer werden. In:SRF. 27 März 2023.
Dä Artikel basiert uff ere fräie Übersetzig vu dere Version vum Artikel „Élisabeth_Baume-Schneider“ vu de dütsche Wikipedia. E Liste vu de Autore un Versione isch do z finde.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.