Ñandurire

Ñandurire ja'e Dipsas turgidus térã Leimadophis almadensis-pe jajuhúva Argentina, Bolivia, Brazil, Uruguay, ha Paraguái tuichakue. Ipara ku jarara térã kyryryóicha, ha upévare ojekyhyje chugui. Ñandurire hyeguy pytã, ha péicha pya'e jaikuaa mba'eichagua mbóipa ha'e. Maymávante he'i ñandurire rendy imbareteveha opaichagua mbói rendýgui, ha ñandesu'úrõ pya'eterei ñandejukaha. Ha'e jepe mba'evegusasu ndojapói ñanderehe ñandesu'úrõ, ha nañanera'ãi ñandesu'u hag̃ua. Oimérõ ñandesu'u, hasy'imi ñandéve ha ñañeñanduvai sapy'ante, nañandejukái.[1]

Ñandurire apytépe oĩ avei Leimadophis poecilogirus, michĩvéva umi ambuégui ha ndahyeguy pytãiva, ha Sibynomorphus mikanii.[2]

Ñandurire rembi'uete jajyta. Ha'e katu oñandúramo oĩha ho'uséva chupe, ojere ovayvávo ha oñemomano. Karaiñe'ẽme upévape ja'e tanatosis. Jaheja aremi rire ha'eño, opáy sapy'a, oñemongu'e ha oho.[3]

Mandua'py
  1. Gatti, Carlos. 1985. Enciclopedia Guarani - Castellano de Ciencias Naturales y Conocimientos Paraguayos. Arte Nuevo Editores. Asunción.
  2. https://guyra.org.py/el-bestiario-paraguayo-el-nandurire
  3. http://www.faunaparaguay.com/Cabral.pdf
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.