江西嗰歷史 |
---|
![]() 虎溪三笑 |
|
|
江西嗰貨幣史係話江西有史以來嗰流動貨幣鑄造、使用嗰歷史。
江西到漢代嗰豫章郡之前嗰史料記載少傷嘍。前後拕越、吳、楚管得嗰江西到上古時代應該用嗰係各國嗰貨幣。
上代
![](../I/%E5%8D%8A%E5%85%A9%E9%8C%A2.jpg.webp)
西漢嗰時間,將腳建正嗰豫章郡開始鑄造本地嗰貨幣。《豫章圖經》話:「南昌山者,昔吳王濞鑄錢之山,時有夜光遙望如火,以為銅之光。」《史記·吳王濞列傳》話:「孝惠、高后時,……吳有豫章銅山,濞則招天下亡命者鑄錢,煮海水為鹽,以故無賦,國用富饒。」
公元前175年,吳王劉濞到豫章大量鑄造四銖嗰「半兩」錢。《史記·平準書》話:「漢興,接秦之弊,丈夫從軍旅,老弱轉糧饟,作業劇而財匱,自天子不能具鈞駟,而將相或乘牛車,齊民無藏蓋。於是為秦錢重難用,更令民鑄錢。」「至孝文時,莢錢益多,輕,乃更鑄四銖錢,其文為「半兩」,令民縱得自鑄錢。故吳諸侯也,以即山鑄錢,富埒天子,其後卒以叛逆。鄧通,大夫也,以鑄錢財過王者。故吳、鄧氏錢佈天下。」吳王鑄正嗰「半兩」錢拕搦去「佈天下」。《中國古錢關解》介紹話西漢許時間,吳王、鄧通造嗰錢都係區分得開嗰,佢俚各自有自簡嗰獨特標記。𠵹《江西歷代錢幣》分析到江西境內尋到嗰四銖「半兩」錢,發現佢俚嗰直徑都位到2.2cm到2.5cm之間,重量位到2.2g到3.2克之間。末後箇本書話箇時間嗰江西鑄幣嗰特徵應該係「半兩」嗰「兩」係「一」字兩或不成「人」字兩嗰形制。
中古
![](../I/%E9%96%8B%E5%85%83%E9%80%9A%E5%AF%B6.jpg.webp)
唐代以後,江西嗰貨幣制度拕大幅嗰改動。《舊唐書·食貨上》話:「武德四年七月,廢五銖錢,行開元通寶錢,徑八分,重二銖四絫,積十文重一兩。一千文重六斤四兩。」新制定嗰「一兩十錢」嗰幣制替吥實行八百喇年嗰銖兩幣制,錢上嗰字拕改做「通寶」、「元寶」。
唐·肅宗乾元年間,江西設立信州嗰玉山、饒州嗰永平兩隻錢監。南唐嗰時間,饒州嗰永平監嗰錢幣鑄量達六萬貫,係南唐全國嗰五分之一。箇隻時期嗰江西鑄幣就拕刻製到明顯嗰產地標記,像唐·會昌年間(841年—846年)做嗰「開元通寶」、乾元年間(758年-760年)做嗰「乾元重寶」嗰後背都刻嘚「洪」字,「洪」代指嗰就係「洪州」。箇兩批錢輪部汀清、面文深明。「開元通寶」嗰「洪」可以位到上頭、下頭、正手邊、倒手邊同得「洪月紋」。「乾元通寶」箇下單就尋到上「洪」、下「洪」兩款。
中世
宋·開寶八年(975年),南唐拕宋朝滅吥後,永平監接得拕投入使用。開寶年間(968年-976年),永平監嗰年鑄錢量達七萬貫,983年就刻時增產到三十萬貫,末後接得增加到四十萬貫,箇時間江西已經係宋朝嗰鑄錢基地,規模一徑哩拕擴大,產量也一徑哩拕提高。
宋·至道年間(995年—997年),永平監撥一半嗰鑄幣匠到安徽嗰池州,到許裡設置永豐監。999年,接得到江州設立廣寧監、到福建嗰建州設立豐國監。箇四隻錢監嗰年鑄錢量達135萬貫。元豐年間(1078年-1085年),光永平監就鑄得61萬緡。箇時間,江西嗰地面上嗰錢監有永平監、裕國監、豐餘監同嘚鉛山、贛州嗰鑄錢院。
984年,「詔虔、信、饒三州歲市鉛錫為錢,從轉運使張齊賢請也。齊賢初為江南西路轉運副使,訪知饒、信、虔州山谷產銅鐵鉛錫之所,又求前代鑄法,惟饒州永平監用唐開元錢料,堅實可久,由是定取其法,歲鑄五十萬貫,凡用銅八十五萬斤,鉛三十六萬斤,錫十六萬斤。齊賢詣闕面陳其事。詔既下,有言新法增鉛錫多者,齊賢固引唐朝舊法為言,議者不能奪。然唐永平錢法,肉好周郭精妙,齊賢所鑄,雖歲增數倍,而稍為粗惡矣。」
《續資治通鑑》嗰箇段文字話明江西永平監嗰鑄錢程式哈係揸得唐永平錢法舞嗰,做正嗰錢幣肉好、制度精准、合金配比適當。箇時間嗰江西錢,都係緊江西用起,末後流通到別嗰地區,但係北宋嗰時間江南嗰錢係禁止運到北方嗰。
北宋嗰時間(1105年),江西開始發行紙幣「錢引」,故係銅幣嗰鑄量大幅減少,有滴子錢監拕關吥嘍,但饒州、信州兩隻錢監哈係拕留得繼續生產。彭信威到佢嗰《中國貨幣史》裡頭話:
“ | 每張錢引用六顆印來印制,分三种顏色,這是多色印刷術的開始。第一顆印是敕字,第二是大料例,第三是年限,第四是背印,這四种印都是用黑色。第五是青面,用藍色。第六是紅團,用紅色。六顆印都飾以花紋,例如敕字印上或飾以金雞,或飾以金花,或飾以雙龍,或飾以龍鳳。每界不同。……拿整張錢引來說,最上面是寫明界分,接著是年號(如辛巳紹興三十一年),其次是貼頭五行料例(多是些格言),其次是敕字花紋印,其次是青面花紋印,其次是紅團故事印,其次是年限花紋印(多為花草),再其次是背印,分一貫和五百文兩种,最后是書放額數 | ” |
1106年,江西流通嗰當十銅錢拕新型紙幣「小鈔」兌換替代,佢嗰最大嗰面額係一貫。
近古
![](../I/%E8%87%B3%E5%85%83%E9%80%9A%E8%A1%8C%E5%AF%B6%E9%88%94%E4%BA%8C%E8%B2%AB.jpg.webp)
元代嗰時間,江西用嗰大部份係紙鈔,冇鑄什哩錢,史籍也冇滴子記載。但箇下吉安尋到哩滴子元朝嗰「至正之寶」嗰伍錢、貳錢伍分、壹錢伍分、壹錢、伍份箇滴子面值嗰權鈔錢,都係抵得正現銀嗰。箇滴子錢嗰後背都刻得「吉」字,故係也叫「吉字錢」。
元朝嗰起頭許下子,江西係發行自簡嗰紙幣「交鈔」,箇到外地流通不正。末後到1364年嗰年頭、十月,元朝統一發行「中統元寶交鈔」又叫(絲鈔)同得「中統元寶寶鈔」(又叫銀鈔)。「鈔」拕制定係唯一嗰合法貨幣,金、銀、銅錢都拕禁止流通。紙鈔嗰引發由寶鈔提舉司嗰達魯花赤負責。
近世
明朝嗰時間,江西設立寶泉局,前後發行「大中通寶」、「洪武通寶」、「永樂通寶」、「宣德通寶」箇滴子錢幣。1375年,又發行「大明寶鈔」頂替銅幣嗰流通位子。萬後年江西恢復鑄幣,𠵹幾停幾復,一徑到1393年,江西每年嗰鑄幣量達67000喇貫,佔得明朝嗰總數嗰37%強,排到各地之首。明朝嗰江西錢嗰面值,《明史·食貨志五》話:「及平陳友諒,命江西行省置貨泉局,頒大中通寶錢,大小五等錢式。即位,頒『洪武通寶』錢,其制凡五等:曰『當十』、『當五』、『當三』、『當二』、『當一』。『當十』錢重一兩,餘遞降至重一錢止。」
箇時間江西也一下發行紙幣,「大明通行寶鈔」係唯一拕發行嗰紙票子,由寶鈔提舉司負責,佢下頭設立抄紙同得印鈔二局,寶鈔同得行用二庫。
清朝嗰頭兩百喇年,江西接得沿用古法鑄錢,末後開始到外國買進新式鑄造機器,鑄造銅錢跟銅圓。
監製鑄錢嗰機構——「寶昌局」拕設到南昌,佢嗰監製工作一徑維持到光緒年間。起頭嗰「順治通寶」嗰後背寫嘚「昌」字、「昌一厘」、漢滿文嗰「寶昌」三類字跡。箇裡頭嗰「昌一厘」錢嗰鑄造到1660年拕停吥嘍,末後又拕批准用兩年湊,1663年拕整體收毀。後頭嗰「康熙通寶」光就漢滿文嗰「寶昌」字一類。晏後嗰「雍正通寶」、「乾隆通寶」、「嘉慶通寶」、「道光通寶」、「咸豐通寶」、「同治通寶」、「光緒通寶」都係揸得「順治通寶」嗰樣式第四式舞嗰(前頭寫年號,後頭寫「滿文寶昌」)。箇滴子錢幣都係黃銅做嗰。
1901年,設嘚在南昌嗰德勝門偰家塘嗰寶昌局開始鑄造銅圓,有「光緒元寶」、「大清銅幣」兩款。「光緒元寶」當頭寫得「光緒元寶」四隻字,字嗰上頭刻得「江西省造」,後背雕得江西蛟龍、江西反尾龍箇滴子龍紋樣式。「大清銅幣」當面寫得「大清銅幣」四隻字,中間陰刻得「贛」字。
近代
中華民國建立後,江西到1911年、1912年發行「大漢銅幣」以示紀念。1912年,江西接得發行「江西銅幣」。
末後,江西建立中華蘇維埃共和國,𠵹也開始獨立嗰貨幣系統。像1928年,紅軍一上到井岡山,就鑄起「工字銀元」。箇年嗰5月督,毛澤東、朱德聽得王佐嗰話,請來謝火榮、謝阿秋、謝阿五箇滴子人做師傅、創辦起紅軍造幣廠。,廠址拕設到上井村嗰鄒甲貴屋裡。同時間佢俚哈到上井嗰牛路坑、大井嗰鐵坑、茨坪村箇滴子地方設立銀元粗坯車間,仿鑄墨西哥版銀元,材質係銀質或銅鍍銀。箇滴子銀元都拕刻得「工」字,故係叫「工字銀元」。
1928年嗰冷天,為到躲避第三次圍剿,紅軍造幣廠拕遷到小井嗰金獅面崖洞同到下井嗰桶缸山箇滴子地方。第年1月拕圍剿軍佔領,毀吥嘍。
1932年10月,湘贛省委決定成立隻造幣廠過,廠址起頭拕設到永新嗰龍門嗰黃岡,末後拕遷到貓鷹巷、下田、象形嗰天龍山、石橋嗰梅田箇滴子地方。陳玉林、蕭石潔、袁河秋前後擔任廠長。造幣廠嗰造幣工序係:溶銀、翻砂、銼光、稱重、衝壓;仿鑄嗰版別有:大清銀幣、光緒元寶、「袁大頭」、「孫小頭」、「拐杖」箇滴子貨幣。
拕設到瑞金嗰國家造幣廠係生產刻得「中華蘇維埃」字樣嗰銀幣嗰。佢有兩角、五分、一分嗰面值,重量足、製作精,上頭有雕得共產主義特色嗰花紋。,
參考資料
- 龍吉昌、王寶珍,《江西歷代錢幣圖錄》,江西美術出版社,1991年,ISBN 7805800715
- 中華印刷通史