Kevin Mitnick

Rugadh Mitnick ar 6 Lúnasa 1963[3] i Van Nuys, California.[4] Ba é Alan Mitnick a athair, Shelly Jaffe a mháthair, agus ba í Reba Vartanian a sheanmháthair ar thaobh a mháthar.[5][6] D’fhás sé aníos i Los Angeles, California.[3] Nuair a bhí sé 12 bliain d'aois, chuir Mitnick ina luí ar thiománaí bus a insint dó cén áit a bhféadfadh sé pollaire ticéad a cheannach (ar son “tionscadal scoile”), agus sa chaoi sin bhí sé in ann dul ar aon bhus i mórcheantar Los Angeles saor in aisce, ag baint úsáide as duillíní aistrithe a fuair sé i ngabhdán bruscair in aice le gharáiste na cuideachta bus.[7]

D’fhreastail Mitnick ar James Monroe High School in North Hills i ngar do Los Angeles[8][9] agus le linn na tréimhse sin mhúscail a spéis i raidió amaitéarach.[10] Cláraíodh é níos déanaí i gColáiste Pierce Los Angeles agus in Ollscoil Dheisceart California.[8]

Bhris Mitnick isteach i líonra ríomhaireachta i 1979, nuair a bhí sé 16 bliana d’aois. Thug cara dá chuid uimhir theileafóin Ark dó, córas ríomhaireachta de chuid Digital Equipment Corporation (DEC) a d'úsáid siad chun an córas oibriúcháin RSTS/E a fhorbairt.[11] Sa bhliain 1988, cúisíodh agus ciontaíodh Mitnick as briseadh isteach sa líonra agus an bogearra a chóipeáil. Gearradh 12 mhí sa phríosún air agus trí bliana breise faoi mhaoirseacht an stáit. I ngar do dheireadh na trí bliana sin, bhris Mitnick isteach i ríomhairí de chuid Pacific Bell, agus cuireadh barántas gabhála amach. Thug sé do na boinn é, agus chaith sé dhá bhliain go leith ar a theitheadh ón dlí.[12]

De réir Roinn Dlí na Stát Aontaithe, bhris Mitnick isteach sna dosaenacha de líonraí ríomhaireachta agus é ina theifeach. D’úsáid sé fóin póca chlónáilte chun a shuíomh a cheilt agus, i measc rudaí eile, chóipeáil sé bogearraí luachmhara dílsithe ó roinnt de na comhlachtaí fóin póca agus ríomhaireachta is mó sa tír.[13][14] Ina theannta sin, ghoid Mitnick pasfhocail ríomhaire, d'athraigh sé líonraí ríomhaireachta, agus bhris sé isteach agus léigh sé ríomhphost príobháideach.[14][15] Uair amháin, bhain sé úsáid as scanóir raidió agus fuair sé amach go raibh gníomhairí de chuid an FBI ag teannadh leis. Theith sé óna árasán, agus nuair a tháinig na húdaráis, fuair siad bosca taoschnónna ag fanacht leo.[5]

Ghabh an FBI Mitnick ar 15 Feabhra 1995, ina árasán i Raleigh, Carolina Thuaidh, as coireanna feidearálacha a bhain leis an tréimhse dhá bhliain go leith a chaith sé ar a theitheadh. Nuair a gabhadh é, bhí fóin póca chlónáilte aige, agus bréagpháipéir aitheantais éagsúla.[16]

Cúisíodh Mitnick as calaois leictreonach (14 cúiseamh), seilbh ar ghléasanna rochtana neamhúdaraithe (8 gcúiseamh), idircheapadh cumarsáide sreinge nó leictreonaí, rochtain neamhúdaraithe ar ríomhaire feidearálach, agus damáiste a dhéanamh do ríomhaire.

Greamán bumpair “Free Kevin” a rinne tacadóirí ó 2600 Magazine.[17]

Sa bhliain 1999, phléadáil Mitnick ciontach i gceithre chúiseamh de chalaois leictreonach, dhá chúiseamh de chalaois ríomhaireachta, agus cúiseamh amháin gur idircheap sé cumarsáid leictreonach go mídhleathach, mar chuid de mhargadh pléadála os comhair cúirte feidearálaí in Los Angeles. Gearradh 46 mí i bpríosún air, agus 22 mí sa bhreis as téarmaí a pharúil i 1989 a shárú. D’admhaigh sé gur sháraigh sé na téarmaí seo trí bhriseadh isteach i líonraí ríomhaireachta éagsúla, agus trí chaidreamh a dhéanamh le bradaithe ríomhaireachta eile, sa chás seo, a chomhchosantóir Lewis De Payne.[18][19][20]

Chaith Mitnick cúig bliana i bpríosún — ceithre bliana go leith roimh an triail agus ocht mí faoi bhraighdeanas aonair — toisc, de réir Mitnick, gur chuir na húdaráis ina luí ar bhreitheamh go raibh sé de chumas aige “cogadh núicléach a thosú trí fheadaíl a dhéanamh ar tháillefón” .i. go mbeadh sé in ann glaoch a chur ar NORAD ón bpríosún, agus cumarsáid a dhéanamh leis an líonra trí fheadaíl.[21][22]

Scaoileadh Mitnick saor ar 21 Eanáir 2000. Chaith sé trí bliana eile faoi mhaoirseacht an stáit, agus ní raibh cead aige aon teicneolaíocht chumarsáide a úsáid seachas teileafón líne talún.[23] De réir théarmaí an mhargaidh pléadála, ní raibh cead aige brabús a bhaint as scannáin nó leabhair a bhí bunaithe ar a ghníomhaíocht choiriúil ar feadh seacht mbliana.[24]

Tar éis gur scaoileadh saor é in 2000, d'oibrigh Mitnick mar chomhairleoir slándála, óráidí poiblí, agus údar. Rinne sé comhairliúchán slándála agus bréagionsaithe tástála do chomhlachtaí agus do ghníomhaireachtaí rialtais. Bhunaigh sé Mitnick Security Consulting LLC, agus bhí sé ina chomhúinéir ar KnowBe4, comhlacht a sholáthair ardán d'oiliúint feasachta slándála.[25] Bhí sé ina bhall gníomhach de bhord comhairleach Zimperium,[26] comhlacht a fhorbraíonn bogearra a chuireann cosc ar ionsaithe soghluaiste.[27] Bhí sé ina chónaí i Las Vegas, Nevada.

Fuair Kevin Mitnick bás le hailse phaincréis ar an 16 Iúil 2023, agus é 59 bliain d'aois. Mhair a bhean chéile agus leanbh gan bhreith.[28][29][5][3]

• (2002) The Art of Deception: Controlling the Human Element of Security[30]
• (2005) The Art of Intrusion: The Real Stories Behind the Exploits of Hackers, Intruders & Deceivers[31]
• (2011) Ghost in the Wires: My Adventures as the World's Most Wanted Hacker[8]
• (2017) The Art of Invisibility[32]