An Mheá

Comhdhéanann na réaltaí is gile de chuid na Meá dronuilleog. Is cuing na meá iad α is β Lib, agus is scálaí na meá iad γ is σ Lib:

• α Lib, Zubenelgenubi ("teanchair an deiscirt"), déréalta infheicthe
• β Lib, Zubeneschamali ("teanchair an tuaiscirt")
• γ Lib, Zubenelakrab ("teanchair na scairpe")
• σ Lib, réalta athraitheach uraitheach dá ngairíodh γ Scorpii tráth

• ι Lib: tríréalta

• NGC 5897: réaltbhraisle chruinneogach

Mar atá luaite cheana féin, ní raibh sa réaltbhuíon seo fadó ach cuid de theanchair na Scairpe, nó Chelae mar a thugadh na Sean-Ghréigigh air; mar sin de tá an Mheá ar an réaltbhuíon is óige de chuid an stoidiaca, agus is í an t-aon cheann amháin nach léiríonn dúil bheo. De réir cosúlachta, ba iad na Rómhánaigh sa chéad aois Roimh Chríost a d'ionannaigh an réaltbhuíon seo le meá. Os a choinne sin, áfach, deirtear go dtugadh na Suiméirigh Zi-ba-ni-tum ("meá neimhe") mar ainm ar an réaltbhuíon seo dhá mhíle bliain roimh na Rómhánaigh. ZIB.BA.AN.NA an leagan Acáidise a fhaightear ar théacsanna Asaíreacha ón gcéad míle bliain RC.

De réir mhiotaseolaíocht dhéanach na Gréige, d'ionannaítí an réaltbhuíon sa tseanré le meá an cheartais a bhíodh ar iompar ag Astraea, bandia an cheartais (is é sin le rá an Mhaighdean). Is amhlaidh go mbíonn scothchosúlacht meá ar an réaltbhuíon seo mura gcuirtear san áireamh réaltaí eile nach bhfuil páirteach inti.

Ós rud é nach raibh i réaltbhuíon na Meá sa tseanré ach roinn na Maighdine (mar scálaí) agus, roimhe sin, roinn na Scairpe (mar theanchair), ní raibh aon bhaint ag an réaltbhuíon seo le comharthaí eile an stoidiaca. Seans go gcuirtí an tAoire ina áit, óir is é sin an réaltbhuíon is giorra don éiclipteach i gceantar seo na spéire.

Baineann comhartha astralaíoch na Meá (Meán Fómhair 23 - Deireadh Fómhair 22) leis an réaltbhuíon atá ar aon ainm leis.

De réir cosmeolaíochtaí áirithe, tá baint éigin leis an Meá le dúil chlasaiceach an Aeir, agus mar sin de aithnítear mar chomhartha an aeir í (i dteannta an Uisceadóra agus an Chúpla). Is ceann í freisin de na ceithre chomhartha chairdinéalta (i dteannta an Reithe, an Phortáin, agus an Ghabhair). Is é an Reithe is frithchomhartha polach léi. Is í an Mheá áitreabh Véineas agus ardú Shatairn.

Baineann gach comhartha astralaíoch le roinn éigin an choirp, agus tuigtear an roinn seo mar ionad a chumhachta. Rialaíonn an Mheá leaba an duáin agus na baill ghiniúna inmheánacha. Ar ndóigh, is í an tsiombail atá ar an gcomhartha seo ná an mheá í féin. I measc tréithe na Meá áirítear: áilleacht sa chorp, collaíocht thréan, mothú ealaíonta, stuaim is scil thaidhleoireachta, agus mothú dúchais cothroime is cóimheá. Os a choinne sin, bíonn lucht na Meá an-bhreithiúnach go minic.

Daoine cáiliúla ar rugadh faoin gcomhartha seo iad: Julie Andrews, Hannah Arendt, Brigitte Bardot, Monica Bellucci, Chuck Berry, Toni Braxton, Jimmy Carter, Miguel de Cervantes, John Coltrane, Aleister Crowley, Matt Damon, Catherine Deneuve, Denis Diderot, Michael Douglas, T S Eliot, John Entwistle, William Faulkner, Larry Fine, F Scott Fitzgerald, Michel Foucault, Mahatma Gandhi, George Gershwin, Martin Heidegger, an Pápa Eoin Pól I, Buster Keaton, John Lennon, Franz Liszt, Louis XIII na Fraince, Louis-Philippe na Fraince, Auguste agus Louis Lumière, Groucho Marx, Lord Nelson, Friedrich Nietzsche, Lee Harvey Oswald, Gwyneth Paltrow, Luciano Pavarotti, an Pápa Pól VI, Arthur Rimbaud, Eleanor Roosevelt, Susan Sarandon, Paul Simon, Edmund Stoiber, Margaret Thatcher, Jean-Claude Van Damme, Gore Vidal, Virgil, Naomi Watts, Oscar Wilde, Kate Winslet, Sigourney Weaver, Catherine Zeta-Jones agus Vladímír Pútín

• Sonraí réaltmhéadracha ag baint leis an Meá

• Yale Bright Star Catalog
• an Mheá ar shuíomh Robin Gatter Curtha i gcartlann 2006-05-08 ar an Wayback Machine
• Ian Ridpath's Star Tales
• an Mheá agus miotaseolaíocht an Domhain Curtha i gcartlann 2006-07-19 ar an Wayback Machine
• an Mheá ar shuíomh Richard Dibon-Smith
• Peoria Astronomical Society: an Mheá Curtha i gcartlann 2006-06-15 ar an Wayback Machine
• The Deep Photographic Guide to the Constellations: an Mheá

• Burnham, Robert Jr. (1966, 1978). Burnham's Celestial Handbook: An Observer's Guide to the Universe Beyond the Solar System, v.2. General Publishing Company, Ltd., Toronto. ISBN 0-486-23567-X.