Éamon Ryan
Is polaiteoir é Éamon Ó Riain[1] (i mBéarla: Éamon Ryan; 28 Iúil 1963 a rugadh é), atá ina cheannaire ar an bpáirtí glas is mó in Éirinn, mar atá, an Comhaontas Glas.
Ba Theachta Dála é ar son Bhaile Átha Cliath Theas idir 2002 agus 2011, agus ba é an tAire Cumarsáide, Fuinnimh agus Acmhainní Nádúrtha é idir 2007 agus 2011. Tá sé ina Theachta Dála, ar son Chuan Bhaile Átha Cliath Theas, ó Olltoghchán 2016, agus ina aire rialtais ó 2020.
Sonraí Pearsanta
Rugadh Éamon Ó Riain i mBaile Átha Cliath agus tógadh é i nDún Droma agus i mBaile an Mhuilinn. Oileadh é i gColáiste Gonzaga i ndeisceart Bhaile Átha Cliath ar dtús agus d'fhreastail sé ar an ollscoil i UCD, áit ar bhain sé céim amach sa tráchtáil.[2] Mhaígh sé féin gur fhás a shuim i gcúrsaí glasa tar éis dó cúrsa éiceolaíochta a dhéanamh don Mheánteist.[3]
Comhthogadh é ar dtús ar Chomhairle Cathrach Bhaile Átha Cliath, nuair a d'éirigh Seán Ó Gormlaigh as a shuíochán siúd, tar éis dó a bheith tofa chun na Dála. Atoghadh Ó Riain sna toghcháin áitiúla i 1999 agus d'éirigh leis suíochán Dála a bhuachaint sa chéad olltoghchán eile sa bhliain 2002, nuair a mhéadaigh líon na nGlasach sa Dáil faoi thrí.
Bhí sé i mbun dhá ghnó rothaíochta sular toghadh é chun na Dála, mar atá, Irish Cycling Safaris agus Belfield Bike Shop. Tá sé pósta leis an scríbhneoir Victoria White agus tá ceathrar páistí óga acu. Tá cónaí orthu i gCluain Sceach.
Ina cheannaire ar an gComhaontas Glas
Cé gur chaill sé a shuíochán Dála i 2011, chuaigh Eamon Ryan san iomaíocht do cheannaireacht an Chomhaontais Ghlais in éineacht le beirt eile, mar atá, an Cllr. Malcolm Noonan agus Phil Kearney, tar éis do John Gormley éirí as an bpost. Fógraíodh go raibh an bua ag an Rianach ar 27 Bealtaine 2011 tar éis do bhaill an pháirtí vótáil sa toghchán tríd an bpost.
Deir sé go bhfuil sé dírithe mar cheannaire ar atógáil an pháirtí agus ar theagmháil nua a dhéanamh le muintir na hÉireann amach anseo.[4]
Tagairtí
- Members of the Government (Cabinet Ministers) and Ministers of State - 30th Dáil as at the 24 January 2011. Curtha i gcartlann 2011-01-07 ar an Wayback Machine Suíomh oifigiúil Oireachtas Éireann.
- "Cóip cartlainne". Cartlannaíodh an bunleathanach ar 2007-12-27. Dáta rochtana: 2008-01-20.
- A Journey to Change: 25 Years of the Green Party in Irish Politics, le Dan Boyle (2006) lth. 83 ISBN 1-84588-559-7
- "Cóip cartlainne". Cartlannaíodh an bunleathanach ar 2011-05-28. Dáta rochtana: 2011-05-28.