Rosebud Sû Stamme
Ingelsk	Rosebud Sioux Tribe
lânseigen	Sičháŋǧu Oyáte
flagge
algemiene ynformaasje
lân	Feriene Steaten
steat	Súd-Dakota
haadkertier	Rosebud (Súd-Dakota)
etnisiteit	Lakota
ledetal	24.000 (2013)
oprjochting	1868
status	federale erkenning
erkenning	Feriene Steaten
reservaat
reservaat	Rosebud Yndianereservaat
lokaasje	súdlik Súd-Dakota
oerflak	5.103,2 km²
ynwennertal	10.500 (2000)
offisjele webside
www.rosebudsiouxtribe-nsn.gov
kaart
Lokaasje fan it haadkertier fan 'e stamme yn Súd-Dakota.

De Rosebud Sû Stamme (Ingelsk: Rosebud Sioux Tribe; Lakota: Sičháŋǧu Oyáte, útspr.: [si'ʧʰã:ʁu o'ja:te]) is in federaal erkende Yndiaanske stamme-organisaasje yn 'e Feriene Steaten, mei in eigen reservaat yn 'e steat Súd-Dakota.

Algemien

De organisaasje, dy't oprjochte waard yn 1868, hat 24.000 leden, en it haadkertier is fêstige yn Rosebud, yn Súd-Dakota. De leden besteane út etnyske Sû (Sioux), foar it oergrutte part fan 'e Brulee-substamme fan 'e Lakota, mei dêropta in lyts groepke Oglala. De Rosebud Sû Stamme foarmet mei tsien oare Sû-organisaasjes de Feriene Sû Stammen.

Reservaat

It reservaat fan 'e Rosebud Sû Stamme is it Rosebud Yndianereservaat (Rosebud Indian Reservation) fan súdlik Súd-Dakota, dat in oerflak hat fan goed 5.100 km², en dêr't yn 2000 likernôch 10.500 minsken wennen. Oarspronklik makke it diel út fan it Grutte Sû-reservaat dat yn 1868 stifte waard, mar nei de nederlaach fan 'e Sû yn 'e Flakte-Yndiaanske Oarloggen fan 'e 1860-er en 1870-er jierren waard de helte dêrfan troch de Amerikanen ôfnommen, wylst de rest yn 1889 opdield waard yn fiif lytsere reservaten, wêrfan't Rosebud ien wie. Yn 1910 waard nochris sa'n fjouwerfyfde part fan it oerbleaune Rosebud Reservaat losmakke en foar kolonisaasje troch blanken frijjûn. Rosebud is Ingelsk foar "roazeknop"; dêrfandinne de lytse roaskes (mei de noch lytsere wite tipys yn 'e midden) op 'e flagge fan 'e stamme.

Keppelings om utens

● (in) Offisjele webside fan 'e Rosebud Sû Stamme