| ||||||||||||||||||
Rûgehuzen is in doarp yn de eardere gemeente Gaasterlân-Sleat, no De Fryske Marren, súdwest fan Balk.
Skiednis
It doarp waard healwei de 13e iuw Rughahusem neamd. Oare nammen wiene Rughahuysum (1505) en Rugahuysen (1579). De namme ferwiist nei in delsetting (huzen) yn in rûch begroeide krite. Mooglik kin it earste diel ek ferwize nei de famylje- of persoansnamme 'Roege'.
Rûgehuzen hie in eigen tsjerke, dy't yn de 18e iuw ôfbrutsen is.
Yn de rin fan de tiid rekke it doarp yn it neigean en yn 1840 wie it al sa lyts, dat der noch mar tolve huzen stiene. Dêrnei is it ynwennertal stadichoan tanommen, mar in echte kearn hat it plak net.
Oant 1 jannewaris 1984 foel Rûgehuzen yn de gemeente Gaasterlân, dernei yn de gemeente Gaasterlân-Sleat en yn 2014 waard it doarp yndield by de gemeente De Fryske Marren.
Mienskip
Befolking
In bekende ynwenner fan Rûgehuzen wie hurdrider Jappie van Dijk.
Befolkingsferrin:
| Jier | 1840 | 1954 | 1959 | 1964 | 1969 | 1974 | 2004 | 2021 |
|---|---|---|---|---|---|---|---|---|
| Ynwenners | 32 | 283 | 196 | 205 | 147 | 125 | 130 | 115 |
Tsjerke
De Wikipedy hat ek in side Tsjerke fan Rûgehuzen.
Sûnt de ôfbraak fan de doarpstsjerke binne de protestantske ynwenners tsjerklik oanwiisd op Harich (protestantsk). Roomske ynwenners binne oanwiisd op Balk. Corpus Roemeling neamde Jehannes as patroanhillige fan de tsjerke.[2][3] Lêste pastoar wie Pieter Symens, dy't yn 1586 noch neamd waard mar doe nei alle gedachten net mear yn funksje west hat. De tsjerke bestie yn alle gefallen al yn 1421 en waard yn 1721 tekene troch Jacobus Stellingwerff.
Feriening(s)
Strjitten
Coenderssingel, Jan Jurjenssingel, Lutswâl, Rûchhústerwei, Tsjerkhôfleane.
It besjen wurdich
Efter de Coenderssingel stiet oan de ein fan in oprydleane it wyt plastere De Mottekamp, oarspronklik in jachthûs of bûtenferbliuw by in boereskuorre fan ûngefear 1880 dêr't de ôfkomst noch net helder fan is.
Op it tsjerkhôf stiet ek ien fan de Fryske klokkestuollen. Op it hiem fan in pleats oan de Rûchsterwei stiet in Amerikaanske wynmotor.
Gea
East fan Rûgehuzen leit de Bremer Wyldernis, mar it doarp leit ek oan 'e râne fan de Starnumanbosk. Yn de 19e iuw waard hout út dat produksjebosk brûkt om te ferstoken. Steatsboskbehear wol dat dit bosk tusken Kippenburch en Rûgehuzen wer in grut en rûch oerbosk wurdt. Steatsboskbehear lit yn dat produksjebosk út de 19e iuw de natoer gewurde. Mear as hûndert jier lyn waarden de beammen yn it ramt fan de houtkapkultuer om de 15 jier kapt foar it hout om dermei bakkersûnen te stoken.
De iken wurde no al beselskippe troch bjirken, dinnen, ferskate soarten moas, farens en poddestuollen.
Sjoch ek
| Boarnen, noaten en/as referinsjes: | ||
|
