Marieke Lucas Rijneveld
skriuwer
Marieke Lucas Rijneveld, 2022
Marieke Lucas Rijneveld, 2022
persoanlike bysûnderheden
nasjonaliteitflagge fan Nederlân Nederlânsk
berne20 april 1991
berteplakNieuwendijk
wurk
sjenreProaza, poëzy
útjouwerAtlas Contact
prizenC. Buddingh'-priis 2016
Booker International Prize 2020
offisjele webside
Hiemside

Marieke Lucas Rijneveld, berne as Marieke Rijneveld, (Nieuwendijk, 20 april 1991) is in Nederlânsk skriuwer en dichter.

Libben en wurk

Rijneveld waard berne op in pleats yn in grifformearde hûshâlding. Se studearre in jier Nederlânsk oan de dosinte-oplieding yn Utert en oan de Skriuwersfakskoalle yn Amsterdam. Har wurk waard publisearre yn ûnder oare de VPRO Gids, Het liegend konijn en Hollands Maandblad.

Rijneveld wûn de Hollands Maandblad Aanmoedigingsbeurs 2014/2015 en it C.C.S. Crone-stipendium 2015. Yn juny 2015 ferskynde har poëzydebút Kalfsvlies by Atlas Contact. de Volkskrant rôp har út ta literêr talint fan 2016.[1] Se wûn mei dy bondel de C. Buddingh'-priis 2016 foar it bêste poëzydebút fan it jierr.[2] Wilens wurke hja oan har roman De avond is ongemak dy't yn de rin fan 2018 in bestseller waard. De Ingelske fertaling The Discomfort of Evening helle de shortlist fan de International Booker Prize 2020. Fantoommerrie, har twadde dichtbondel, ferskynde yn febrewaris 2019 en wûn de Ida Gerhardt Poëzypriis 2020.

Yn 2021 waard Rijneveld troch de Amerikaanske dichteres Amanda Gorman útkeazen om har wurk yn it Nederlânsk oer te setten. Rijneveld oanfurdige de opdracht ynearsten, mar luts har letter werom nei 't de Nederlânske rassefoarfjochtster Janice Deul de útjouwer bekritisearre foar it jaan fan in opdracht oan in blanke oersetter foar it wurk fan in swarte dichteres.

Yn septimber 2021 makke it CPNB bekend dat Rijneveld it boeke-essay foar de Boekewike fan 2022 skriuwe sil.

Njonken de skriuwerij wurket Rijneveld twa dagen yn 'e wike op in molkfeehâlderij.

Lucas

Rijneveld woe yn groep trije fan de basisskoalle graach in jonkje wêze en betocht doe Lucas, in fantasyfreontsje. Ienris op 'e middelbere skoalle waard Rijneveld narre fanwegen in jongeseftich foarkommen en paste syn hâlden en dragen oan. Doe 't Rijneveld njoggentjin jier wie, kaam dat jongeseftige werom; yn 2010 heakke Rijneveld de namme Lucas ta as twadde foarnamme.

Rijneveld fynt it spitich dat der yn it Nederlânsk noch gjin foarnamwurd is foar non-binêre minsken. Rijneveld joech der in skoft yn ’t Ingelsk de foarkar oan om mei it genderneutrale persoanlik foarnamwurd 'they' oantsjut te wurden. Om 't der gjin better wurd is keas Rijneveld derfoar om har yn it Nederlânsk oantsjutte te litten mei 'zij'. Letter, yn jannewaris 2022, liet Rijneveld witte de foarnamwurden 'he' en 'him' te ferkiezen en 'hij' en hem'.

Publikaasjes

Dichtbondels
Romans
  • De avond is ongemak. Atlas Contact, jannewaris 2018.
    • 2020 - Ingelsk: The Discomfort of Evening, fertaling Michele Hutchison
  • Mijn lieve gunsteling. Atlas Contact ISBN 9789025470142

Prizen

  • 2016 - C. Buddingh'-priis
  • 2019 - ANV Debutantepriis
  • 2020 - Peter van Straaten Psychologypriis foar De avond is ongemak. Tagelyk mei Esther Gerritsen en Yvonne Keuls.
  • 2020 - Ida Gerhardt Poëzypriis foar Fantoommerrie
  • 2020 - Booker International Prize foar The Discomfort of Evening
Boarnen, noaten en/as referinsjes:
  1. ↑ Dit is hét literaire talent van Nederland: Marieke Rijneveld (24), de Volkskrant, 31 desimber 2015.
  2. ↑ C. Buddingh'-Prijs 2016 is voor Marieke Rijneveld, NRC, 9 juny 2016.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.