Lân fan Taal
It driuwend paviljoen Liwwadders yn 'e Prinsetún, dêr't alles draait om Ljouwert en syn bewenners.
plak en tiid
lân	Nederlân
provinsje	Fryslân
gemeente	Ljouwert (gemeente)
plak	Ljouwert (stêd)
holden yn	Prinsetún en    Aldehouster Tsjerkhôf
datum	3 feb. o/m 31 des. 2018
bysûnderheden
oanlieding	LF 2018
soarte evenemint	kultureel
org. troch	LF 2018
offisjele webside
www.friesland.nl/.../lan-fan-taal

Lân fan Taal (de offisjele namme is Frysktalich) wie in grutskalich opset projekt yn it ramt fan Ljouwert/Fryslân Kulturele Haadstêd fan Jeropa 2018, dat hielendal wijd wie oan it ferskynsel taal en alles dat dêrmei te krijen hat. It fûn plak fan 3 febrewaris oant en mei 31 desimber 2018 en bestie út in breed skala oan eveneminten dy't foar it meastepart yn 'e Fryske haadstêd Ljouwert holden waarden, yn 'e Prinsetún en op en om it Aldehouster Tsjerkhôf: yn Tresoar, it Histoarysk Sintrum Ljouwert en it eigen besikerssintrum Obe, dat spesjaal foar Lân fan Taal oan 'e eastlike kant fan it Aldehouster Tsjerkhôf ferriisde.

Underdielen

• As Taal Gjin Feestje Is

Sympoasium wêrby't stilstien waard by taalûntwikkelingssteurings, mei foarstellings foar bern mei en sûnder sokke oandwanings en mei lêzings en in Alderkafee foar folwoeksenen. Dêrnjonken waard ek de 60e Wrâlddôvedei fierd en wie der it MuteSounds-feest en in miny-filmfestival yn Slieker Film.

• DNALWD2018

Ynteraktyf keunstwurk te sjen yn it Burmaniahûs, it gemeentehûs fan Ljouwert, besteande út tûzenen reägearbuiskes dy't yn 'e jierren foarôfgeande oan LF 2018 folle wiene mei ferhalen troch ynwenners en besikers fan Ljouwert.

• Ferhalefjoer

In provinsjebreed skoalprojekt, wêrby't alle basisskoallen yn Fryslân it boek Verdwalen in Verhalen tastjoerd krigen. Dêrmei koene skoalbern ferhalen yn alle talen fan 'e wrâld sammelje foar in eigen ferhalejûn.

• Fertelfestival

Folút: Fertelfestival Ekspedysje It Amelân – A Storytelling Adventure. In festival, holden op 26 en 27 maaie op It Amelân, om it deiboek út 1818 fan walfiskfarder Hidde Durks Kat hinne.

• Grut Frysk Diktee

It grut diktee yn 'e Fryske taal, wêrfan't de tekst yn 2018 skreaun waard troch Welmoed Sijtsma, nijslêzeresse fan it Jeugdjournaal, holden op 21 juny yn 'e iepen loft op it Aldehouster Tsjerkhôf.

• Karawane

In skoalfoarstelling fan it Fryske toanielselskip Tryater.

• Keunstynstallaasje Tim Etchells

In tentoanstelling fan romtefoljende keunst fan 'e Britske keunstner Tim Etchells yn it talepaviljoen Obe op it Aldehouster Tsjerkhôf.

• Lanlike Manifestaasje Poetry Circle

Yn 'e fiif Nederlânske Poetry Circle-stêden, wêrûnder Ljouwert, kamen eltse wike jonge skriuwers gear om faninoar te learen en nei spoken word-performers te harkjen. Op 7 july wie it hichtepunt fan dit evenemint, doe't alle fiif Poetry Circles gearkamen foar De Manifestaasje yn Neushoorn te Ljouwert.

• Liet XXL

Edysje fan 2018 fan it Fryske muzykfestival en talintejacht Liet, holden op 23 maaie.

• Matthäus Passion

Frysktalige ferzje fan 'e Matthäus Passion fan Johann Sebastian Bach, mei foarstellings yn Ljouwert, Dokkum, Harns, Drachten, Grins en Snits.

• Obe

Ferskate útstallings yn it talepaviljoen Obe op it Aldehouster Tsjerkhôf.

• Projeksjes op 'e Aldehou

Fideokeunstwurken fertoand op 'e eastmuorre fan 'e Aldehou, eltse tongersdei-, freed-, sneon- en sneintejûn fergees te besjen. Yn 'e premiêrewykeinen fan 'e projekjes organisearren Lân fan Taal en Explore the North saneamde minyfestivals by de projeksje dy't op dat stuit te sjen wie.

• Sjong

It muzykfestival Sjong.

Lân fan Taal docht Harns oan ûnder de Tall Ships' Races 2018.

• Sprekboatefestival

Poëzij foardroegen op preamen dy't troch de Ljouwerter grêften fearen, operearjend fan 'e Prinsetún út.

• Ssst... Hjir Flústeret de Tiid

Presintaasje fan taal en poëzij yn Tresoar, mei bewegende poëzijmasines, LED-keunst, films en drukwurken. Foar bern wie der in speurtocht opset. En by it Histoarysk Reisburo koe men jins Fryske woartels ûntdekke.

• Stimmen fan Fryslân

App ûntwikkele troch de Ryksuniversiteit Grins, wêrmei't Frysktaligen it komôf fan harren taal trasearje koene. Byhearrende populêrwittenskiplike lêzings waarden holden yn it talepaviljoen Obe, op it Aldehouster Tsjerkhôf.

• Taal op it Noardlik Film Festival

Ek op it Noardlik Film Festival kaam it ferskynsel taal oan bod, û.m. mei in manifestaasje oer it gebrûk fan minderheids- en streektalen yn Nederlânske films oan 'e hân fan histoaryske fragminten. Dêrby waard live [

optreden troch dichters en keunstners. Bern koene sels stop-motionfilmkes oer taal meitsje.

• Taalkaravaan

Reizgjende útstalling oer it ferskynsel taal dy't troch Fryslân teach, en dêrby û.m. oanheakke by Simmerdeis yn Drachten, it Oranjewâld Festival op It Oranjewâld, Oerol op Skylge, de Tall Ships' Races 2018 yn Harns en de Admiraliteitsdagen yn Dokkum.

• Taaltoer

Rûnlieding troch Ljouwert mei as tema it ferskynsel taal.

• Taletún

Manifestaasje oangeande it ferskynsel taal yn 'e Prinsetún, mei twa tydlike paviljoenen: MeM Livingroom of Languages, dêr't eltse wike in oare taal of minderheidstaal sintraal stie, en it driuwend paviljoen Liwwadders, dêr't alles draaide om 'e identiteit fan 'e stêd Ljouwert en syn bewenners. Ek waarden yn 'e Prinsetún "Deropút mei Heit en Mem"-sneonen fersoarge foar 'jonge taalûntdekkers', mei taalworkshops foar bern en optredens.

• The Sea! The Sea!

Poëzij oer en op it mêd fan 'e see, yn 'e foarm fan foardrachten mank it publyk by de finish fan 'e Tall Ships' Races 2018 yn Harns, de Admiraliteitsdagen yn Dokkum en ûnder Oerol op Skylge. (De namme fan dit projekt ferwiist nei De Tsientûzen, dy't, doe't hja einlings de see wer berikten, útrôpen: Thalassos! Thalassos! – "De See! De See!".)

Keppelings om utens

• (fy) Offisjele webside fan Lân fan Taal