Yn The Force Awakens

Yn Star Wars: Episode VII – The Force Awakens wurdt kaptein Phasma yntrodusearre as se de stoarmtroepers fan 'e diktatoriale en faksistoïde Earste Oarder oanfiert dy't de Sith-ridder Kylo Ren assistearje by de oerfal op 'e delsetting Tuanul, op 'e woastynplaneet Jakku. Nei't se it doarp yn 'e macht hawwe, fiere Phasma en har manskippen sûnder wifkjen it befel fan Ren út om alle ynwenners te deadzjen. Inkeld stoarmtroeper FN-2187 kriget gewisseneed en kin him der net ta bringen om mei te dwaan oan it bloedbad.

Werom oan board fan it stjerreslachskip de Finalizer, yn in baan om Jakku, sprekt Phasma FN-2187 oan om't er sûnder tastimming syn helm ôfdien hat. It docht bliken dat se syn falen yn 'e delsetting wol opmurken hat, en se jout him opdracht om himsels oan te melden foar werkondisjonearring. Ynstee beslút FN-2187 te desertearjen en ûntkomt fan it stjerreslachskip tegearre mei de finzennommen piloat Poe Dameron fan it Ferset, dy't him de namme 'Finn' jout. Phasma is oanwêzich as de desersje fan Finn ûntdutsen wurdt en merkt dan op dat er de regels nea earder brutsen hat.

Tsjin 'e ein fan 'e film, as Finn mei Han Solo en Chewbacca de Stjerredeaderbasis fan 'e Earste Oarder ynfiltrearre is, nimme hy en syn maten kaptein Phasma yn gizeling en sette har ûnder druk om it enerzjyskyld fan 'e basis út te skeakeljen. Der is praat fan dat se har dêrnei yn in ôffalpletter smite sille om fan har ôf te kommen, mar dat wurdt net yn byld brocht.

Yn The Last Jedi

Yn Star Wars: Episode VIII – The Last Jedi (2017) komt kaptein Phasma pas wer yn byld as Finn yn 'e mande mei de monteur Rose Tico, de hacker DJ en de robot BB-8 it reuseftige flaggeskip fan 'e Earste Oarder ynfiltrearre is mei as doel om it apparaat te sabotearjen dat de Earste Oarder brûkt om 'e flechtsjende float fan it Ferset te folgjen by sprongen troch de hyperromte. Finn liedt harren nei de lokaasje fan it apparaat ta en DJ wit mei syn hackersfeardichheden de doar iepen te krijen, mar ear't Rose de sabotaazje útfiere kin, wurde se finzen nommen troch Phasma en har stoarmtroepers. Inkeld BB-8 ûntkomt mei't er kamûflearre is mei in omkeard swart jiskefet oer him hinne.

DJ keapet neitiid syn frijheid troch it Ferset te ferrieden, wêrnei't Phasma befel jout dat Finn en Rose stânrjochtlik eksekutearre wurde moatte. Dêr heakket se oan ta dat se net simpelwei deasketten wurde meie mei ploffers. Om't se wol dat de eksekúsje "stadich en pynlik" is, jout se opdracht om Finn en Rose mei laserhelleburden te ûnthalzjen. Ear't dat syn beslach krije kin, raamt fise-admiraal Amilyn Holdo fan it Ferset de kruser Raddus mei ljochtfaasje yn 'e float fan 'e Earste Oarder. It flaggeskip, de 60 km brede Supremacy, brekt dêrtroch midstwa. Yn 'e gaos dy't dan útbrekt, wit BB-8 Finn en Rose fan harren boeiens te befrijen, wêrnei't hja de striid oanbine mei de stoarmtroepers dy't harren deadwaan soene. Dêrby nimt Finn it op tsjin Phasma, dy't him oermânsk wurdt en oer de râne fan in ôfgrûn hinne slacht. Hy komt lykwols ûnskansearre wer boppe yn 'e lift dêr't er yn delkommen is, en slacht Phasma del. Dêrby brekt er har masker, sadat der in stik fan har gesicht bleat komt, om har loftereach hinne. Phasma byt him in mislediging ta, mar dan rekket it roaster los dêr't se op leit en falt se oant se yn 'e djipte weiwurdt yn 'e flammen fan in útslaande brân. Dat oerlibbet se blykber net, want se komt neitiid net mear yn 'e films fan 'e Star Wars-ferfolchtrilogy foar.