Gerlof Bontekoe
politikus
echte namme	Gerlof Auke Bontekoe
nasjonaliteit	Nederlânsk
berteplak	Hurdegaryp
stjerplak	Easterwâlde
etnisiteit	Frysk
Boargemaster fan Sleen
amtsperioade	1927-1938
foargonger	Anske Jongbloed
opfolger	George Louis Mens Fiers Smeding
Boargemaster fan Eaststellingwerf
amtsperioade	1938-1945, 1947-1965
foargonger	Einte van Douwen, H. Vondeling
opfolger	H. Vondeling, Tieme Oosterwijk

Gerlof Auke Bontekoe (Hurdegaryp, 21 febrewaris 1900 - Easterwâlde, 22 septimber 1988) wie in Nederlânsk boargemaster en heraldikus.^[1]

Bontekoe studearre rjoechten yn Leien. Hy wurke dêrnei op de gemeentesekretary yn Wymbritsersdiel en Snits. Yn 1927 waard hy boargemaster fan Sleen en yn 1938 yn Eaststellingwerf. Hy bleau hjir oant syn pinsjoen yn 1965.

Sleen hie noch gjin gemeentewapen, dêrom ûntwurp Bontekoe der ien. Dêrnei ûntwurp hy ek wapens foar 25 oare Drintske gemeentes en de flagge fan Drinte. Yn 1979 waard hy yn it provinsjehûs yn Assen huldige, omdat hy syn 150e oerheidswapen (dat fan de gemeente Buren) ûntwurpen hie.

Bontekoe wie belutsen by de tastânkomming fan in betinkingsstien oas oantinken oan de yn de Twadde Wrâldoarloch omkommen Frânske parasjutisten en krige dêrfoar fan Frankryk in sulveren earemedalje (1958). Hy wie ek Offisier yn de Oarder fan Oranje-Nassau (1965). Yn 1966 krige hy de Kulturele priis fan Drinte. Bontekoe en syn frou ferstoaren mar ien oere nei elkoar.^[2] Se waarden begroeven yn Langedike.