![](../I/Fiverstrjitte%252C_Frjentsjer.jpg.webp)
De Fiverstrjitte (Nederlânsk en offisjeel: Vijverstraat) is in strjitte yn it sintrum fan 'e Fryske stêd Frjentsjer. Dizze strjitte rint rûchwei yn noard-súdrjochting fan 'e trijesprong mei de Suderkade en de Harnzerwei yn it suden nei it punt dêr't er oergiet yn 'e Sjaardemastrjitte.
Oan 'e eastkant fan 'e Fiverstrjitte binne twa ôfslaggen. Yn it suden giet dêrby om 'e Akademystrjitte, dy't oan 'e noardkant fan in grêft lâns rint dy't by de fjouwersprong oan 'e súdein fan 'e Fiverstrjitte útkomt yn it Van Harinxmakanaal. Fierder nei it noarden is de ôfslach fan 'e Foarstrjitte, dat ien fan 'e wichtichste winkelstrjitten fan Frjentsjer is. Tusken dy beide ôfslaggen yn is in fêstiging fan GGZ Fryslân, dy't foarhinne tahearde oan it Psychiatrysk Sikehûs Frjentsjer. Fuort noardlik fan 'e ôfslach nei de Foarstrjitte begjint de Sjaardemastrjitte.
Oan 'e westkant hat de Fiverstrjitte gjin ôfslaggen. Op 'e hichte fan 'e ôfslach nei de Foarstrjitte leit oan dy kant fan 'e Fiverstrjitte it Sjûkelân, dêr't elts jier yn augustus de PC holden wurdt, dat de wichtichste keatspartij fan Fryslân is. Drekt besuden it Sjûkelân, ek oan 'e westkant fan 'e Fiverstrjitte, stiet De Bogt fen Guné, dat it âldste kafee fan Nederlân is, datearjend út 1641.
- De Bogt fen Guné. De kant mei de trep is de noardside, dy't útsjocht oer it Sjûkelân.
- It Sjûkelân, oan 'e westkant fan 'e Fiverstrjitte.
- Keatsen op it Sjûkelân, mei op 'e eftergrûn oerdwers rinnend de Fiverstrjitte en oare kant dêrfan de Foarstrjitte.
Boarnen, noaten en/as referinsjes: | ||
|