Yn Attack of the Clones

Greve Dooku wurdt yntrodusearre yn 'e film Star Wars: Episode II – Attack of the Clones (2002) as in eardere Jedi-master dy't de Jedi Oarder ferlitten hat nei't er it fertrouwen kwytrekke is yn 'e Galaktyske Republyk, dy't de Jedi tsjinje. Hy spilet in rol fan krúsjaal belang by de oprjochting fan 'e separatistyske Konfederaasje fan Unôfhinklike Stelsels, dy't him fan 'e Republyk ôfskiede wol. Neffens Dooku is de Republyk troch en troch korrupt en binne de leden fan 'e Galaktyske Senaat mear ynteressearre yn it behâlden fan 'e burokratyske regeltsjes en it ferrykjen fan harrensels as yn it oprjocht fertsjintwurdigjen fan harren kiezers.

Dooku wit de lieders fan ferskate ynfloedrike organisaasjes oan 'e side fan 'e Konfederaasje fan Unôfhinklike Stelsels te krijen, wêrûnder it Keapmansgilde, de Techno Uny en de Yntergalaktyske Bankêre Groep. Nute Gunray, de Neimoïdyske ûnderkening fan 'e Hannelsfederaasje, stelt as betingst foar syn stipe dat senator Padmé Amidala fan Naboo út 'e wei romme wurde moat. Troch har tadwaan hat er nammentlik tsien jier earder in pynlike nederlaach lit yn 'e Nabookrisis, en hy is út op wraak. Dat, Dooku hiert de Mandaloriaanske preemjejager Jango Fett yn om dat putsje op te knappen. Fett besteget it fierder út oan hiermoardneresse Zam Wesell. Nei twa mislearre moardoanslaggen folget de Jedi-ridder Obi-Wan Kenobi it spoar werom, fan Coruscant fia Kamino nei Geonosis, de planeet dêr't Dooku foar de Konfederaasje fan Unôfhinklike Stelsels in reuseftich leger fan oarlochsandroïden gearstalle lit.

Nei't Obi-Wan finzen nommen is, fertelt Dooku him dat er krewearret om 'e Republyk te rêden, mei't tûzenen senators ûnder de ynfloed ferkeare fan in Sith-master dy't Darth Sidious hjit. Hy besiket Obi-Wan oer te heljen om 'e lapen mei him op ien bulte te smiten, en brûkt dêrfoar as argumint dat syn eardere learling Qui-Gon Jinn, de âlde master fan Obi-Wan, him grif by him oansletten hawwe soe as er noch libbe. Obi-Wan stegeret Dooku lykwols ôf. Nei't ek Padmé en Obi-Wan syn padawan Anakin Skywalker finzen nommen binne, feroardielje Dooku en aartshartoch Poggle de Mindere fan Geonosis harren ta de deastraf, dy't útfierd wurde moat yn in gefjocht mei wylde bisten yn in arena foar it each fan tsientûzenen Geonosianen.

Dat wurdt lykwols ferhindere troch de tuskenkomst fan Jedi-master Mace Windu, guon oare leden fan 'e Hege Jedi Ried en in kloft oare Jedi-ridders. Master Yoda arrivearret net folle letter mei in bataljon kloansoldaten en it dêropfolgjende treffen is de earste slach fan in nij wapene konflikt, de Kloane-oarloggen. Dooku lûkt him werom yn syn ûndergrûnske kontrôlekeamer, dêr't er fan Poggle de Mindere de blaudrukken yn ûntfangst nimt foar in nij superwapen, dy't tsjin eltse priis út 'e hannen fan 'e Jedi holden wurde moatte. Hy bejout him nei in hangaar dêr't syn romteskip ree stiet, mar wurdt folge troch Obi-Wan en Anakin. Yn in gefjocht mei de ljochtsabel stelt Dooku Obi-Wan bûten gefjocht en slacht er Anakin in hân ôf. Hja wurde rêden troch Yoda, dy't de striid mei Dooku oangiet. Tsjin him kin Dooku it net hâlde, mar hy liedt Yoda ôf troch in swier stik apparatuer op Obi-Wan en Anakin falle te litten, en Yoda is al syn konsintraasje nedich om dat mei de Krêft op te fangen en fansiden te smiten. Underwilens ûntkomt Dooku yn syn romteskip. Hy reizget nei Coruscant, dêr't er de Sith-master Darth Sidious treft, dy't him oansprekt mei de Sith-namme Darth Tyranus. Oan Sidious langet er de blaudrukken foar it superwapen oer.

Yn The Clone Wars

Yn 'e lange tekenfilm Star Wars: The Clone Wars (2008), dy't yn 'e ynterne gronology fan Star Wars op 'e foarfallen yn Attack of the Clones folget, keart greve Dooku (ynsprutsen troch Christopher Lee) werom. Hy stiet oan it haad fan in gearspanning om Rotta, de jonge soan fan 'e gangster Jabba de Hutt, te ûntfieren en de Jedi dêrfoar de skuld op 'e lea te skowen. Sa wolle hy en Jabba syn omke Ziro de Hutt derfoar soargje dat Jabba him tsjin 'e Jedi Oarder en de Galaktyske Republyk keart. Dooku beävensearret dat syn hantlangster Asajj Ventress de jonge Rotta op 'e noed kriget. Letter befjochtet er yn in duël mei de ljochtsabel de Jedi-ridder Anakin Skywalker, in striid dy't einiget yn in ympasse. Nettsjinsteande dat witte Anakin en syn nije padawan Ahsoka Tano neitiid it snoade plan fan Dooku en Ziro te dwerseidzjen.

Yn 'e op 'e film folgjende tekenfilmsearje Star Wars: The Clone Wars (2008-2014 en 2020) spilet greve Dooku (ynsprutsen troch Corey Burton) in dûbelspul as de lieder fan 'e Konfederaasje fan Unôfhinklike Stelsels en de Sith-ridder Darth Tyranus. Mei syn master Darth Sidious is er it brein efter it meastepart fan 'e swierrichheden dêr't de haadpersoanen Obi-Wan Kenobi, Anakin Skywalker en Ahsoka Tano mei te meitsjen krije. In langrinnende ferhaalline wurdt datoangeande foarme troch de yntriizjes fan Dooku om 'e Galaktyske Republyk op 'e planeet Mandalore te beheljen yn in ûnwinbere besettingsoarloch, wat feridele wurdt troch hartoginne Satine Kryze fan Mandalore.

Yn it trêde seizoen wurdt Dooku troch Darth Sidious twongen om syn trou te bewizen troch syn learling Asajj Ventress te deadzjen. Ventress oerlibbet dat ferrie lykwols en giet nei har thúswrâld Dathomir om stipe te sykjen by de Nachtsusters, in kloft Krêftgefoelige froulju dy't laat wurdt troch Mem Talzin. Mei dy har soan Savage Opress as learling en tsjinner keart se werom om wraak te nimmen op Dooku. Savage beseft lykwols dat Ventress him inkeld foar har eigen doelen brûkt en ferriedt sawol har as Dooku. Yn it fjirde seizoen ferslacht Dooku Anakin yn trije ûnderskate ljochtsabelduëls en nimt er wraak op Ventress troch generaal Grievous befel te jaan en bewurkmasterje de systematyske útrûging fan 'e Nachtsusters.

Yn it sechsde seizoen ûntdekt Dooku dat de kloansoldaat Tup Oarder 66, it befel ta de Grutte Suvering fan 'e Jedi, te betiid útfierd hat. Efter de skermen krewearret er om it ûndersyk fan 'e Republyk en de Jedi nei dat foarfal te dwerseidzjen. Ek manipulearret er de Yntergalaktyske Bankêre Groep om al syn middels oan 'e Sith oer te dragen. Letter fine de Jedi de ljochtsabel fan 'e Jedi-master Sifo-Dyas werom, dy't tolve jier earder troch Dooku fermoarde is, en stelle se in ûndersyk yn. Under druk fan Darth Sidious behimmelet Dooku alles dat nei harren ta liede kin. By in konfrontaasje mei Obi-Wan en Anakin op 'e planeet Oba Diah smyt Dooku einlings en te'n lêsten syn momkape ôf en makket er himsels bekend as Darth Tyranus. Hja begripe dan dat hy dejinge wie dy't op Kamino it kloaneleger fan 'e Republyk besteld hat.

Yn Revenge of the Sith

Star Wars: Episode III – Revenge of the Sith (2005), it ôfslutende diel fan 'e Star Wars-prequeltrilogy, spilet trije jier nei de foarfallen yn Attack of the Clones. Oan it begjin fan 'e film hawwe greve Dooku en generaal Grievous de ûntfiering fan kânselier Palpatine beävensearre, dy't eins it alter ego fan 'e Sith-master Darth Sidious is. It makket allegear diel út fan Palpatine syn plan om 'e uterst talintearre Anakin Skywalker te ferlieden nei de tsjustere kant fan de Krêft. Mei Obi-Wan giet Anakin oan board fan it romteskip fan Grievous, dêr't de beide Jedi Dooku oantreffe. Dyselde slacht Obi-Wan al rillegau bewusteleas, sadat Anakin it allinne tsjin him opnimme moat.

Anakin jout ta oan syn haat foar Dooku en brûkt de tsjustere kant fan 'e Krêft om him oermânsk te wurden, wêrby't er him beide hannen ôfhout. Palpatine ferriedt dan syn learling Dooku, dy't no helpeleas is, troch Anakin oan te fiterjen om him te deadzjen. Anakin wifket eefkes, mar jout dan ta en ûnthalzet Dooku mei de ljochtsabel. Dy die set in keatling fan foarfallen yn wurking dy't úteinlik ta de fal fan Anakin Skywalker liede sille, en syn ferwurding ta de Sith-ridder Darth Vader, de folgjende learling fan Darth Sidious.