Cheyenne
In útsjoch op 'e Cheyenne fanôf de autowei Interstate 90, by Wasta (Súd-Dakota).
geografy
lân	Feriene Steaten
steat	Wyoming Súd-Dakota
ûntspringt yn	gearrin Antelope Creek en Dry Fork Creek
lokaasje boarne	Converse County
mûnet út yn	Missoery (rivier)
lokaasje mûning	Oahe-mar
plakken	Edgemont, Oral, Wasta
sydstreamen	Rapid Creek, Belle Fourche, Cherry Creek
sifers
lingte	475 km
ôfwetteringsgeb.	62.800 km²

De rivier de Cheyenne (útspr.: [ʃɨ'jɛ:n]) is in likernôch 475 km lange sydstream fan 'e rivier de Missoury, yn it westen fan 'e Amerikaanske steat Súd-Dakota en it easten fan 'e steat Wyoming, dy't in gebiet fan krapoan 63.000 km² ûntwetteret.

Rin

De rivier wurdt foarme troch it gearstreamen fan 'e rivierkes de Antelope Creek en de Dry Fork Creek yn it Nasjonaal Gerslân Thunder Basin, yn it noardeastlike diel fan Converse County, yn 'e steat Wyoming. Dêrwei streamt de Cheyenne, dy't ferneamd is nei it Yndiaanske folk fan 'e Sjajinnen (Ingelsk: Cheyenne), yn eastlike rjochting oer de grins fan Súd-Dakota, it stedsje Edgemont foarby en oan 'e súdlike kant om 'e Black Hills hinne.

De rivier de Cheyenne, mei yn 'e ljochtere kleur it gebiet dat troch de rivier ûntwettere wurdt.

Dan floeit de rivier nei it noardeasten, it stedsje Oral en it Nasjonaal Gerslân Buffalo Gap foarby en by de noardwestlike grins fan it Pine Ridge Yndianereservaat en it Nasjonaal Park de Badlands lâns. Dêr mûnet de Rapid Creek deryn út. De Cheyenne streamt dêrnei it stedsje Wasta foarby, waakst oan troch de gearfloeiïng mei de Belle Fourche, yn it easten fan Meade County, en hâldt dan in eastnoardeastlike koerts oan by de súdlike grins fan it dernei neamde Cheyenne River Yndianereservaat lâns. By it stedsje Cherry Creek mûnet it rivierke de Cherry Creek deryn út, krekt foàr it punt dêr't de Cheyenne sels by de Oahe-kearmar útmûnet yn 'e Missoury, sa'n 50 km noardnoardwestlik fan Pierre, de haadstêd fan Súd-Dakota. De lêste 56 km foarmet de Cheyenne ien fan 'e beide earms fan 'e Oahe-mar.