Boelensloane
Emblemen
Polityk
Lân	Nederlân
Provinsje	Fryslân
Gemeente	Achtkarspelen
Sifers
Ynwennertal	1.200 (1 jannewaris 2023)[1]
Oerflak	7,03 km², wêrfan: - lân: 7,03 km² - wetter: 0,00 km²
Befolkingsticht.	173 ynw./km²
Oar
Tiidsône	UTC +1
Simmertiid	UTC +2
Koördinaten	53° 09'N 6° 08'E
Lokaasje Boelensleane (grien) yn 'e gemeente Achtkarspelen
Offisjele webside
FB-side Boelensloane
Kaart

Boelensloane is in doarp yn de gemeente Achtkarspelen, súdwest fan Surhústerfean.

Boelensloane hat 1.200 (1 jannewaris 2023)^[2] ynwenners.

Namme

De namme Boelensloane waard yn 1899 foar it earst neamd en ferwiist nei de famylje Boelens, dy't in state hie yn Bûtenpost (Grut Skepper) en yn de krite in soad grûn besiet. De famylje levere ek ferskillende grytmannen yn Achtkarspelen.^[3] De haadwei fan it doarp wie ynearsten in sânpaad.

Skiednis

Boelensloane wie eartiids in heidegebiet yn it doarpsgebiet fan Surhústerfean en ûntstie as doarp pas yn de 19e iuw. It gebiet waard ynearsten Surhústerfeanske heide of Feansterheide neamd. De earmoede wie grut en de earmsten wennen yn plaggehutten en hoalen.

De yn 1852 boude herfoarme tsjerke

Yn 1852 waard der in herfoarme tsjerke boud en stadichoan ûntstie der út de fersprate lytsere delsettings in lintbebouwing. Pas oan it begjin fan de 20e iuw waarden der yn it ramt fan de Wenningwet stiennen hûzen boud.

It sosjalisme krige yn dy tiid in soad oanhing yn Boelensloane. Foar de tsjerke oer lieten de sosjalisten yn 1933 in Folksgebou delsette, dêr't de arbeiders harren ferheffe koene.^[4] It gebou bleau oant 1976 iepen.

Yn de Twadde Wrâldkriich kamen fiif ynwenners fan Boelensloane om troch besjittings, by it besykjen om te flechtsjen of yn 'e konsintraasjekampen. Ta harren neitins en de twa slachtoffers fan Houtigehage is in plaquette oan de eardere herfoarme tsjerke oanbrocht.^[5]

Om 1960 hinne is besocht om de namme Boelensloane om te setten yn Boelensfean, mar dat is der net fan kommen. Troch de nijbou hat it doarp dat earder bestie út streekjes huzen en fersprate bebouwing wat mear in buorren krigen.

Mienskip

De Smoutte

Boelensloane hat sûnt 2012 in doarpshûs, dat De Smoutte hjit. Pleatslik Belang ynformearret de bewenners mei de doarpskrante Nijs fan 'e Loane.

De ynwenners op 'e Loane wurde tradisjoneel foar heidemannen útmakke.^[6]

Skoalle

Gearwurkingsskoalle De Wâldiik

Der is ien skoalle: de gearwurkingsskoalle De Wâldiik. Dy skoalle is ûntstien troch in fúzje yn 2013 fan de eardere kristlike skoalle De Stile en de eardere iepenbiere skoalle de Jan van Zuilenskoalle.

Doarpswapen en flagge

Boelensloane ûntstie yn de tiid fan de turfwinning. It wapen is keperfoarmich trochsnien fan read en goud, mei oer alles hinne kruse twa stikken turfstekkersark: in stekker en in oplizzer mei de stâle nei ûnderen ta; in griene skyldfoet beladen mei in sulveren roas. It read ferwiist nei de heide en de striidberens fan de befolking, wylst it goud de sângrûn foarstelt. De griene skyldfoet is in ferwizing nei De Wâlden. De roas dêryn is ûntliend oan it famyljewapen Boelens.

Wite Tsjerkje

Ynfrastruktuer

Publikaasje (s)

• Siebe Bos, Jan Post, Ines Pultrum "Later is vroeger niet mooier" (1991)
• Martinus Jongsma en Jaap Jongejan "Twa doarpen op 'e heide (2020)"

Pleats Boelenswei 6

Sjoch ek

• Fryske doarpen.

Keppeling om utens

• Film oer Boelensloan (1969)

53° 10' NB, 6° 09' EL