Jonkheid en oplieding

Fuller waard berne yn 'e Kalifornyske haadstêd Sacramento, mar groeide op yn Los Angeles, dêr't se yn 2002 slagge foar de middelbere skoalle oan 'e Notre Dame High School yn 'e wyk Sherman Oaks.

Karriêre

Fuller hie har earste aktearrol op har njoggende, yn 'e minysearje Tales of the City (1993). Har earste filmrol folge fjouwer jier letter, yn ’Til There Was You (1997).

Fuller fertolke op 'e tillefyzje gastrollen yn û.m. de komeedzjesearjes That '70s Show, Malcolm in the Middle en 8 Simple Rules, de plysjesearjes Walker, Texas Ranger, NCIS, Without a Trace, Bones, CSI: Crime Scene Investigation, Law & Order: Special Victims Unit en Rizzoli and Isles, it rjochtbankdrama Judging Amy, de fantasytillefyzjesearje Buffy the Vampire Slayer en de dramasearjes Party of Five en Boston Public. Fierders spile se ek yn in protte tillefyzjefilms.

As filmaktrise wie Fuller û.m. te sjen yn 'e spylfilms Askari (2001), Americanese (2006) en Freerunner (2011). Fanôf it twadde seizoen (2012) naam se de fêste rol fan dochter Kristin Baxter yn 'e komeedzjerige Last Man Standing oer fan Alexandra Krosney. Fuller fertolke ek de weromkearende rol fan dokter Morgan Peterson yn fiif ôfleverings fan 'e sikehûssearje Grey's Anatomy (2012), en de weromkearende rol fan Madison "Badison" Murphy yn 'e lêste beide seizoenen fan 'e dramasearje Orange Is the New Black (2018-2019).

Behalven as aktrise wurket Fuller ek as regisseur. Sa fierde se de rezjy oer de produksje yn Los Angeles fan it toanielstik This Is Your Youth, fan toanielskriuwer Kenneth Lonergan. Se makke har debút as tillefyzjeregisseur yn 'e Last Man Standing-ôflevering Garage Band, út it achtste seizoen fan dy searje.

Priveelibben

Amanda Fuller wennet yn Los Angeles en is troud mei in Matthew Bryan Feld. Se makken yn july 2019 bekend dat se harren earste bern ferwachten. Fuller befoel op 19 novimber 2019 fan in sûn jonkje.