Stirie

Seconde par grandece tra i stâts federâi da la Austrie, la Stirie e si divît in plui regjons.

A Nord e si cjate la Alte Stirie (tod. Obersteiermark), che e va dal confin setentrionâl dal stât federâl a la cjadene montagnose Steirischen Randgebirge, a Sud da la val di confluence tra il flum Mur e il flum Mürz.

La Stirie Orientâl (tod. Oststeiermark) e je logade a Jevât dal flum Mur e sot il Wechsel e lis Alps Fischbacher. La Stirie Meridionâl (tod. Südsteiermark - che no va confondude cu la Stirie Inferiôr, tod. Untersteiermark, che in dì di vuê fâs part da la Slovenie) e consist inte aree ator lis citâts di Leibnitz, Radkersburg e Deutschlandsberg. A Bonât dal flum Mur infin, e je logade la Stirie Ocidentâl (tod. Weststeiermark).

Dispès la Stirie e ven clamade „Grüne Mark“ (voltât: la Marche verde; al riclame il non todesc Steiermark), parcè che cirche il 61% dal so teritori al è cuviert di boscs. La mont plui alte da la Stirie e je la Hoher Dachstein (2995 m).

La fuartece di Riegersburg

• 1180 – La Stirie e devente ducât.
• 1186 – Cul Pat di Georgenberg (che al jentre in vigôr tal 1192), i duchis di Austrie (i Babenbergers prime e i Asburcs plui indenant) a deventin ancje duchis da la Stirie.
• 1254 (Pâs di Ofen) o 1261 (Pâs di Viene) – Il re Ottokar II di Ongjarie al divît la regjon dal Traungau da la Stirie e le torne a creâ come “Principât sore il flum Enns” (tod. Fürstenthum ob der Enns), in dì di vuê ta la Alte Austrie. Ancje la contee di Pitten e ven distacade e anetude al ducât d'Austrie (odierne Basse Austrie.
• Cule sudivision ereditarie asburgjiche al devente la part principâl dale Austrie Interne (cun residence a Graz).
• Daspò la Prime vuere mondiâl, la part meridionâl da la Stirie (plui tart clamade Stirie Inferiore) e ven anetude a la Jugoslavie; cumò e fâs part da la Slovenie.
• 1938 – Cu la anession da la Austrie da part da la Gjermanie naziste, la zone di Aussee e ven assegnade a la Alte Austrie (che tal sisteme nazist e corispuindeve al distret dal Oberdonau - voltât Alt Danubi)
• Daspò la fin da la Seconde vuere mondiâl, a tornin a aneti la zone di Aussee a la Stirie.

La minorance slovene da la Stirie e je stade scognossude come minorance autoctone tal 2004 (come al proviodeve il Staatsvertrag dal 1955).

Secont il censiment dal 2001 a son 4.250 stirians slovens.

Tal 2004, cuntun valôr di 3,8%, la Stirie e je rivade al plui alt nivel di cressite economiche tra i stâts federâts de Austrie; tal rivâ a chest risultât, significatîf al è stât il contribût dal aglomerât urban di Graz. Impuartant al è ancje il turisim, soredut pa la Alte Stirie e pa la zone termâl ta la Stirie Orientâl. A confront cul prodot interni sporc da la Union Europeane in forme di podê di acuist, la Stirie e rive a un indiç di 102.8 (EU-25:100) (2003) [1].

Dal pont di viste aministratîf e je dividude intune citât statutarie (tod. Statutarstadt) – che e je Graz (Targhe: G) – e 12 distrets (tod. Bezirke). Di seguit la liste dai distrets cu lis rispetivis targhis.

Par motîfs di estension (di bessôl al è plui grant dal Vorarlberg), il distret di Liezen al è dividût ancjemò in Politische Expositur di Gröbming.

Dal 2019 il governadôr (tod. Landeshauptmann) da la Stirie al è Hermann Schützenhöfer, dal ÖVP).

Da la Stirie a vegnin un premi nobel par la leterature – Elfriede Jelinek – e l'ex governadôr da la Californie, plui che altri innomenât come atôr – Arnold Schwarzenegger.

1. Eurostat News Release 63/2006: Regional GDP per inhabitant in the EU 25

	Länder austriacs
Burgenland • Carintie • Alte Austrie • Basse Austrie • Salisburghês • Stirie/Staiar • Tirol • Vorarlberg • Viene