Lenghe inglese
L'inglês (non natîf English) e je une lenghe gjermaniche ocidentâl che e je la lenghe dominante tal Ream Unît, tai Stâts Unîts e intun grum di nazions dal Commonwealth come Australie, Canadà, Malte, Gnove Zelande e altris ex coloniis inglesis.
| Inglês (English) | |
|---|---|
| Pronuncie native: | /ˈɪŋglɪʃ/ |
| Altris denominazions: | English language |
| Fevelât in: | Stâts Unîts, Ream Unît, Irlande, Canadà, Australie, e altris paîs de Comunitât britaniche des nazions. |
| Regjon: | Europe ocidentâl (Ream Unît, Irlande), Americhe dal Nord (Stâts Unîts, Canadà), cualchi paîs de Afriche, cierts paîs de Asie, Oceanie (principalmentri Australie e Gnove Zelande) |
| Feveladôrs: | 340 milions (600 milions includint chei che lu fevelin come seconde lenghe) |
| Posizion (totâl): | 2 |
| Posizion (marilenghe): | 4 |
| Classificazion gjenetiche: | Lenghe indoeuropeane Gjermaniche |
| Stât uficiâl | |
| Lenghe uficiâl di: | Australie, Bahamas, Barbados, Bermuda, Dominiche, Gibraltar, Granade, Guyana, Irlande, Gjamaiche, Gnove Zelande, Antigua e Barbuda, Sante Lucie, San Kitts e Nevis, San Vincent e lis Grenadinis, Trinitat e Tobago, il Ream Unît, cualchi stât dai Stâts Unîts e Union Europeane |
| Regolât di: | Nissune instituzion |
.svg.png.webp) | |
| Codiçs de lenghe | |
| ISO 639-1 | en |
| ISO 639-2 | eng |
| ISO 639-3 | eng |
| cjale ancje: Lenghe | |
L'inglês e je al dì di vuê une des lenghis plui feveladis e scritis in dut al mont, cun cirche 380 milions di fevelants. Dome il cinês e l'Hindi e an plui fevelants, e il spagnûl al è scuasit a la pari. L'inglês e je ancje la lenghe plui fevelade di chês gjermanichis, e al ven doprât come lenghe franche in tancj paîs, par vie de influence militâr, economiche e culturâl prime dal Imperi inglês e daspò, soredut tal XX secul, dai USA. La difusion de lenghe e je stade judade ancje dal cine, de musiche, de sience e tai ultins timps di Internet, par cui aromai e je plui studiade come seconde lenghe, ancje se lis altris lenghis coloniâls come il spagnûl e il francês a mantegnin une cierte impuartance in cualchi part dal mont. Vuê si scugne cognossi l'inglês intune une vore di cjamps lavoratîfs.
L'inglês al è dividût in tancj dialets diferents, di cui i plui cognossûts a son l'inglês american e l'inglês britanic, cun l'ultin che al è ancjemò considerât la variant standard di imparâ.
Tal pont di viste dal vocabolari, al è interessant viodi come, ancje se lis peraulis base a son gjermanichis, la influence dal latin e dal francês e je stade grande: lis peraulis di origjin francês a son il 28%, chês di origjin latine il 28%, chês di divignince gjermaniche dome il 25%.