Gramatiche de lenghe furlane

La gramatiche di fonde e je la stesse par dutis lis variants dal furlan. In cheste pagjine si sclarissin i aspiets plui impuartants de morfologjie de lenghe furlane standard.

Articul indeterminatîf

L’articul indeterminatîf al à dôs formis: une pal masculin singolâr e chê altre pal feminin singolâr.

masculin	feminin
un	une

Articul determinatîf

L'articul determinatîf al à dôs formis pal masculin singolâr e une par om pal feminin singolâr, masculin plurâl e feminin plurâl.

	masculin	feminin
singolâr	il, l'	la
plurâl	i	lis

Devant di un sostantîf masculin singolâr che al scomence par vocâl si dopre l’, in ducj chei altris câs si dopre il.

Preposizions semplicis

Lis principâls preposizions semplicis a son:

di
a
in (ta)
cun
su
par
tra
jenfri

Preposizions articoladis

La cumbinazion dai articui determinatîfs cu lis preposizions semplicis di, a, in, par, su e cun (ma no cun chês altris) e forme preposizions articoladis.

	il, l'	i	la	lis
di	dal	dai	de, da la	des, da lis
a	al	ai	ae, a la	aes, a lis
in	intal, tal	intai, tai	inte, te,inta la	intes, tes, inta lis
par	pal	pai	pe, par la	pes, par lis
su	sul	sui	su la	su lis
cun	cul	cui	cu la	cu lis

Ancje i articui indeterminatîfs si fondin cu lis preposizions in, cun e su (ma no cun chês altris).

	un	une
in	intun	intune
cun	cuntun	cuntune
su	suntun	suntune

Sostantîfs e adietîfs cualificatîfs

Feminin di sostantîfs e adietîfs

Par solit il feminin di une peraule si lu forme zontant -e ae forme masculine.

biel, biele
paron, parone

Cierts sostantîfs a àn formis diferentis pal masculin e pal feminin.

taur, vacje
fradi, sûr

Plurâl di sostantîfs e adietîfs

In gjenar il plurâl dai sostantîfs e dai adietîfs masculins si lu forme zontant un -s al singolâr.

leon, leons
pari, paris
man, mans
mari, maris

Lis peraulis masculinis e femininis che a finissin par -e aton a pierdin l’-e e a zontin -is.

poete, poetis
cjase, cjasis

Lis peraulis masculins e femininis che a finissin par -s al singolâr a restin compagnis al plurâl.

nâs, nâs
lûs, lûs

Lis peraulis masculinis che a finissin par vocâl + l o vocâl + li par solit a pierdin l’-l o il -li e a zontin -i. Lis peraulis femininis che a finissin par vocâl + l, invezit, a zontin regolarmentri –s.

gjornâl, gjornâi
voli, voi
cambiâl, cambiâls

Lis peraulis che a finissin par -st a formin il plurâl in -cj.

trist, triscj

Ancje cualchi peraule che e finìs par -t e forme il plurâl in -cj. Par esempli:

grant, grancj
parint, parincj
dut, ducj
dut cuant, ducj cuancj
dint, dincj
tant, tancj

Lis peraulis che a finissin par vocâl toniche a slungjin la vocâl e a zontin -s.

amì, amîs

Cualchi peraule e à un plurâl iregolâr.

om, oms o umign
bon, bogns
an, agns
bo, bûs

Alterazion dai sostantîfs e dai adietîfs

I principâi sufìs alteratîfs a son il sufìs incressitîf -on, il diminutîf -ut e il peioratîf -at.

un fruton
un frutut
un frutat

A son ancje altris sufìs alteratîfs, che si ju dopre plui di râr: -ot, -onon, -in, -inin, -el, -it, -uç.

Grâts dal adietîf cualificatîf

I adietîfs cualificatîfs a puedin vê trê grâts: positîf, comparatîf e superlatîf.

Il comparatîf di maiorance si lu forme metint plui devant dal adietîf e di o che no devant dal secont tiermin di paragon.

Ane e je plui zovine di me.
Ane e je plui zovine che no jo.

Il comparatîf di minorance si lu forme metint mancul devant dal adietîf e di o che no devant dal secont tiermin di paragon.

Zorç al è mancul vecjo di me.
Zorç al è mancul vecjo che no jo.

Il comparatîf di paritât si lu forme metint tant che o come tra l’adietîf e il secont tiermin di paragon.

Denêl al è alt tant che jo.
Denêl al è alt come me.

Il superlatîf relatîf si lu forme metint il/la/i/lis plui o il/la/i/lis mancul devant dal adietîf cualificatîf e di o tra devant dal grup che si riferissisi.

Elise e je la plui alte de scuele.
Indrì al è il mancul bas de scuele.
Marc tra ducj al è il plui biel.
Luîs al è il plui biel di ducj.

Il superlatîf assolût si lu forme zontant il sufìs -on o -issim al adietîf di grât positîf.

Il cuadri che o vês comprât al è bielon.
Tu sês bielissim!

Adietîfs numerâi

Adietîfs numerâi cardinâi

0 zero
1 un, une
2 doi, dôs
3 trê
4 cuatri
5 cinc
6 sîs
7 siet
8 vot
9 nûf
10 dîs
11 undis
12 dodis
13 tredis
14 cutuardis
15 cuindis
16 sedis
17 disesiet
18 disevot
19 disenûf
20 vincj
21 vincjeun, vincjeune
22 vincjedoi, vincjedôs
23 vincjetrê
24 vincjecuatri
25 vincjecinc
26 vincjesîs
27 vincjesiet
28 vincjevot
29 vincjenûf
30 trente
31 trenteun, trenteune
40 cuarante
50 cincuante
60 sessante
70 setante
80 otante
90 novante
100 cent
101 cent e un, cent e une
102 cent e doi, cent e dôs
200 dusinte
300 tresinte
400 cuatricent
500 cinccent
600 sîscent
700 sietcent
800 votcent
900 nûfcent
1.000 mil
1.001 mil e un, mil e une
1.100 mil e cent
1.110 mil cent e dîs
2.000 doi mil
3.000 trê mil
100.000 cent mil
200.000 dusinte mil
1.000.000 un milion
1.000.000.000 un miliart

Adietîfs numerâi ordinâi

prin, prime
secont, seconde
tierç, tierce
cuart, cuarte
cuint, cuinte
sest, seste
setim, setime
otâf, otave
novesim, novesime
decim, decime
decim prin, decime prime
decim secont, decime seconde
decim tierç, decime tierce
decim cuart, decime cuarte
decim cuint, decime cuinte
decim sest, decime seste
decim setim, decime setime
decim otâf, decime otave
decim novesim, decime novesime
vincjesim, vincjesime
vincjesim prin, vincjesime prime
vincjesim secont, vincjesime seconde
trentesim, trentesime
cuarantesim, cuarantesime
cincuantesim, cincuantesime
sessantesim, sessantesime
setantesim, setantesime
otantesim, otantesime
novantesim, novantesime
centesim, centesime
centesim prin, centesime prime
dusintesim, dusintesime
tresintesim, tresintesime
milesim, milesime
doimilesim, doimilesime
trêmilesim, trêmilesime
centesim milesim, centesime milesime
milionesim, milionesime

Pronons personâi sogjet

I pronons personâi sogjet a àn une forme toniche e une forme atone (clitiche). La forme clitiche si le dopre dome cui mûts indicatîf, coniuntîf e condizionâl. Si le met devant dal verp intes frasis declarativis e daûr in chês interogativis (e otativis).

Il pronon personâl sogjet aton di seconde persone singolâr si à di esprimilu simpri. Chei altris pronons personâi sogjet atons si à di esprimiju simpri, fûr che cuant che, intune frase declarative, prime dal verp al è un pronon personâl complement o un pronon riflessîf. No si ju dopre nancje cuant che prime dal verp e je la negazion no.

	forme toniche	forme atone
1ps	jo	o
2ps	tu	tu
3psm	lui	al
3psf	jê	e
1pp	noaltris, nô	o
2pp	voaltris, vô	o
3pp	lôr	a

La lenghe furlane (marilenghe)

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.