Benandant
IlBenandant al jere un om o une femine dotât di un podê particolâr in te culture dal Friûl dal Rinassiment
Il nassi cun ciertis particolaritâts (cu la "cjamese") al conferìs un complès di podês sorenaturâi che a puedin jessi doprâts daûr de "inclinazion di ognidun". E duncje, o varìn il benandant, se chest al è puartât a fâ il ben o il malandant (strion) se chest al è pitost puartât a fâ il mâl. Il benandant al lote cuintri il mâl e i striaments, pal ben dal racolt e al è bon di lâ fûr dal sô cuarp, cuant che a je la sô ore, par fâ dal ben. Come che al veve za stazât il storic Carlo Ginzburg, si scuarç la relazion tra il siamanisim "siberian" e la specifiche realtât dal benandantisim. Gjilbert Pressac, il grant studiôs furlan, al teorizave un rapuart tra i insiums estatics dai benandants cun cierts rituâi eterodòs che la Incuisizion e veve scuviert e condanât tal 600 te comunitât di Palaçûl. Un rît che al consisteve tal lâ in procession lustrant la vile, la gnot di Sabide di Pentecostis, "cjantant a dôs vôs une cjançon che e tacave, (...), cu lis peraulis 'scjaraçule maraçule'".
Pressac al rivarà a identificâ in chescj rituâi un vanzum des pratichis di une antighe comunitât cristiane di Alessandrie di Egjit, i Terapeutis, e chestis pratichis cui insiums estatics dai benandants. Ma lis diferencis tra i doi fenomens a son grancj, par podê jessi sigûrs di un leam. Tra lis incompatibilitâts a puedin jessi la diference tra la pratiche dai benandants che e jere segrete e chê scuvierte a Palaçûl che e jere palese; il fat che il tiermin benandant nol ven mai doprât te acuse cuintri chescj contadins dal 600 e il cjant no si presente par solit te realtât dai benandants. La presince de figure dal benandant te leterature furlane si cjate in autôrs tant che Pauli Diacon, G.B. Donato, Ermes di Colorêt, Pieri Çorut, Toni Broili, Pacifico Simoncelli e intune conte di Elena Fabbris Bellavitis.