Americhe centrâl
La Americhe Centrâl e je il toc centrâl dal continent american, jenfri il Messic (logât te Americhe dal Nord), e la Colombie (te Americhe dal Sud). Une carateristiche uniche di chest lûc al è il fat di jessi un puint jenfri lis dôs Americhis e tal stès timp une aree di passaç jenfri i doi oceans, l'Atlantic e il Pacific, par vie de presince dal canâl di Panama.
.svg.png.webp)
I paîs che apartegnin ae Americhe centrâl a son:
- Belize (Belmopan)
- Costa Rica (San José)
- El Salvador (San Salvador)
- Guatemala (Citât dal Guatemala)
- Honduras (Tegucigalpa)
- Nicaragua (Managua)
- Panama (Panamá)
Storie
La dominazion europeane
Fin te Ete di Mieç in cheste regjon e jere popolade de civiltât Maya; dal inizi dal XVI secul fin ae fin dal Votcent e fo dominade dai spagnûi. I efiets di cheste dominazion si sintin ancjemò al dì di vuê: la lenghe fevelade in scuasit ducj i paîs al è il spagnûl, e la religjon e je chê catoliche. Ancje la composizion de popolazion si je profondementri modificade: dai amerindis si messedarin i blancs europeis (spagnûi, inglesis, francesis e olandesis) e i neris puartâts de Afriche sicu sclâfs par lavorâ tai implants.
La egjemonie des Stâts Unîts
Al dispiet de realizazion de indipendence, tai prins decenis dal Votcent, i paîs de Americhe centrâl no rivarin a vê stabilitât e sigurece. La storie di une vore di chescj paîs e je stade segnade da regjims autoritaris, colps di stât e vueris civîls. A scomençâ dal XIX secul si je afermade te aree la influence dai vicins Stâts Unîts di Americhe, che a àn fuarts interessis economics, politics e militârs te regjon. I USA a àn costruît il canâl di Panama e son intervignudis diviersis voltis par condizionâ lis politichis dai paîs de aree.