Berthold Bahnsen
Berthold Broder Bahnsen (* 8. Januwaari 1913 ön Risem-Lonham, † 14. Oktoober 1971 ön Flensborig) wiar en friisk Politiker fuar di Menerhairen ön Sleeswig-Holstiin.
 Söl'ring |
ombi 1965
Leewent en Bruarwening
Wan Bahnsen fan di hooger Reālskuul kām, liirti hi ön Flensborig en Sleeswig Spaarikasen-Koopman .
1946 waar hi di Direktor fan di "Spaarikas Nuurđfriislön" ön Leck. Hi wiar bifriit, en jat fing tau Jungen.
Politik
Bahnsen wiar Meföliger fan di SSW. Hi seet bi di Gimiindireer fan Leck. Ön di Jaaren fan 1947 bit 1954 en fan 1958 bis 1971 wiar hi tö di "Löndai", (Di Lönsting of dit Lönsparlament) ön Kiil stjüürt. Diar waar hi 1949 tö en Meföliger fan di jest Bundsforsaamling maaket, diar ön di 12. September Theodor Heuss üs di di jest Bundspresident ütsaachti.
Senerligi Gaawen her Bahnsen fuar di Politik aur Wertskep en Jil. Sent 1962 wiar hi di "Jen Kārming-Fraktsjoon" fan di SSW ön Kiil.
Ön di Hārefst fan't Jaar 1969 wiar di Kraisreform. Fan 17 Kraisi ön Sleeswig-Holstiin skul 12 uur. Diarfuar wiar Bahnsen sin Stem senerlig nöörig, aurdat di regiarendi CDU/FDP-Koalitsjoon niin Stemen-Muarhair her. Di forskelig Politikern iin ön didiarem Parteien her ek al di salev Meening.
Bahnsen wil hol di trii Kraisi Eiderstedt, Hüsem en Süđertöner töhopfaatet se, en diarfuar dēr hi sin Stem. Me des Stem töhop leengti dit da uk fuar di Meening fan di regiarendi Koalitsjoon.
Üs langsen kām dit ek arkjen töpas, en sa waar uk sair, dat hi beeter ek mestemi haa skul en dat nü des Reform "fan Deenemark stöt waar". Bahnsen saag dit üđers. Hi taacht ek hol ön Grensen, hi saag di Deenen üs Naibern en Brüđern. Deling wöör em dit mesken "europeeisk" nēm.
Di 24. Aprilmuun fan 1971 fing Bahnsen dit Bundsfortiinstkrüts (Jest Klas).
Nemen heer diarme reeknet, dat Berthold Bahnsen me bluat 58 Jaaren eeđer en Harts-Infarkt stürev. Hi wiar ön't Lönsparlament di Politiker me di leengst Tiinsttir, en masi Liren höl fuul fan höm.
Berthold Bahnsen stön langsen fast fuar sin Meening, man hi kür uk masi Fortröt me Humoor üt Wārel fo, sa dat achterön nemen muar sa rocht wust, hurom en Strir nöörig wesen wiar.
Me sin Politik heer hi fuul diarfuar dönen, dat Dütsklön en Deenemark jaar Riwaliteet auriit, jam fordrai en töhopaarberi kür.
Luki uk jir
Kweli
- Prof. Dr. Thomas Steensen: Ein Wegbereiter für die Verständigung, SHZ, Insel-Bote, Siđ NF 1 fan di 8. Januwaari 2013
- Dr. Claas Riecken: Berthold Bahnsen. Friesisch-schleswigscher Landtagsmann Bräist/Bredstedt 2015.