 |
Cél articllo est ècrit en arpetan supradialèctâl / ORB lârge. |  |
La fesica est la science qu'èsseye de comprendre, de modèlisar et d'èxplicar les fenomènos naturèls de l'Univèrs. El corrèspond a l'ètude du mondo que nos entoure sot totes ses fôrmes, des louès de ses variacions et de lor èvolucion.
Ele dècrive les fôrces dedens los fenomènos naturâls.
La fesica dèvelope des reprèsentacions du mondo per l'èxpèrience qu'on pôt controlar dens un domêno de dèfinicion balyê. El fât plusiors lèctures du mondo, châcuna étent considèrâye coment prècise que tant qu'a un cèrtin pouent. La misa en modèlo des sistèmos fesicos pôt betar dedens ou nan los procèssus chimicos et biologicos.
La fesica tâla que concèptualisâye per Isaac Newton, houé apelâye fesica classica, couenciêve sur l'èxplicacion de fenomènos naturèls coma lo rayonament du côrp nêr (catastrofa ultraviolèta) ou les anomalies de l'orbita de la planèta Mèrcure, cen que posâve un rèèl problèmo ux fisiciens. Les tentatives èfèctuâyes por comprendre et modèlisar los fenomènos novéls qu'on arrevâve a la fin du XIXémo siècllo ant ravisâ en provondior lo modèlo de Newton por balyér nèssance a doux novéls ensemblos de tèories fesiques. Il ègziste donc houé três ensemblos de tèories fesiques ètablies, châcun valido dens lo bien d'aplicacions que lui est pôpro (ben que cèrtins fisiciens èstimont que les branches de la fesica s'apondont pas nècèssèrament dens yon de cetos ensemblos) :
- la fesica classica (métens fèrms, liquidos et gazox), tojorn d'actualitât, s'aplique, per ègzemplo, a la construccion des imôblos, des centrâles èlèctriques et des avans. El utilise les ancianes nocions de temps, de èspâço, de matiére et de ènèrgie tâles que dèfenies per Newton ;
- la fesica quantica (mondo microscopico des particules et des champs) s'aplique, per ègzemplo, a la tècnologie utilisâye por la produccion des composants èlèctronicos (la dioda a èfèt tunèl per ègzemplo) ou ux lasères. El sè fonde sur de novèles dèfinicions de l'ènèrgie et de la matiére, mas consèrve les ancianes nocions de temps et d'èspâço de la fesica classica. La fesica quantica at jamés étâ prêsa en dèfôt a ceti jorn ;
- la relativitât gènèrala (mondo que sè vêt a l'uely nu des planètes, des pèrtués nêrs et de la gravitât) s'aplique, per ègzemplo, a la mêsa u pouent et u trètament de l'enformacion nècèssèra u fonccionament des sistèmos GPS. El sè fonde sur de novèles dèfinicions du temps et de l'èspâço, mas consèrve les ancianes nocions d'ènèrgie et de matiére de la fesica classica, cetes doves dèrriéres étent contredétes per la fesica quantica. La relativitât gènèrala at jamés étâ prêsa en dèfôt a ceti jorn.
Il y at pas de situacion fesica corenta yô cetes doves dèrriéres tèories s'aplicont en mémo temps. Lo problèmo actuèl de la rechèrche en fesica fondamentala est donc de tentar d'unifiar cetes doves dèrriéres tèories (vêre Gravitât quantica).
Les divisions ancianes en vigor a la fin du XIXémo siècllo : mècanica, calorica, acustico, optico, èlèctricitât, magnètismo sont complètâyes ou remplaciêes per :
- la talye des èlèments de bâti u centro de la misa en modèlo : particules èlèmentères, noyôs atomicos, atomos, molèculas, polimèros, grans de matiére… ;
- los caractèros des entèraccions a l'origina des fases ou ètats de la matiére : plasma, fluido supèrcritico, gâzo, liquido, fèrm.
La fesica classica est fondâye sur des tèories de devant a la relativitât et ux quanta. El s'aplique quand :
- sêt la vitèsse est franc enfèriora a la vitèsse de la lumiére dens lo vouedo ;
- sêt la discontinuitât des nivéls d'ènèrgie est empossibla a metre en èvidence.
La fesica est nèssua avouéc les èxpèriences rèpètâyes de Galilê qu'accèpte, outre los principos et des convencions venent des schèmâs matèmaticos, que des rèsultats qu'on pôt meserar et qu'on pôt reproduire per lo èxpèrience. La mètoda chouèsia pèrmèt de confirmar ou de rejetar les hipotèsas fondâyes sur una tèorie balyêe. El dècrit de façon quantitativa et modèlise los étres fondamentals presents dens l'Univèrs, chèrche a dècrire lo mouvement per los fôrces que s'y ègzèrçont et lors èfèts. El dèvelope des tèories en utilisant l'outil des matèmaticos por dècrire et prèvêre l'èvolucion de sistèmos.