Rigmor Dam

Rigmor er fødd í Tórshavn, vaks upp í Keypmannahavn tey fyrstu árini til familjan í 1981 flutti heimaftur til Føroya. Tey búsettust í Havn, har Rigmor fyrst gekk í Venjingarskúlanum og síðan í Kommunuskúlanum, í 1991 tók hon HF-prógv úr Hoydølum.

Eftir at hava lokið læraraútbúgving frá Blaagaard Statsseminarium í Keypmannahavn í 1998, fór Rigmor í starv í Eysturskúlanum í Havn, har hon var í starvi til 2005. Síðan gjørdist hon tíðindakvinna í Miðlahúsinum, har hon einamest skrivaði fyri tíðindablaðið Sosialin. Umframt læraraútbúgvingina hevur hon lisið eitt ár á Journalistháskúlanum í Århus og eitt ár Sam.bas á Roskilde Universitetscenter.[2] Í løtuni er hon í farloyvi úr starvinum sum kunningarfólk hjá Starvsmannafelagnum. Øll árini hevur hon harumframt verið fríyrkisfólk og eitt nú virkað sum samskipari og fundarstjóri, og skrivari fyri bløð og tíðarrit.

Rigmor var virkin í Sosialistiskum Ungmannafelag á ungum árum. Hon var redaktørur á útisetablaðnum Oyggjaskeggja lestrarárini í Keypmannahavn.[2] Hon var nevndarlimur í Kvinnufelagnum í Havn 2008-2010 og aftur 2014-2015, og limur í mentanarnevnd M.A. Jacobsens árini 2004-2012.

Rigmor var fyrstu ferð vald á Ting á løgtingsvalinum 29. oktober 2011 fyri Javnaðarflokkin sum nummar fýra á listanum við 271 atkvøðum. Hon gjørdist næstforkvinna í Løgtingsins trivnaðarnevnd, limur í Mentanarnevndini og varalimur í Rættarnevndini. Rigmor varð afturvald á løgtingsvalinum 1. september 2015, hesaferð við 396 persónligum atkvøðum, ið var fjórðflest á javnaðarlistanum,[3] og 15. september gjørdist hon landsstýriskvinna í Mentamálum í stjórnini hjá Aksel V. Johannesen.

• 2011-2015 - Næstforkvinna í Trivnaðarnevndini
• 2011-2015 - Limur í Mentanarnevndini
• 2011-2015 - Varalimur í Rættarnevndini

• 2015-2019 Landsstýriskvinna í Mentamálum