| |||||
𞤬𞤭𞤩𞤮𞤪𞤢𞤤: 𞤺𞤮𞤤𞥆𞤢𞤤⹁ 𞤲𞤵𞤲𞤯𞤢𞤤⹁ 𞤴𞤵𞤪𞤥𞤮𞤲𞤣𞤭𞤪𞤢𞤤 | |||||
![]() | |||||
![]() |
𞤘𞤭𞤲𞤫 (𞤫 𞤊𞤵𞤤𞤬𞤵𞤤𞤣𞤫 𞤃𞤢𞥄𞤧𞤭𞤲𞤢⹁ 𞤂𞤢𞤺𞤭𞤲𞤫⁏ 𞤫 𞤬𞤢𞤪𞤢𞤲𞤧𞤭𞥅𞤪𞤫 𞤈é𞤨𞤵𞤦𞤤𞤭𞤹𞤵𞤫 𞤣𞤫 𞤘𞤵𞤭𞤲é𞤫) 𞤳𞤮 𞤤𞤫𞤴𞤣𞤭 𞤫 𞤀𞤬𞤭𞤪𞤭𞤳 𞤖𞤭𞤪𞤲𞤢𞥄𞤲'𞤺𞤫𞥅𞤪𞤭. 𞤖𞤭𞤲'𞤣𞤭 𞤳𞤫𞤪𞤲𞤭𞤣𞤭 𞤫 𞤤𞤫𞤴𞤯𞤫 𞤯𞤫𞥅 𞤯𞤮𞥅: 𞤅𞤢𞤪𞤤𞤭𞤴𞤮𞤲⹁ 𞤂𞤢𞤦𞤭𞤪𞤭𞤴𞤢𞥄⹁ 𞤑𞤮𞤣𞥆𞤭𞤱𞤢𞥄𞤪⹁ 𞤃𞤢𞥄𞤤𞤭⹁ 𞤅𞤫𞤲𞤫𞤺𞤢𞤤 𞤫 𞤘𞤭𞤲𞤫-𞤄𞤭𞤧𞤢𞥄𞤱𞤮. 𞤐𞤮𞥅𞤲𞤫 𞤤𞤢𞥄𞤥𞤵 𞤥𞤢𞤴𞤪𞤭 𞤳𞤮 𞤲'𞤣𞤫𞤲𞤣𞤢𞥄𞤲'𞤣𞤭 (𞤳𞤮 𞤱𞤭'𞤫𞤼𞤫𞥅 𞤳𞤢𞤣𞤭 𞤪𞤫𞤨𞤭𞤦𞤤𞤭𞥅𞤳𞤭). 𞤖𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲'𞤣𞤭𞤲 𞤳𞤮 𞤂𞤢𞤲𞤧𞤢𞤲𞤢 𞤑𞤮𞤲𞤼𞤫 𞤭𞤲𞥆𞤫𞤼𞤫𞥅⹁ 𞤖𞤮𞥅𞤪𞤫𞥅𞤶𞤮 𞤺𞤵𞤱𞤫𞤪𞤲𞤫𞤥𞤢𞤲 𞤥𞤢𞥄 𞤆𞤫𞤪𞤥𞤭𞤴𞤫𞥅 𞤃𞤭𞤲𞤭𞤧𞤼𞤭𞤪 𞤮𞤲 𞤤𞤢𞥄𞤼𞤭𞥅 𞤂𞤢𞤲𞤧𞤢𞤲𞤢 𞤑𞤵𞤴𞤢𞥄𞤼𞤫 𞤺𞤭𞤤𞤢 𞤤𞤫𞤱𞤪𞤵 𞤬𞤢𞤦𞤪𞤢𞥄'𞤭𞤤𞤵 𞥒𞥐𞥐𞥗 (𞤷𞤢𞤺𞥆𞤢𞤤 𞤥𞤵𞤪𞤼𞤭𞤼𞤢𞤤 𞤶𞤢𞤥𞤢𞥄 𞤮𞤲) 𞤸𞤢𞥄 𞥒𞥐 𞤥𞤢𞥄𞤴𞤵𞤸𞤵 𞥒𞥐𞥐𞥘. 𞤌𞤲 𞤼𞤵𞤥𞤢 𞤆𞤫𞤪𞤧𞤭𞤣𞤢𞤲 𞤂𞤢𞤲𞤧𞤢𞤲𞤢 𞤑𞤮𞤲𞤼𞤫 𞤭𞤼𞥆𞤭 𞤑𞤵𞤴𞤢𞥄𞤼𞤫 𞤱𞤢𞤼𞥆𞤭 𞤀𞤸𞤥𞤢𞤣𞤵 𞤚𞤭𞤶𞥆𞤢𞥄𞤲𞤭 𞤅𞤵𞤱𞤢𞥄𞤪𞤫.
𞤑𞤢𞤨𞤭𞤼𞤢𞤤 𞤲'𞤺𞤢𞤤⹁ 𞤫 𞤥𞤢𞥄𞤲𞤢𞥄 𞤤𞤢𞥄𞤥𞤮𞤪𞤣𞤫 𞤲'𞤣𞤫𞤲⹁ 𞤳𞤮 𞤑𞤮𞤲𞤢𞥄𞤳𞤭𞤪𞤭⹁ 𞤷𞤢'𞤫 𞤥𞤢𞤱𞤯𞤫 𞤺𞤮'𞤮 𞤳𞤮 𞤱𞤢𞤲𞤮 𞤑𞤭𞤲𞤣𞤭𞤴𞤢𞥄⹁ 𞤃𞤢𞥄𞤥𞤵𞤲⹁ 𞤂𞤢𞤦𞤫⹁ 𞤑𞤢𞤲𞤳𞤢𞤲⹁ 𞤟𞤫𞤪𞤫𞤳𞤮𞤪𞤫 𞤫𞤳𞤲. 𞤐'𞤄𞤫𞤪𞤼𞤵𞤣𞤭 𞤲'𞤣𞤭𞤲 𞤳𞤮 𞥒𞥕𞥐.𞥑𞥕𞥘 𞤳𞤥²⹁ 𞤶𞤢𞤥𞤢𞥄 𞤮𞤲 𞤲𞤮 𞤴𞤮𞤲𞤢 𞤥𞤭𞤤𞤭𞤴𞤮𞤲'𞤶𞤭 𞥑𞥑⹁𞥕 (𞥒𞥐𞥑𞥔) 𞤸𞤢𞥄 𞤧𞤢𞤨𞥆𞤮 (𞤢𞤲𞤣𞤢𞥄𞤳𞤢 𞤼𞤭𞤺𞤭 𞤼𞤭𞤺𞤭 𞤧𞤢𞤦𞤵 𞤳𞤮 𞤯𞤵𞥅𞤯𞤭 𞤫 𞤩𞤭𞤩𞥆𞤫 𞤘𞤭𞤲𞤫 𞤩𞤫𞤲 𞤣𞤮𞤺𞤭𞥅 𞤤𞤫𞤴𞤣𞤭 𞤥𞤵𞤲 𞤲'𞤣𞤭𞤲). 𞤘𞤭𞤲𞤫 𞤤𞤢𞥄𞤼𞤭𞤲𞤮 𞤳𞤢𞤤𞤬𞤢𞥄𞤲'𞤣𞤭 𞤊𞤢𞤪𞤢𞤲𞤧𞤭 𞤭𞤼𞥆𞤵𞤣𞤫 𞥑𞥘𞥙𞥘 (𞤸𞤭𞤼𞤢𞥄𞤲'𞤣𞤫 𞤲𞤢𞤲𞤺𞤫𞤺𞤮𞤤 𞤀𞤤𞤥𞤢𞥄𞤥𞤭 𞤅𞤢𞥄𞤥𞤮𞤪𞤭 𞤚𞤵𞥅𞤪𞤫𞥅) 𞤸𞤢𞥄 𞤻𞤢𞤲𞤣𞤫 𞥒 𞤮𞤼𞥆𞤮𞥅𞤲'𞤦𞤵𞤪 𞥑𞥙𞥕𞥘⹁ 𞤻𞤢𞤤𞤢𞥄𞤲'𞤣𞤫 𞤸𞤫𞤼𞥆𞤢𞥄𞤪𞤫 𞤘𞤭𞤲𞤫 𞤲'𞤣𞤫𞤲. 𞤖𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤢𞤪𞤢𞤲𞤮 𞤮𞤲 𞤳𞤮 𞤀𞤸𞤥𞤫𞤣 𞤅𞤫𞥅𞤳𞤵 𞤚𞤵𞥅𞤪𞤫𞥅 (𞥑𞥙𞥒𞥒-𞥑𞥙𞥘𞥔). 𞤍𞤫𞤥𞤲'𞤺𞤢𞤤 𞤤𞤢𞥄𞤥𞤵 𞤲'𞤺𞤢𞤤 𞤳𞤮 𞤬𞤢𞤪𞤢𞤲𞤧𞤭⹁ 𞤯𞤫𞤥𞤯𞤫 𞤤𞤫𞤰𞥆𞤭 𞤤𞤫𞤴𞤣𞤭 𞤲'𞤣𞤭𞤲 𞤳𞤮 𞤅𞤮𞥅𞤧𞤮⹁ 𞤆𞤵𞤤𞤢𞤪⹁ 𞤃𞤢𞤲𞤭𞤲𞤳𞤢⹁ 𞤑𞤭𞤧𞤭⹁ 𞤚𞤮𞥅𞤥𞤢⹁ 𞤄𞤫𞤪𞤧𞤫⹁ 𞤑𞤮𞤻𞤢𞤺𞤭⹁ 𞤄𞤢𞤧𞤢𞤪𞤭⹁ 𞤄𞤢𞤶𞤢𞤪𞤢𞤲𞤳𞤫⹁ 𞤄𞤢𞥄𞤺𞤢𞥄⹁ 𞤂𞤢𞤲𞤣𞤵𞤥𞤢𞥄 𞤫𞤳𞤲. 𞤳𞤮𞤲𞤮 𞤳𞤮 𞤯𞤫𞤥𞤯𞤫 𞤼𞤢𞤼𞤭 𞤢𞤪𞤢𞤲𞤫 𞤯𞤫𞤲 𞤩𞤵𞤪𞤫𞤼𞤫𞥅 𞤸𞤢𞥄𞤤𞤫𞥅𞤣𞤫. 𞤘𞤭𞤲𞤫 𞤸𞤭𞤲𞤮 𞤼𞤢𞤱𞤢𞥄 𞤫 𞤳𞤢𞤱𞤼𞤭𞤼𞤫 𞤤𞤫𞤴𞤯𞤫 𞤱𞤢𞤲𞤮 𞤌𞤐𞤓⹁ 𞤕𞤉𞤁𞤉𞤀𞤌⹁ 𞤓𞤀.
𞤘𞤋𞤐𞤉 𞤑𞤌𞤐𞤀𞥄𞤑𞤋𞤈𞤋: 𞤃𞤢𞥄𞤲'𞤣𞤭𞤼𞤢𞥄𞤪𞤫 𞤔𞤢𞥄𞤲'𞤦𞤢𞤪𞤫𞥅𞤩𞤫 𞤥𞤫𞤲...
𞤃𞤢𞥄𞤲'𞤣𞤭𞤼𞤢𞥄𞤪𞤫 (𞤢𞤲𞥆𞤭𞤾𞤫𞤪𞤧𞤢𞤪𞤴) 𞤬𞤢𞤴𞤩𞤫 𞤱𞤢𞤪𞤢𞤲𞤮𞥅𞤩𞤫 𞤻𞤢𞤲𞤣𞤫 𞥒𞥒 𞤅𞤭𞥅𞤤𞤮 𞤩𞤫𞤲 𞤩𞤢𞤣𞤼𞤭𞤳𞤫. 𞤚𞤢𞤱 𞤧𞤭 𞤱𞤮𞥅𞤣𞤭𞥅 𞤳𞤮 𞤱𞤢𞤴𞤤𞤭𞥅 𞤺𞤭𞤤𞤢 𞤂𞤢𞤲𞤧𞤢𞤲𞤢 𞤑𞤵𞤴𞤢𞥄𞤼𞤫 𞤼𞤮𞤯𞥆𞤢𞥄 𞤸𞤮𞥅𞤪𞤫𞥅𞤶𞤮 𞤶𞤢𞥄𞤺𞤮𞤪𞤩𞤫 𞤩𞤢𞥄𞤱𞤮 𞤲'𞤣𞤫 𞤼𞤫𞥅𞤥𞤫𞤯𞥆𞤫 𞤬𞤢𞤴𞤩𞤫 𞤱𞤢𞤪𞤢𞥄⹁ 𞤱𞤢𞤯𞤼𞤢𞥄 𞤸𞤢𞥄𞤳𞤮 𞤻𞤢𞥄𞤴𞤢𞥄𞤳𞤮؟ 𞤘𞤭𞤤𞤢 𞤘𞤭𞤲𞤫 𞤸𞤫𞤩𞤼𞤭 𞤶𞤫𞤴𞤼𞤢𞥄𞤪𞤫 𞤫 𞤸𞤭𞤼𞤢𞥄𞤲'𞤣𞤫 𞥑𞥙𞥕𞥘⹁ 𞤅𞤫𞥅𞤳𞤵 𞤚𞤵𞥅𞤪𞤫𞥅 𞤤𞤢𞥄𞤥𞤭𞥅⹁ 𞤘𞤭𞤲𞤫𞤲𞤢𞥄𞤩𞤫 𞤱𞤮𞥅𞤱𞤼𞤭 𞤼𞤮𞥅𞤻𞤫𞥅𞤣𞤫 𞤱𞤢𞤪𞤫𞥅⹁ 𞤼𞤢𞤱𞤢 𞤸𞤢𞤴 𞤸𞤵𞥅𞤲'𞤣𞤫 𞤧𞤵𞥅𞤧𞤢𞥄 𞤽𞤢𞥄𞤻𞤢𞥄𞤣𞤫. 𞤅𞤫𞥅𞤳𞤵 𞤚𞤵𞥅𞤪𞤫𞥅 𞤱𞤢𞤪𞤭 𞤳𞤮 𞤱𞤢𞤪𞤭 𞤳𞤮𞥅 𞤬𞤮𞤱⹁ 𞤩𞤵𞤪𞤩𞤫 𞤩𞤫𞥅 𞤳𞤮 𞤊𞤵𞤤𞤩𞤫 𞤼𞤮𞥅𞤻𞤢𞤲𞤮𞥅 𞤱𞤢𞤪𞤢𞥄⹁ 𞤺𞤭𞤤𞤢 𞤢𞤲𞤣𞤵𞤩𞤫 𞤪𞤫𞤱𞤭 𞤫 𞤥𞤢𞤪𞤩𞤫 𞤬𞤢𞥄 𞤫 𞤳𞤫𞤤𞤯𞤵𞤩𞤫 𞤦𞤵𞤴 𞤮 𞤱𞤢𞤪𞤭⹁ 𞤸𞤢𞥄 𞤸𞤢𞤲𞤣𞤫 𞤸𞤵𞥅𞤲'𞤣𞤫 𞤸𞤭𞤻𞤢𞥄𞤳𞤢⹁ 𞤤𞤭𞤪𞤻𞤭𞤼𞤢𞥄𞤳𞤢 𞤧𞤢𞤳𞥆𞤮 𞤺𞤮𞤯𞥆𞤮 𞤻𞤢𞥄𞤱𞤫𞥅⹁ 𞤥𞤢𞥄𞤯𞤵𞤥 𞤼𞤮𞥅𞤻𞤢𞥄𞤩𞤫 𞤴𞤮𞤩𞤭𞤼𞤫𞥅… 𞤘𞤭𞤤𞤢 𞤂𞤢𞤲𞤧𞤢𞤲𞤢 𞤑𞤮𞤲𞤼𞤫 𞤰𞤫𞤼𞥆𞤭 𞤤𞤢𞥄𞤥𞤵 𞤫 𞤸𞤭𞤼𞤢𞥄𞤲'𞤣𞤫 𞥑𞥙𞥘𞥔⹁ 𞤳𞤢𞤲𞤳𞤮 𞤳𞤢𞤣𞤭 𞤮 𞤱𞤢𞤪𞤭𞥅 𞤮 𞤼𞤮𞥅𞤻𞤭𞥅 𞤘𞤭𞤲𞤫𞤲𞤢𞥄𞤩𞤫 𞤸𞤫𞥅𞤱𞤩𞤫⹁ 𞤬𞤭𞥅𞤳𞤢𞤤𞤢 (𞤢𞤤𞤼𞤸𞤮𞤵𞤹) 𞤦𞤵𞤴 𞤴𞤫𞤶𞥆𞤭𞤼𞤭𞥅𞤲𞤮⹁ 𞤱𞤢𞤤𞥆𞤢 𞤴𞤫𞤶𞤭𞤲𞤳𞤭𞤲𞤭𞤳𞤫. 𞤌 𞤤𞤢𞤲𞤷𞤭𞥅 𞤷𞤵𞥅𞤯𞤭 𞤫 𞤳𞤮𞤯𞤢𞤲𞤯𞤫 𞤼𞤫𞥅𞤥𞤫𞤯𞥆𞤫 𞤊𞤵𞤤𞤩𞤫 𞤫 𞤲'𞤣𞤫𞤪 𞤑𞤮𞤲𞤢𞥄𞤳𞤭𞤪𞤭⹁ 𞤮 𞤪𞤢𞤯𞤭𞤳𞤫 𞤦𞤵𞤴 𞤫 𞤤𞤫𞤴𞤯𞤫𞥅𞤤𞤫 𞤥𞤵𞤥’𞤫𞤲⹁ 𞤼𞤢𞤱𞤢 𞤸𞤢𞥄 𞤶𞤮𞥅𞤲𞤭 𞤸𞤵𞥅𞤲'𞤣𞤫 𞤸𞤢𞥄𞤤𞤢𞥄𞤳𞤢… 𞤉 𞤤𞤫𞤱𞤪𞤵 𞤑𞤮𞤪𞤧𞤫 (𞤔𞤵𞤲𞤫)⹁ 𞥒𞥐𞥐𞥖⹁ 𞤮 𞤭𞤥𞥆𞤭𞤲𞤭𞥅𞤲𞤮 𞤳𞤮𞤲𞤭𞤲𞤳𞤮𞥅𞤩𞤫 𞤥𞤢𞤳𞥆𞤮⹁ 𞤩𞤫 𞤱𞤢𞤪𞤭𞥅 𞤧𞤫𞤨𞥆𞤮𞥅𞤩𞤫 𞤷𞤢𞤨𞥆𞤢𞤲𞤯𞤫⹁ 𞤸𞤢𞤴 𞤸𞤵𞥅𞤲'𞤣𞤫 𞤸𞤢𞥄𞤤𞤢𞥄𞤳𞤢 𞤬𞤭𞥅 𞤯𞤵𞤥 𞤯𞤮𞥅 𞤳𞤢𞤣𞤭…𞤀𞤱𞤢 𞤸𞤢𞤴 𞤺𞤮𞥅𞤼𞤮 𞤻𞤢𞥄𞤱𞤢𞥄𞤳𞤢. 𞤐'𞤁𞤫 𞥒𞥒 𞤅𞤭𞥅𞤤𞤮 (𞤶𞤢𞤲𞤵𞤢𞤪𞤴)⹁ 𞤲'𞤣𞤫𞥅 𞤯𞤮𞥅 𞤸𞤭𞤼𞤢𞥄𞤲'𞤣𞤫 𞤬𞤫𞤱𞤲'𞤣𞤭𞥅𞤲'𞤣𞤫⹁ 𞤳𞤮𞤲𞤭𞤲𞤳𞤮𞥅𞤩𞤫 𞤑𞤮𞤲𞤼𞤫 𞤬𞤫𞤤𞥆𞤭𞥅 𞤱𞤢𞤪𞤭𞥅 𞤸𞤫𞤣𞥆𞤫 𞥒𞥓𞥐 𞤬𞤢𞤴𞤩𞤫 𞤧𞤫𞤨𞥆𞤮𞥅𞤩𞤫⹁ 𞤸𞤢𞥄 𞤶𞤮𞥅𞤲𞤭 𞤦𞤮𞤲𞥆𞤵𞤩𞤫 𞤪𞤫𞤱𞤲𞤢𞥄𞤳𞤢 𞤫 𞤤𞤢𞥄𞤱𞤮𞤤⹁ 𞤼𞤭𞥅𞤲'𞤣𞤭𞤲𞤫𞥅 𞤲𞤵𞤲𞤯𞤢𞤤… 𞤚𞤢𞤱 𞤧𞤭 𞤯𞤵𞤥 𞤯𞤮𞥅 𞤬𞤮𞤱 𞤢𞤷𞥆𞤭𞤪𞤼𞤫 𞤲𞤭𞤸⹁ 𞤶𞤢𞤥 𞤱𞤢𞥄𞤤𞤮𞥅 𞤼𞤢𞤤𞥆𞤮𞥅؟
𞤖𞤭𞤻𞤫𞤪𞤫 (𞤭𞤲𞤩𞤫𞤧𞤼𞤭𞤺𞤢𞤼𞤭𞤮𞤲) 𞤫𞤩𞥆𞤢𞤲𞤮𞥅𞤲'𞤣𞤫 𞤱𞤢𞤯𞤫𞥅𞤣𞤫 𞤬𞤭𞥅 𞤳𞤮𞤲𞤭𞤲𞤳𞤮𞥅𞤩𞤫 𞤬𞤫𞤤𞥆𞤵𞤲𞤮𞥅𞤩𞤫 𞤱𞤢𞤪𞤭 𞤧𞤫𞤨𞥆𞤮𞥅𞤩𞤫 𞤩𞤫𞤲⹁ 𞤫 𞤤𞤫𞤱𞤪𞤵 𞤑𞤮𞤪𞤧𞤫⹁ 𞥒𞥐𞥐𞥖⹁ 𞤳𞤢𞤥 𞤫 𞤤𞤫𞤱𞤪𞤵 𞤅𞤭𞥅𞤤𞤮⹁ 𞥒𞥐𞥐𞥗⹁ 𞤪𞤫𞤱𞤲𞤢 𞤩𞤫 𞤫 𞤤𞤢𞥄𞤱𞤮𞤤⹁ 𞤻𞤢𞥄𞤱𞤢 𞤩𞤫⹁ 𞤥𞤢𞥄𞤯𞤵𞤥 𞤩𞤫 𞤼𞤭𞥅𞤲'𞤣𞤮𞥅 𞤲𞤵𞤲𞤯𞤢𞤤⹁ 𞤸𞤢𞥄 𞤶𞤮𞥅𞤲𞤭 𞤳𞤮 𞤳𞤮 𞤨𞤮𞤪𞤯𞤭⹁ 𞤧𞤢𞤦𞤵 𞤤𞤢𞥄𞤦𞤭𞤴𞤢𞤲𞤳𞤮𞥅𞤩𞤫 (𞤤𞤢𞤱𞤴𞤫𞤪𞤧) 𞤩𞤫𞥅 𞤱𞤫𞤲𞤺𞤭𞥅 𞤼𞤢𞤱𞤼𞤮𞤪𞤫𞥅𞤣𞤫 𞤥𞤢𞤩𞥆𞤫 𞤫 𞤸𞤭𞤻𞤫𞤪𞤫 𞤲'𞤣𞤫𞥅. 𞤄𞤢𞥄𞤤𞤫 𞤬𞤮𞤼𞤣𞤫𞥅𞤶𞤭 (𞤪𞤭𞤹𞤼𞤧 𞤺𞤪𞤮𞤵𞤨𞤧) 𞤲𞤮 𞤯𞤢𞤩𞥆𞤭𞤪𞤢 𞤦𞤢𞤤𞥆𞤫 𞤷𞤫𞤲𞤯𞤫 𞤬𞤮𞤱 𞤬𞤭𞥅 𞤸𞤫𞤩𞤼𞤢𞤲'𞤣𞤫 𞤼𞤮𞥅𞤻𞤢𞥄𞤩𞤫 𞤩𞤫𞤲 𞤲𞤵𞤲𞤯𞤢𞤤.
𞤘𞤮𞥅𞤥𞤵 𞤸𞤭𞤻𞤮𞥅𞤩𞤫 𞤳𞤮 𞤴𞤮𞤱𞤭𞤼𞤭𞥅 𞤫 𞤲'𞤺𞤫𞥅 𞤼𞤮𞥅𞤻𞤢𞤲𞤺𞤫 𞤼𞤮𞤯𞥆𞤢𞤲𞤮𞥅𞤥𞤢 𞤺𞤭𞤤𞤢 𞤫 𞤤𞤫𞤱𞤪𞤵 𞤁𞤵𞥅𞤶𞤢𞤤 (𞤃𞤢𞤴)⹁ 𞤳𞤢 𞤦𞤢𞤼𞤭𞤪𞤣𞤵 (𞤨𞤢𞤪𞤤𞤭𞤢𞤥𞤫𞤲𞤼)⹁ 𞤳𞤮𞤲𞤮 𞤸𞤢𞥄 𞤶𞤮𞥅𞤲𞤭 𞤩𞤫 𞤱𞤮𞥅𞤲'𞤣𞤭𞤲𞤢𞥄𞤳𞤢 𞤧𞤢𞤳𞥆𞤮 𞤩𞤫 𞤬𞤵𞤯𞥆𞤮𞥅 𞤺𞤮𞤤𞥆𞤫. "𞤃𞤫𞤲 𞤶𞤮𞤺𞤢𞥄𞤳𞤭 𞤴𞤢𞥄𞤳𞤢𞥄𞤪𞤫 𞤥𞤢𞤱𞤲'𞤣𞤫 𞤫 𞤲'𞤺𞤵𞥅 𞤺𞤮𞥅𞤥𞤵⹁ 𞤱𞤮𞤲'𞤣𞤫 𞤲'𞤺𞤵 𞤴𞤢𞤤𞤼𞤭𞤲𞤢𞤲𞤢𞤴 𞤥𞤫𞤲 𞤲'𞤶𞤫𞤴𞤼𞤵𞤣𞤭 𞤥𞤮𞤰𞥆𞤭𞤪𞤭"⹁ 𞤕𞤫𞤪𞤲𞤮 𞤃𞤢𞥄𞤶𞤵 𞤅𞤮𞤸⹁ 𞤖𞤮𞥅𞤪𞤫𞥅𞤶𞤮 𞤏𞤢𞥄𞤤𞤣𞤫 𞤘𞤭𞤲𞤫𞤲𞤢𞥄𞤩𞤫 𞤬𞤭𞥅 𞤊𞤮𞤼𞤣𞤫𞥅𞤶𞤭 𞤐𞤫𞤯𞥆𞤮 (𞤌𞤘𞤍)⹁ 𞤸𞤮𞤤𞥆𞤭 𞤯𞤵𞤥 𞤋𞤈𞤋𞤐⹁ 𞤤𞤫𞤱𞤪𞤵 𞤩𞤫𞤲𞥆𞤵𞤲'𞤣𞤵.
"𞤐𞤮 𞤱𞤮𞥅𞤣𞤭 𞤸𞤢𞤳𞥆𞤵𞤲'𞤣𞤫 𞤦𞤮𞤲𞥆𞤵𞤩𞤫 𞤩𞤫𞥅⹁ 𞤴𞤭𞤥𞤩𞤫 𞤱𞤫𞤤𞤣𞤵𞤩𞤫 𞤫 𞤩𞤫𞥅 𞤱𞤮𞤲𞤩𞤫 𞤳𞤢 𞤤𞤢𞥄𞤥𞤵⹁ 𞤳𞤮 𞤯𞤵𞤥 𞤱𞤢𞤯𞤭 𞤸𞤭𞤲𞤮 𞤧𞤢𞤯𞤼𞤭 𞤬𞤮𞤼𞤢 𞤴𞤮 𞤲𞤵𞤲𞤯𞤢𞤤 𞤲'𞤺𞤢𞤤 𞤺𞤮𞤤𞥆𞤭𞤪 𞤲𞤮 𞤸𞤢𞥄𞤸𞤭𞤪𞤭 𞤲𞤮𞤲⹁" 𞤮 𞤩𞤫𞤴𞤣𞤭𞤼𞤭. 𞤖𞤢𞤪𞤭 𞤌𞤘𞤍 𞤸𞤭𞤲𞤮 𞤧𞤢𞥄𞤼𞤭𞥅 𞤴𞤭𞥅𞤣𞤵𞤺𞤮𞤤 𞤫 𞤦𞤢𞥄𞤤𞤫 𞤬𞤮𞤼𞤣𞤫𞥅𞤶𞤭 𞤺𞤮𞥅⹁ 𞤻𞤢𞤲𞤣𞤫 𞥒𞥕 𞤔𞤮𞤤𞤢𞤤 (𞤐𞤮𞤩𞤫𞤲'𞤦𞤫𞤪) "𞤬𞤭𞥅 𞤫𞤩𞥆𞤵𞤺𞤮𞤤 𞤬𞤫𞤸𞤪𞤫 𞤤𞤮𞤥𞤼𞤮𞤼𞤮𞥅𞤲'𞤣𞤫 𞤺𞤮𞥅 𞤫 𞤸𞤢𞤩𞤢𞤺𞤮𞤤 𞤼𞤮𞥅𞤻𞤢𞤲𞤺𞤫 𞤲'𞤺𞤫𞥅"⹁ 𞤮 𞤱𞤭𞥅. "𞤅𞤭 𞤼𞤢𞤱𞤭𞥅 𞤥𞤫𞤲 𞤱𞤢𞥄𞤱𞤢𞥄𞤤𞤭 𞤸𞤫𞤩𞤵𞤺𞤮𞤤 𞤯𞤮𞥅 𞤲𞤵𞤲𞤯𞤢𞤤⹁ 𞤥𞤫𞤲 𞤴𞤭’𞤢𞤴 𞤳𞤮 𞤥𞤫𞤲 𞤱𞤢𞥄𞤱𞤢𞤼𞤢 𞤱𞤢𞤯𞤣𞤫⹁ 𞤥𞤫𞤲𞤫𞤲 𞤫 𞤺𞤮𞤤𞥆𞤭𞤣𞤫𞤼𞤫𞥅𞤩𞤫 𞤢𞤥𞤫𞤲 𞤱𞤭𞤲𞤣𞤫𞤪𞤫𞤴𞤢𞤲𞤳𞤫𞥅𞤩𞤫 𞤩𞤫𞥅⹁ 𞤬𞤭𞥅 𞤢𞤣𞥆𞤵𞤺𞤮𞤤 𞤦𞤮𞤲𞥆𞤵𞤩𞤫 𞤩𞤫𞥅 𞤳𞤢 𞤲𞤵𞤲𞤯𞤢𞤤⹁" 𞤮 𞤱𞤭𞥅. 𞤘𞤮𞥅𞤥𞤵 𞤸𞤭𞤻𞤮𞥅𞤩𞤫 𞤲'𞤺𞤵𞥅 𞤲𞤮 𞤸𞤢𞤤𞤬𞤭𞤲𞤢𞤲𞤮𞥅 𞤼𞤫𞤬𞤵𞤺𞤮𞤤 𞤢𞤲𞤣𞤢 𞤬𞤭𞥅 𞤥𞤢𞥄𞤴𞤫𞥅𞤤𞤫 𞤱𞤢𞤯𞥆𞤫 𞤳𞤢 𞤬𞤵𞤯𞥆𞤮𞤣𞤫 𞤸𞤭𞤼𞤢𞥄𞤲'𞤣𞤫 𞤯𞤮𞥅⹁ 𞤳𞤮 𞤲𞤮𞤲 𞤳𞤢𞤣𞤭 𞤬𞤭𞥅 𞤯𞤫𞤴𞤢 𞤱𞤢𞤯𞤲𞤮𞥅𞤯𞤫 𞤫 𞤤𞤫𞤱𞤪𞤵 𞤑𞤮𞤪𞤧𞤫 𞥒𞥐𞥐𞥖. 𞤖𞤮𞥅𞤪𞤫𞥅𞤶𞤮 𞤔𞤢𞥄𞤺𞤮𞤪𞤩𞤫 𞤂𞤢𞤲𞤧𞤢𞤲𞤢 𞤑𞤵𞤴𞤢𞥄𞤼𞤫⹁ 𞤭𞤲𞥆𞤭𞥅𞤲𞤮 𞤼𞤫𞤪𞤯𞤫 𞤺𞤮𞥅𞤥𞤵 𞤲'𞤺𞤵𞥅⹁ 𞤫 𞤤𞤫𞤱𞤪𞤵 𞤒𞤢𞤪𞤳𞤮𞤥𞤢𞥄 (𞤌𞤳𞤼𞤮𞤦𞤫𞤪)⹁ 𞤳𞤮𞤲𞤮 𞤺𞤭𞤤𞤢 𞤲'𞤣𞤫𞥅𞤲 𞤸𞤢𞤴 𞤬𞤵𞤧 𞤱𞤢𞤯𞤢𞥄𞤳𞤢. 𞤖𞤭𞤥𞤮 𞤤𞤵𞤼𞥆𞤭 𞤫 𞤱𞤭’𞤵𞤺𞤮𞤤⹁ 𞤺𞤮𞥅𞤥𞤵 𞤲'𞤺𞤵𞥅 𞤲𞤮 𞤱𞤢𞤺𞥆𞤭𞤯𞤭 𞤼𞤢𞤸𞤮⹁ 𞤳𞤮 𞤳𞤫𞤷𞥆𞤫𞤤. 𞤒𞤫𞥅𞤱𞤼𞤵𞤣𞤵𞤺𞤮𞤤 𞤫 𞤳𞤮𞥅𞤸𞤮𞥅𞤩𞤫 𞤤𞤢𞥄𞤥𞤵 𞤲'𞤺𞤵𞥅 𞤳𞤢𞤥⹁ 𞤬𞤭𞥅 𞤲'𞤣𞤵𞥅 𞤥𞤵𞤪𞤢𞥄𞤣𞤵 𞤶𞤮𞥅𞤲𞤭 𞤱𞤮𞤲𞤼𞤭𞥅𞤲𞤮 𞤳𞤮 𞤼𞤮𞤽𞤢𞥄. 𞤋𞤈𞤋𞤐 𞤱𞤭𞥅.
𞤔𞤮𞥅𞤲𞤭 𞤲𞤮𞤲⹁ 𞤤𞤢𞥄𞤦𞤭𞤴𞤢𞤲𞤳𞤮𞥅𞤩𞤫 (𞤤𞤢𞤱𞤴𞤫𞤪𞤧) 𞤬𞤮𞤼𞤲𞤮𞥅𞤩𞤫 𞤶𞤫𞤴𞤫𞥅𞤣𞤫 𞤳𞤢 𞤺𞤮𞥅𞤥𞤵 (𞤷𞤮𞤥𞤭𞤧𞥆𞤭𞤮𞤲) 𞤩𞤫𞥅 𞤣𞤢𞤪𞤼𞤭𞤲𞤭𞥅 𞤼𞤢𞤱𞤼𞤮𞤪𞤫𞥅𞤣𞤫 𞤥𞤢𞤩𞥆𞤫 𞤸𞤫𞥅𞤲⹁ 𞤯𞤵𞤥 𞤳𞤮 𞤬𞤭𞥅 𞤸𞤮𞤤𞥆𞤵𞤺𞤮𞤤 𞤼𞤭𞤳𞥆𞤫𞤪𞤫 𞤥𞤢𞤩𞥆𞤫 𞤫 𞤳𞤮 𞤱𞤭’𞤫𞤼𞤫𞥅 𞤶𞤢𞤤𞤳𞤭𞤼𞤫 𞤳𞤮𞤲𞤭𞤲𞤳𞤮𞥅𞤩𞤫 𞤫 𞤷𞤮𞤳𞥆𞤮𞥅𞤩𞤫 𞤬𞤫𞥅𞤱𞤣𞤫 𞤫 𞤳𞤮𞥅𞤸𞤮𞥅𞤩𞤫 𞤲𞤵𞤲𞤯𞤢𞤤 𞤲'𞤺𞤢𞤤. "𞤉 𞤲'𞤣𞤫𞤪 𞤘𞤭𞤲𞤫⹁ 𞤳𞤮𞤲𞤭𞤲𞤳𞤮𞥅𞤩𞤫 𞤩𞤫𞥅 𞤫 𞤷𞤮𞤳𞥆𞤮𞥅𞤩𞤫 𞤩𞤫𞥅 𞤬𞤮𞤱 𞤲𞤮 𞤫 𞤣𞤮𞤱 𞤴𞤵𞤩𞥆𞤮 𞤲𞤵𞤲𞤯𞤢𞤤 (𞤶𞤵𞤣𞤭𞤷𞤭𞤢𞤤 𞤧𞤴𞤧𞤼𞤫𞤥) 𞤲𞤢𞤺𞤤"⹁ 𞤄𞤵𞥅𞤦𞤢𞤳𞤢𞤪 𞤅𞤮𞤸⹁ 𞤖𞤮𞥅𞤪𞤫𞥅𞤶𞤮 𞤑𞤢𞤱𞤼𞤢𞤤 𞤂𞤢𞥄𞤦𞤭𞤴𞤢𞤲𞤳𞤮𞥅𞤩𞤫 𞤘𞤭𞤲𞤫 𞤴𞤫𞤱𞤼𞤭 𞤋𞤈𞤋𞤐. "𞤂𞤢𞥄𞤦𞤭𞤴𞤢𞤲𞤳𞤫 𞤫𞤲 𞤫 𞤻𞤢𞥄𞤱𞤮𞥅𞤩𞤫 𞤲'𞤣𞤭𞥅 𞤤𞤫𞤴𞤣𞤭 𞤸𞤭𞤲𞤮 𞤴𞤢𞤱𞤢𞥄 𞤸𞤢𞥄 𞤩𞤵𞤪𞤼𞤭⹁ 𞤳𞤮 𞤥𞤢𞥄 𞤣𞤢𞤪𞤼𞤭𞤲𞤫𞤲 𞤲'𞤺𞤵𞤲 𞤶𞤭𞤳𞥆𞤵" ⹁ 𞤮 𞤱𞤭𞥅. 𞤂𞤢𞥄𞤦𞤭𞤴𞤢𞤲𞤳𞤫 𞤫𞤲 𞤬𞤮𞤱 𞤸𞤭𞤲𞤮 𞤫 𞤲'𞤣𞤫𞤪 𞤼𞤭𞤳𞥆𞤫𞤪𞤫 (𞤧𞤼𞤪𞤭𞤳𞤫) 𞤺𞤭𞤤𞤢 𞤫 𞤬𞤵𞤯𞥆𞤮𞤣𞤫 𞤤𞤫𞤱𞤪𞤵 𞤒𞤢𞤪𞤳𞤮𞤥𞤢𞥄/𞤌𞤷𞤼𞤮𞤦𞤫𞤪⹁ 𞤬𞤫𞤱𞤲'𞤣𞤮 𞤷𞤮𞤳𞥆𞤮𞥅𞤩𞤫 (𞤨𞤮𞤤𞤭𞥅𞤧𞤭𞥅𞤩𞤫) 𞤩𞤫𞥅 𞤲𞤢𞤲𞤺𞤭 𞤺𞤮𞥅𞤼𞤮 𞤫 𞤥𞤢𞤩𞥆𞤫 𞤧𞤮𞤳𞤭⹁ 𞤼𞤢𞤱𞤭 𞤸𞤭𞤥𞤮 𞤴𞤢𞤸𞤲𞤮𞥅 𞤳𞤢 𞤳𞤢𞤧𞤮 𞤴𞤭’𞤮𞤴𞤺𞤮𞤤 𞤱𞤢𞤤𞥆𞤫𞤼𞤫𞥅𞤯𞤮 𞤥𞤢𞤳𞥆𞤮 𞤺𞤮𞥅 𞤶𞤢𞤺𞥆𞤢𞥄𞤯𞤮.
"𞤚𞤵𞤥𞤢 𞤳𞤢𞤤𞤢⹁ 𞤷𞤫𞤥𞤦𞤫 𞤳𞤭𞤧𞤢𞤤 𞤯𞤫𞥅 𞤲𞤮 𞤳𞤢𞤥𞤦𞤢𞤲𞤢 𞤥𞤫𞤲⹁ 𞤴𞤫𞤲𞥆𞤢 𞤥𞤫𞤲⹁ 𞤴𞤢𞤲𞤢 𞤫 𞤢𞤥𞤫𞤲"⹁ 𞤃𞤣. 𞤄𞤵𞥅𞤦𞤢𞤳𞤢𞤪 𞤅𞤮𞤸 𞤴𞤫𞤱𞤼𞤭 𞤋𞤈𞤋𞤐. "𞤅𞤮 𞤥𞤫𞤲 𞤱𞤢𞥄𞤱𞤢𞥄𞤤𞤭 𞤪𞤫𞤱𞤲𞤵𞤺𞤮𞤤 𞤩𞤫𞥅 𞤯𞤮𞥅 𞤫 𞤤𞤢𞥄𞤱𞤮𞤤⹁ 𞤸𞤢𞤪𞤢𞤴 𞤨𞤫𞤤𞥆𞤫𞤼 𞤺𞤮𞥅𞤥𞤵 𞤸𞤭𞤻𞤮𞥅𞤩𞤫 𞤲'𞤺𞤵𞥅 𞤱𞤢𞤯𞤢𞤼𞤢𞥄 𞤳𞤮 𞤳𞤫𞤤𞤯𞤭 𞤸𞤫𞤤𞥆𞤢 𞤳𞤢 𞤢𞤣𞥆𞤵𞤺𞤮𞤤 𞤩𞤫𞤲 𞤳𞤮𞤲𞤭𞤲𞤳𞤮𞥅𞤩𞤫 𞤩𞤵𞤪𞤩𞤫 𞤣𞤢𞤪𞤲'𞤣𞤫⹁ 𞤱𞤢𞤪𞤵𞤩𞤫 𞤧𞤫𞤨𞥆𞤮𞥅𞤩𞤫⹁ 𞤬𞤭𞥅 𞤼𞤭𞥅𞤲'𞤣𞤢𞤺𞤮𞤤 𞤲𞤵𞤲𞤯𞤢𞤤"⹁ 𞤮 𞤩𞤫𞤴𞤣𞤭𞤼𞤭. 𞤃𞤢𞤥𞥆𞤢𞤣𞤵 𞤔𞤢𞤲 𞤔𞤢𞤤𞥆𞤮 𞤥𞤮 𞤥𞤭𞤻𞤮 𞤥𞤵𞤥 𞤬𞤫𞤤𞥆𞤢𞤲𞤮𞥅 𞤻𞤢𞤲𞤣𞤫 𞥒𞥒 𞤅𞤭𞥅𞤤𞤮⹁ 𞤳𞤢 𞤧𞤫𞤨𞥆𞤵𞤪𞤵⹁ 𞤸𞤢𞥄𞤤𞤢𞤲𞤭 𞤋𞤈𞤋𞤐 𞤱𞤮𞤲'𞤣𞤫: " 𞤃𞤵𞤪𞤢𞥄𞤯𞤭 𞤳𞤢𞥄𞤲𞤢𞤴 𞤧𞤭 𞤼𞤢𞤱𞤭𞥅 𞤥𞤫𞤲 𞤸𞤫𞤩𞤢𞥄𞤤𞤭 𞤳𞤮 𞤥𞤫𞤲 𞤨𞤭𞥅𞤪𞤢𞤲𞤭 (𞤸𞤢𞤩𞤢𞤲𞤭) 𞤳𞤮𞥅" . 𞤃𞤭𞤻𞤮 𞤥𞤢𞤳𞥆𞤮⹁ 𞤀𞥄𞤥𞤢𞤣𞤵 𞤏𞤵𞥅𞤪𞤭 𞤔𞤢𞤤𞥆𞤮⹁ 𞤧𞤵𞤳𞤢 𞤥𞤮 𞤣𞤵𞥅𞤩𞤭 𞥑𞥖 𞤬𞤫𞤤𞥆𞤢𞤲𞤮𞥅𞤥𞤢 𞤬𞤫𞤱𞤲'𞤣𞤮 𞤳𞤮𞤲𞤭𞤲𞤳𞤮𞥅𞤩𞤫 𞤑𞤮𞤲𞤼𞤫 𞤩𞤫𞥅 𞤵𞤣𞥆𞤭𞤼𞤭 𞤴𞤭𞥅𞤼𞤫 𞤫 𞤧𞤫𞤨𞥆𞤮𞥅𞤩𞤫⹁ 𞤫 𞤤𞤫𞤱𞤪𞤵 𞤅𞤭𞥅𞤤𞤮 𞤲'𞤣𞤫𞥅 𞤯𞤮𞥅 𞤸𞤭𞤼𞤢𞥄𞤲'𞤣𞤫. 𞤑𞤮 𞤥𞤢𞥄𞤲'𞤣𞤭𞤼𞤢𞥄𞤪𞤫 𞤢𞤪𞤢𞤲𞤫𞤪𞤫 𞤲'𞤣𞤫𞤲 𞤱𞤮𞤲𞤭 𞤫 𞤢𞤪𞤵𞤣𞤫 𞤲𞤭𞤸⹁ 𞤺𞤭𞤤𞤢 𞤸𞤢𞤬𞤼𞤢𞥄𞤪𞤫 (𞤵𞤨𞤪𞤭𞤧𞤭𞤲'𞤺) 𞤲'𞤣𞤫𞥅 𞤱𞤢𞤯𞤭. 𞤈𞤫𞥅𞤲𞤮𞥅𞤩𞤫 (𞤮𞤦𞤧𞤫𞤪𞤩𞤫𞤪𞤧) 𞤸𞤭𞤲𞤮 𞤥𞤢𞥄𞤨𞤭𞥅⹁ 𞤧𞤭 𞤼𞤢𞤱𞤭𞥅 𞤳𞤮 𞤴𞤮𞤲𞤭 𞤺𞤮𞤤𞥆𞤢𞥄𞤳𞤢 𞤬𞤭𞥅 𞤲𞤮𞥅𞤼𞤢𞤺𞤮𞤤 𞤳𞤮 𞤲'𞤺𞤫𞤲𞤣𞤭𞤴𞤢𞤲𞤳𞤮𞥅𞤩𞤫 𞤩𞤫𞥅 𞤸𞤢𞤱𞤼𞤢𞤲𞤭𞤲𞤮𞥅 𞤳𞤮𞥅⹁ 𞤥𞤢𞥄𞤯𞤵𞤥 𞤢𞤣𞥆𞤵𞤺𞤮𞤤 𞤦𞤮𞤲𞥆𞤵𞤲𞤮𞥅𞤩𞤫 𞤩𞤫𞤲 𞤳𞤢 𞤲𞤵𞤲𞤯𞤢𞤤⹁ 𞤬𞤭𞥅 𞤧𞤫𞤨𞥆𞤮𞥅𞤩𞤫 𞤩𞤫 𞤩𞤫 𞤼𞤫𞤱𞤭𞤲𞤮𞥅 𞤨𞤢𞤧 𞤩𞤫 𞤱𞤢𞤪𞤭 𞤩𞤫𞤲⹁ 𞤧𞤭 𞤸𞤢𞤴 𞤬𞤵𞤧 𞤱𞤢𞤯𞤢𞥄𞤳𞤢⹁ 𞤸𞤭𞤲𞤮 𞤸𞤵𞤤𞤢𞥄 𞤱𞤮𞤼𞤢 𞤤𞤫𞤴𞤣𞤭 𞤲'𞤣𞤭𞥅 𞤬𞤫𞤼𞥆𞤵 𞤳𞤢𞤣𞤭.
𞤏𞤮𞤲𞤢𞤲'𞤣𞤫 𞤥𞤢𞤱𞤲𞤭𞤪𞤢𞥄𞤱𞤮 𞤀𞥄𞤥𞤢𞤣𞤵 𞤏𞤵𞥅𞤪𞤭 𞤮𞤲⹁ 𞤃𞤢𞤥𞥆𞤢𞤣𞤵 𞤔𞤢𞤥 𞤔𞤢𞤤𞥆𞤮⹁ 𞤫 𞤦𞤵𞤴 𞤫 𞤱𞤢𞤪𞤢𞤲𞤢𞤲𞤮𞥅𞤩𞤫 𞤥𞤢𞥄𞤯𞤵𞤥 𞤣𞤢𞤪𞤢𞤲𞤭𞥅𞤩𞤫 𞤲𞤵𞤲𞤯𞤢𞤤 𞤫 𞤱𞤫𞤤𞥆𞤭𞤼𞤢𞥄𞤪𞤫 𞤫 𞤲'𞤣𞤫𞤪 𞤱𞤭𞤲𞤣𞤫𞤪𞤫 𞤲'𞤣𞤫𞥅⹁ 𞤩𞤫𞥅𞤲 𞤱𞤢𞤪𞤢𞤲𞤮𞥅𞤩𞤫 𞤥𞤢𞥄𞤴𞤢𞥄𞤤𞤭 𞤥𞤫𞤸𞤪𞤫. 𞤉 𞤬𞤭𞤤𞥆𞤢𞥄𞤲'𞤣𞤵 𞤥𞤢𞤳𞥆𞤮 𞤳𞤢𞤲𞤳𞤮 𞤀𞥄𞤥𞤢𞤣𞤵 𞤏𞤵𞥅𞤪𞤭⹁ 𞤲'𞤣𞤵 𞤮 𞤬𞤭𞤤𞥆𞤢𞤲𞤭𞥅 𞤋𞤈𞤋𞤐⹁ 𞤮 𞤱𞤭𞥅: " Ny𞤢𞤲𞤣𞤫 𞥒𞥒 𞤅𞤭𞥅𞤤𞤮 𞤥𞤭𞤻𞤮 𞤢𞤥 𞤮𞥅 𞤴𞤢𞤤𞤼𞤵𞤲𞤮 𞤧𞤫𞤨𞥆𞤮𞤴𞤣𞤫. 𞤌 𞤬𞤫𞤤𞥆𞤢𞥄 𞤤𞤢𞥄𞤦𞤭 𞤯𞤭𞤯𞤭⹁ 𞤳𞤢 𞤱𞤫𞤷𞥆𞤮 (𞤦𞤫𞤷𞥆𞤢𞤤) 𞤥𞤢𞤳𞥆𞤮 𞤫 𞤳𞤢 𞤸𞤮𞤰𞥆𞤵𞤣𞤵. 𞤚𞤢𞤱𞤭 (𞤸𞤢𞤪𞤭) 𞤸𞤭𞤥𞤮 𞤫𞤼𞤢𞥄𞤣𞤫 𞤣𞤮𞤺𞤵𞤺𞤮𞤤 𞤳𞤮𞤲𞤭𞤲𞤳𞤮𞥅𞤩𞤫 𞤩𞤫𞤲⹁ 𞤳𞤮 𞤮𞤲 𞤧𞤢𞥄𞤼𞤭 𞤩𞤫 𞤬𞤫𞤤𞥆𞤭 𞤥𞤮.
"𞤊𞤫𞤱𞤲'𞤣𞤮 𞤯𞤮𞥅⹁ 𞤫𞤲 𞤱𞤭’𞤢𞤼𞤢𞥄 𞤩𞤫𞤲 𞤥𞤢𞥄𞤴𞤲𞤮 𞤥𞤫𞤸𞤪𞤫⹁ (𞤳𞤢𞤲𞤳𞤮 𞤫 𞤸𞤫𞤣𞥆𞤫 𞥒𞥓𞥐 𞤱𞤢𞤪𞤢𞥄𞤩𞤫 𞤺𞤮𞥅). 𞤃𞤢𞥄𞤴𞤣𞤫 𞤥𞤢𞤩𞥆𞤫 𞤲'𞤣𞤫𞥅 𞤢𞤣𞥆𞤢𞤲𞤭𞥅 𞤥𞤫𞤲 𞤼𞤮𞤯𞥆𞤢𞤺𞤮𞤤 𞤸𞤮𞥅𞤪𞤫𞥅𞤶𞤮 𞤶𞤢𞥄𞤺𞤮𞤪𞤩𞤫 𞤳𞤫𞤧𞤮. 𞤔𞤮𞥅𞤲𞤭⹁ 𞤧𞤭 𞤥𞤫𞤲 𞤸𞤫𞤩𞤢𞥄𞤤𞤭 𞤳𞤵𞥅𞤤𞤢𞤲𞤯𞤫 𞤯𞤫 𞤥𞤫𞤲 𞤸𞤢𞤩𞤢𞤲𞤭⹁ 𞤥𞤫𞤲 𞤨𞤭𞥅𞤪𞤢𞤲𞤭 𞤯𞤫𞤲⹁ 𞤼𞤢𞤱𞤢𞤴 (𞤸𞤢𞤪𞤢𞤴) 𞤥𞤫𞤲 𞤶𞤢𞤥𞤬𞤭𞤳𞤫 𞤩𞤫.
"𞤒𞤭𞤥𞤩𞤫 𞤩𞤫𞥅 𞤴𞤭𞤯𞤭 𞤳𞤮 𞤱𞤢𞤴𞤤𞤢𞥄𞤪𞤫 –𞤯𞤵𞤥 𞤳𞤮 𞤳𞤮 𞤸𞤭𞤼𞥆𞤭 𞤫 𞤤𞤫𞤴𞤣𞤭 𞤲'𞤣𞤭𞥅. 𞤘𞤭𞤲𞤫𞤲𞤢𞥄𞤩𞤫 𞤼𞤢𞤥𞤨𞤭𞥅 𞤳𞤮 𞤩𞤵𞤪𞤼𞤭⹁ 𞤺𞤭𞤤𞤢 𞤳𞤮 𞤲𞤫𞥅𞤩𞤭⹁ 𞤸𞤢𞥄 𞤴𞤢𞤱𞤼𞤭𞥅 𞤳𞤫𞥅𞤪𞤮𞤤⹁ 𞤺𞤭𞤤𞤢 𞤘𞤭𞤲𞤫 𞤸𞤫𞤩𞤭 𞤶𞤫𞤴𞤼𞤢𞥄𞤪𞤫. 𞤖𞤭𞤥𞤫𞤲 𞤸𞤮𞤯𞤭 𞤯𞤮𞥅 (𞤖𞤢𞤥𞤣𞤢𞤤𞥆𞤢𞥄𞤸𞤭…) 𞤫 𞤲𞤭𞤩𞤫𞤪𞤫. 𞤐'𞤁𞤢𞤴𞤺𞤵 𞤫 𞤲'𞤣𞤭𞤴𞤢𞤥 𞤸𞤭𞤲𞤮 𞤧𞤢𞤯𞤭⹁ 𞤧𞤢𞤯𞤼𞤭 𞤸𞤫𞤩𞤮𞤼𞤢𞥄𞤳𞤮.
"𞤐'𞤁𞤢𞤴𞤺𞤵 𞤸𞤫𞤩𞤭𞤳𞤫 𞤧𞤫𞥅𞤯𞤢⹁ 𞤺𞤭𞤤𞤢 𞤸𞤮𞥅𞤪𞤫𞥅𞤶𞤮 𞤶𞤢𞥄𞤺𞤮𞤪𞤯𞤫 𞤳𞤫𞤧𞤮 𞤮 𞤼𞤮𞤯𞥆𞤢𞥄⹁ 𞤩𞤵𞤪𞤭 𞤳𞤢 𞤱𞤮𞤲𞥆𞤮𞥅 𞤯𞤮𞤲 𞤤𞤢𞤱⹁ 𞤢𞤣𞤮 𞤮 𞤤𞤢𞥄𞤥𞤢𞥄𞤣𞤫⹁ 𞤲'𞤣𞤭𞤴𞤢𞤥 𞤳𞤢𞤣𞤭 𞤸𞤫𞤩𞤭𞤳𞤫 𞤧𞤫𞥅𞤯𞤢 𞤫 𞤲𞤮𞤳𞥆𞤵𞥅𞤪𞤫 𞤲'𞤣𞤫𞥅 (𞤖𞤢𞤥𞤣𞤢𞤤𞥆𞤢𞥄𞤸𞤭). 𞤀𞤪𞤢𞤲 𞤲𞤵𞤲⹁ 𞤥𞤫𞤲 𞤱𞤮𞤲𞤢𞤴𞤲𞤮 𞤴𞤮𞤲𞤼𞤫𞤪𞤫 𞤥𞤢𞥄 𞤶𞤮𞤲𞤼𞤫 𞤯𞤭𞤯𞤭 𞤼𞤢𞤱𞤢 𞤸𞤢𞤴 𞤧𞤭𞤲𞤼𞤫𞤪𞤫 𞤴𞤢𞤤𞤼𞤢𞥄𞤤𞤭 𞤫 𞤨𞤮𞤥𞤨𞤭𞥅𞤶𞤭 𞤯𞤭𞤲. 𞤑𞤮 𞤥𞤢𞥄 𞤥𞤫𞤲 𞤧𞤢𞤦𞥆𞤮𞥅 𞤫 𞤨𞤮𞤷𞥆𞤮𞤤 (𞤧𞤢𞤬𞥆𞤫𞤱𞤮𞤤) 𞤳𞤮 𞤴𞤮𞤲𞤢𞤼𞤢 𞤶𞤢𞤥𞤯𞤫 (𞤤𞤫𞥅𞤪𞤫𞥅𞤶𞤭) 𞤯𞤵𞥅𞤯𞥆𞤫 𞤫 𞤱𞤮𞤴𞤲'𞤣𞤵 𞤱𞤮𞥅𞤼𞤵𞤪𞤵⹁ 𞤥𞤢𞥄 𞤨𞤮𞤥𞤨𞤭𞥅𞤪𞤵 𞤱𞤮𞥅𞤼𞤵𞤪𞤵⹁ 𞤼𞤢𞤱𞤢 𞤳𞤮 𞤴𞤢𞤸𞤵𞤺𞤮𞤤 𞤳𞤢 𞤩𞤵𞤪𞤭 𞥕𞥐𞥐 𞤥𞤫𞥅𞤼𞤫𞤪 𞤱𞤮𞤯𞥆𞤵𞤣𞤫⹁ 𞤱𞤮𞤲𞤢𞥄 𞤸𞤢𞤴 𞤬𞤵𞤧 𞤧𞤭 𞤱𞤮𞤲𞤢𞥄 𞤸𞤫𞤦𞥆𞤭𞤲'𞤺𞤮𞤤 𞤤𞤮𞥅𞤲'𞤣𞤫 𞤱𞤮𞥅𞤼𞤫𞤪𞤫. 𞤔𞤮𞥅𞤲𞤭⹁ 𞤸𞤭𞤥𞤫𞤲 𞤸𞤫𞤩𞤢 𞤲'𞤣𞤭𞤴𞤢𞤥 𞤨𞤮𞤥𞤨𞤭 𞤦𞤢𞤤𞤯𞤫 𞤯𞤭𞤯𞤭 𞤸𞤢𞥄 𞤼𞤢𞤼𞤭 𞤫 𞤲'𞤣𞤫𞤪 𞤴𞤮𞤲𞤼𞤫𞤪𞤫⹁ 𞤻𞤢𞤤𞤢𞥄𞤲'𞤣𞤫 𞤱𞤮𞥅𞤼𞤫𞤪𞤫 𞤲𞤮 𞤩𞤭𞤧𞤮𞥅 (𞤩𞤭𞤤𞤮𞥅) 𞤸𞤢𞤳𞥆𞤵𞤲'𞤣𞤫 𞤥𞤵𞤥.
"𞤃𞤵𞤪𞤢𞥄𞤯𞤭 𞤳𞤢𞥄𞤲𞤢𞤴 𞤳𞤢𞤧 𞤳𞤢𞤣𞤭 𞤧𞤭 𞤼𞤢𞤱𞤭𞥅 𞤥𞤫𞤲 𞤸𞤫𞤩𞤢𞥄𞤤𞤭 𞤳𞤮 𞤥𞤫𞤲 𞤨𞤭𞥅𞤪𞤢𞤲𞤭 𞤳𞤮𞥅⹁ 𞤯𞤵𞤥 𞤤𞤫 𞤳𞤮 𞤳𞤫𞤤𞤯𞤭𞤲'𞤺𞤮𞤤 𞤲𞤮𞥅𞤲𞤫 𞤲'𞤺𞤵𞥅𞤪𞤲'𞤣𞤢𞤥 𞤢𞤥𞤫𞤲 𞤯𞤢𞤥.
"𞤃𞤫𞤲 𞤱𞤢𞤯𞤭𞥅 𞤻𞤢𞤤𞤢𞥄𞤯𞤫 𞤥𞤢𞤱𞤲𞤭𞤲'𞤺𞤮𞤤 𞤥𞤵𞤧𞤭𞤣𞤩𞤫 𞤢𞤥𞤫𞤲 𞤱𞤢𞤪𞤢𞥄𞤩𞤫 𞤩𞤫𞥅⹁ 𞤫 𞤲'𞤣𞤫𞤪 𞤲'𞤣𞤫𞥅 𞤯𞤮𞥅 𞤲𞤮𞤳𞥆𞤵𞥅𞤪𞤫 (𞤖𞤢𞤥𞤣𞤢𞤤𞥆𞤢𞥄𞤸𞤭)⹁ 𞤯𞤵𞤥 𞤬𞤮𞤱 𞤳𞤮 𞤬𞤭𞥅 𞤼𞤫𞤣𞥆𞤭𞤲'𞤺𞤮𞤤 𞤱𞤮𞤲𞤳𞤭𞥅𞤶𞤭 𞤥𞤢𞤩𞥆𞤫 𞤯𞤭𞤲⹁ 𞤫 𞤩𞤢𞤲𞤺𞤭𞤲'𞤺𞤮𞤤 𞤱𞤮𞤲'𞤣𞤫 𞤬𞤭𞥅𞤳𞤢𞤤𞤢 𞤩𞤫 𞤱𞤮𞤲'𞤣𞤢𞥄 𞤫 𞤢𞤥𞤫𞤲 𞤸𞤢𞤲𞤣𞤫⹁ 𞤥𞤫𞤲 𞤴𞤫𞤶𞥆𞤭𞤼𞤢𞤼𞤢𞥄 𞤩𞤫 𞤸𞤢𞥄 𞤷𞤢𞤴⹁ 𞤧𞤭𞤦𞤵 𞤩𞤫 𞤥𞤢𞥄𞤴𞤢𞥄𞤤𞤭 𞤥𞤫𞤸𞤪𞤫⹁ 𞤩𞤫 𞤥𞤢𞥄𞤴𞤢𞤲𞤭𞥅 𞤥𞤵𞤪𞤢𞥄𞤣𞤵 𞤲'𞤣𞤵 𞤲𞤵𞤲𞤯𞤢𞤤 –𞤯𞤵𞤥 𞤳𞤮 𞤬𞤭𞥅 𞤸𞤢𞤩𞤢𞤲'𞤺𞤮𞤤 𞤬𞤮𞤼𞤣𞤫𞥅𞤶𞤭 𞤢𞤥𞤫𞤲 𞤯𞤭𞥅. 𞥒𞥒 𞤅𞤭𞥅𞤤𞤮⹁ 𞤸𞤫𞤣𞥆𞤮𞤼𞤮 𞤱𞤮𞤲'𞤣𞤫 𞤻𞤢𞤤𞤢𞥄𞤲'𞤣𞤫 𞤲'𞤣𞤫 𞤴𞤫𞤶𞥆𞤭𞤼𞤫𞤼𞤢𞥄𞤳𞤫 𞤱𞤮𞤲𞤢𞤲'𞤣𞤫 𞤧𞤵𞤳𞤢𞥄𞤩𞤫 𞤘𞤭𞤲𞤫 𞤩𞤫𞤲 𞤬𞤮𞤱.
"𞤃𞤫𞤲 𞤴𞤵𞤩𞥆𞤭𞤲𞤢𞤴 𞤷𞤮𞤬𞤼𞤫 𞤨𞤭𞤲𞤫𞤴𞤢𞤲𞤳𞤮𞥅𞤶𞤫 (𞤷𞤵𞤤𞤼𞤵𞤪𞤢𞤤 𞤫𞤩𞤫𞤲𞤼𞤧) 𞤬𞤭𞥅 𞤼𞤮𞤳𞥆𞤭𞤼𞤢𞤺𞤮𞤤 𞤫 𞤼𞤫𞤣𞥆𞤭𞤲𞤮 𞤩𞤫𞥅𞤲 𞤶𞤢𞥄𞤲'𞤦𞤢𞤪𞤫𞥅𞤩𞤫 𞤱𞤢𞤪𞤢𞥄𞤩𞤫.
"𞤐'𞤘𞤵𞥅 𞤺𞤮𞥅𞤥𞤵 𞤸𞤭𞤻𞤮𞥅𞤩𞤫 𞤱𞤮𞤲𞤢𞤲'𞤣𞤫 𞤶𞤢𞥄𞤲'𞤦𞤢𞤪𞤫𞥅𞤩𞤫 𞤩𞤫 𞤳𞤮𞤲𞤭𞤲𞤳𞤮𞥅𞤩𞤫 𞤱𞤢𞤪𞤭 𞤩𞤫𞤲⹁ 𞤳𞤮 𞤥𞤢𞥄 𞤲'𞤺𞤵 𞤯𞤢𞤩𞥆𞤭𞤼𞤢 𞤩𞤫𞥅 𞤬𞤢𞤱𞤼𞤭𞥅𞤩𞤫 𞤯𞤭𞥅 𞤱𞤮𞤲𞤳𞤭𞥅𞤶𞤭 𞤥𞤵𞤧𞤭𞤣𞤩𞤫 𞤢𞤥𞤫𞤲 𞤩𞤫𞥅. 𞤖𞤭𞤩𞤫 𞤸𞤢𞥄𞤲𞤭 𞤶𞤢𞤺𞥆𞤫𞥅𞤣𞤫⹁ 𞤻𞤢𞥄𞤱𞤫𞥅 𞤩𞤫 𞤤𞤫𞤩𞤼𞤫𞥅⹁ 𞤸𞤢𞥄 𞤼𞤢𞤱𞤢 𞤳𞤵𞥅𞤯𞤫 𞤱𞤢𞥄𞤯𞤫 𞤲𞤭𞤸⹁ 𞤱𞤮𞤲𞤼𞤢𞥄 𞤱𞤢𞤯𞤼𞤵⹁ 𞤦𞤮𞤲𞤫 𞤱𞤢𞥄𞤯𞤫 𞤲𞤭𞥅 𞤦𞤮𞤲𞥆𞤫𞤼𞤢𞥄𞤳𞤫 𞤫 𞤲'𞤣𞤫𞤪⹁ 𞤱𞤮𞤲𞤢𞥄 𞤘𞤭𞤲𞤫 𞤼𞤵𞤲⹁ 𞤳𞤮𞤲𞤮 𞤳𞤮 𞤫 𞤲'𞤣𞤫𞤪 𞤤𞤫𞤴𞤯𞤫 𞤣𞤵𞥅𞤲'𞤣𞤫 𞤀𞤬𞤪𞤭𞤳𞤭 𞤲'𞤣𞤫𞥅 𞤬𞤮𞤱. "𞤑𞤮 𞤥𞤢𞥄 𞤪𞤫𞤲𞤣𞤮 𞤱𞤭𞤲𞤣𞤫𞤪𞤫 𞤲'𞤺𞤮𞥅 𞤬𞤢𞥄𞤥𞤢 𞤱𞤮𞤲'𞤣𞤫 𞤸𞤭𞤲𞤮 𞤸𞤭𞤼𞥆𞤭 𞤧𞤢𞤲𞥆𞤫 𞤲'𞤣𞤫 𞤩𞤫 𞤲'𞤣𞤢𞥄𞤪𞤢𞤼𞤢⹁ 𞤱𞤮𞤲𞤢𞥄 𞤼𞤵𞤲 𞤬𞤭𞥅 𞤧𞤵𞤳𞤢𞥄𞤩𞤫 𞤱𞤢𞤪𞤢𞥄𞤩𞤫 𞤩𞤫𞤲⹁ 𞤳𞤮𞤲𞤮 𞤳𞤮 𞤴𞤮 𞤩𞤫 𞤲'𞤣𞤢𞥄𞤪𞤵 𞤳𞤢𞤣𞤭 𞤬𞤫𞤱𞤲'𞤣𞤢𞥄𞤪𞤫 𞤧𞤵𞤳𞤢𞥄𞤩𞤫 𞤘𞤭𞤲𞤫 𞤢𞤷𞥆𞤭𞤪𞤢𞥄𞤩𞤫 𞤩𞤢𞥄𞤱𞤮 𞤩𞤫𞤲 𞤬𞤮𞤬. 𞤑𞤮 𞤥𞤢𞥄 𞤼𞤵𞤲 𞤤𞤢𞥄𞤥𞤵 𞤲'𞤺𞤵𞤲 𞤱𞤢𞤤𞥆𞤭𞤼𞤮𞥅 𞤧𞤵𞤳𞤢𞥄𞤩𞤫 𞤩𞤫𞤲 𞤬𞤭𞥅 𞤸𞤫𞤦𞤤𞤢𞤲𞤢𞤺𞤮𞤤 𞤥𞤢𞤱𞤵𞥅𞤪𞤭 (𞤬𞤵𞤼𞤵𞤪𞤫) 𞤥𞤢𞤩𞥆𞤫 𞤲'𞤣𞤭𞥅.
"𞤘𞤭𞤲𞤫 𞤵𞤣𞥆𞤭𞤼𞤭𞥅 𞤺𞤭𞤼𞤫 𞤥𞤵𞤥 𞤯𞤫𞤲. 𞥟 𞤘𞤭𞤲𞤫𞤲𞤢𞥄𞤩𞤫 𞤶𞤮𞥅𞤲𞤭 𞤲𞤮 𞤢𞤲𞤣𞤭 𞤸𞤮𞤤𞤲𞤮 𞤩𞤫 𞤱𞤢𞤯𞤭𞤪𞤼𞤢 𞤸𞤢𞥄 𞤣𞤢𞥄𞤯𞤫 𞤥𞤢𞤩𞥆𞤫 𞤯𞤫𞤲 𞤲𞤢𞤲𞤫𞥅⹁ 𞤥𞤢𞥄𞤯𞤵𞤥 𞤲𞤮 𞤩𞤫 𞤨𞤭𞥅𞤪𞤭𞤪𞤼𞤢 𞤬𞤭𞥅 𞤸𞤫𞤩𞤼𞤵𞤺𞤮𞤤 𞤬𞤮𞤼𞤣𞤫𞥅𞤶𞤭 𞤥𞤢𞤩𞥆𞤫 𞤯𞤭𞤲." 𞤖𞤮𞤲𞤯𞤵𞤥 𞤱𞤮𞤲𞤭 𞤲'𞤣𞤵𞤲 𞤧𞤫𞤨𞥆𞤵𞤪𞤵 𞤳𞤵𞥅𞤩𞤢𞤤 𞤅𞤭𞥅𞤤𞤮 𞥒𞥒⹁ 𞤫 𞤧𞤢𞤦𞤵𞥅𞤶𞤭 (𞤣𞤵𞤻𞤮𞥅𞤶𞤭) 𞤥𞤢𞤴𞤪𞤵؟ 𞤉𞤲 𞤴𞤫𞤱𞤼𞤢𞤴 𞤯𞤵𞤥 𞤫 𞤱𞤭𞤲𞤣𞤢𞤲𞤣𞤫 𞤥𞤫𞤲 𞤢𞤪𞤮𞥅𞤪𞤫⹁ 𞤲'𞤺𞤢𞤥 𞤸𞤭𞤲'𞤣𞤵 𞤴𞤮𞤲𞤭 𞤳𞤮 𞤬𞤭𞤤𞥆𞤫𞥅 𞤸𞤢𞥄 𞤤𞤵𞤼𞥆𞤢⹁ 𞤫 𞤲'𞤣𞤫𞤪 𞤣𞤢𞥄𞤪𞤼𞤮𞤤 𞤥𞤫𞤲 𞤫𞤲𞤫𞤲 𞤩𞤢𞤤𞤫𞥅𞤩𞤫⹁ 𞤱𞤮𞤲𞤢𞥄 𞤘𞤭𞤲𞤫𞤲𞤢𞥄𞤩𞤫 𞤼𞤵𞤲. 𞤒𞤮 𞤀𞤤𞥆𞤢 𞤩𞤫𞤴𞤣𞤢𞤲 𞤫𞤲 𞤶𞤢𞤥 𞤫 𞤣𞤫𞥅𞤰𞤫𞤪𞤫.