Eugenio Hermoso Martínez

Eugenio Hermoso Martínez (Frexenal dela Sierra, 26 de hebreru del 1883 - Mairil, 2 de hebreru del 1963) hué un pintol, escoltol i professol de Frexenal dela Sierra.

Eugenio Hermoso
Enhormación pressonal
Nacencia 26 de febrero de 1883
Fregenal de la Sierra (España)
Muerti 2 de febrero de 1963 (79 años)
Madrid (España)
Nacionalidá Española
Educación
Educau en Real Academia de Bellas Artes de Santa Isabel de Hungría
Enhormación profissional
Oficiu Pintol, escoltol y profesor

Biografía

Nacíu ena localidá pacensi de Frexenal dela Sierra el ventisseis de hebreru del 1883,[1][2] esmençó los sus estudius artísticus en el 1898, ena Escuela delas Bellas Artis de Sevilla. Nel 1901 se muó a Mairil, con una pensión del Ayuntamientu del su puebru Frexenal i dela Deputación de Badajós, pa siguil la su hormación ena Escuela de San Fernandu, la qual púu complemental cona assestencia al Museu del Plau comu copista i al Círculu delas Bellas Artis. Nel 1905 se hué pa Francia i Bélgica, un añu endispués pa Italia i nel 1912 pa Ingraterra. Murió en Mairil el dos de hebreru del 1963[1][2] i hué enterrau nel su puebru Frexenal dela Sierra.[2]

Correúra profissional

Hué unu delos espolichis del arti español dela primera metá del siegru XX i dela pintura costumbrista estremeña, con un pintaeru de gran ralismu dela via i costumbris dela Estremaúra d'escomiençus del siegru XX.[2] Nel 1914 s'agenció una praça de professol en Güelva, i dendi´l 1919 hata la su muerti vivió en Mairil, enque pasó los branus ena su localidá de nacencia. Por mé duna esposición nel 1934 visitó Güenus Airis. Los añus dela Repúbrica no huerun facis, i tapocu los dela Guerra Civil. El añu 1941 hué mu emportanti, pos s'agenció una cátedra ena Escuela Superiol de Pintura de Mairil i hué elegíu académicu dela Real Academia delas Bellas Artis de San Fernandu, dendi la que militó ativamenti nel defendimientu del arti tradicional.[1][2]

Correúra pistórica

Escoltura junta´l Passeu de Palma

El su recorríu espositivu s'esmençó nel Círculu delas Bellas Artis con tres de las sus obras. Nel 1904 escomençó la su prolongá avenencia conas esposiciones nacionalis delas Bellas Artis i se hizu cona Tercera Medalla por Muchacha haziendu media. La Segunda Medalla nel 1906, col su quairu La Juma, la Rifa i las sus amegas, recibíu con güena crítica por Bernardino de Pantorba.[3] Golvió a ganal el mesmu premiu nel 1908 con Rosa, i la Primel Medalla llegó nel 1917 pola su obra Ala fiesta del puebru. La su correndá se vió recompensá col concedimientu dela Medalla d'Onol ena Esposición Nacional del 1948, aondi presentó La siembra i Altar. Hermosu enfirmó tamién en muestras regionalis, comu las apreparás pol Ateneu de Badajós dendi'l 1904. Hizu una grandi esposición d'obras con trenta i ochu quairus nel Museu d'Arti Moernu de Mairil nel 1922. Tamién espusu en Badajós, Sevilla i mesmu nel su puebru Frexenal nel 1927 i otuvu la Medalla d'Oru del Círculu delas Bellas Artis nel 1926 i ena Esposición Iberu-Almericana del 1929. Nel 1942 espusu sotra ves en Badajós, devíu al su nombramientu comu Iju Prediletu dela provincia estremeña.[1][2][4]

Hué el prencipal espolichi del regionalismu dela pintura estremeña, con un assuntu populal, afabri i acríticu, nel que ressaltan los pessonagis de zagalis i zagalas i tamién las escenas costumbristas del mundu roal. Un ralismu idealizau, con anguna infrugencia impressionista, conseña la su primera etapa. Enos añus venti se procupa pol ametel angunas novedais, comu l'aparición del empelotu i temas simbolistas, peru sin trapeal la su vista tradicional dela pintura. Dexó numerosus autorretratus i hizu tamién anguna obra de retratu escoltóricu[1].

La muança artística más notoria hué ena década del 1950, quandu pintó una tandalá de quairus chiqueninus, col nombri de Francisco Teodoro de Nertóbriga,[5] sina entención de esponel-lus i concibía quasi comu un desahogu pessonal, enos que denuncia el poel delos críticus d'arti i alamenta'l rumbu dela pintura contemporánea. Acetandu los agarris delas pinturas i gravaus de Goya, los sus pessonagis se muan a grotescus i satíricus, i el estilu muchu mas espressionista.[1]

Correúra escreviora

Dexó escrevía una larga autobiografía, qu'és una mu valorosa huenti pa conocel la su trayetoria i mentalidá i la escrevió col nombri F. T. de Nertóbriga,[5] que hazi referimientu a un assentaeru romanu cercanu a Frexenal. Sedría sacau col nombri de Vida d'Ugeniu Hermosu, i enfirmau col nombri de Francisco Teodoro de Nertóbriga, Mairil, Edicionis Castilla, nel 1955.[2]

Hizu tamién angunus trebajus d'escreviúra comu'l Discussu de Receción ena Real Academia delas Bellas Artis de San Fernandu, Mairil, Real Academia delas Bellas Artis de San Fernandu, nel 1941.[2][4]

Obra

  • Muchacha haziendu media, nel 1903.[1][2]
  • Fiesta infantil, nel 1905.[1]
  • La Juma, la Rifa i las sus amegas, nel 1906.[1][2][4]
  • El señó Felicianu, nel 1907.[1]
  • Rosa, nel 1908.[1][2][4]
  • Ala fiesta del puebru, nel 1916.[1][2][4]
  • Arcadia, nel 1923.[1]
  • Inconcencia, nel 1924.[1]
  • Lavanderas estremeñas, nel 1926.[2]
  • Tierra, Fauna i Frora, nel 1931.[2][4]
  • La siembra, nel 1947.[2][4]
  • Prisión i muerti dela pintura, 1950-1960.(escoja de trebajus).[2]

Premius i reconocencias

  • Tercera Medalla delas Bellas Artis por Muchacha haziendu media, nel 1904.[1][2]
  • Segunda Medalla delas Bellas Artis por La Juma, la Rifa i las sus amegas, nel 1906.[1][2][4]
  • Segunda Medalla delas Bellas Artis por Rosa, nel 1908.[1][2][4]
  • Primel Medalla delas Bellas Artis por Ala fiesta del puebru, nel 1917.[1][2]
  • Medalla d'Oru del Círculu delas Bellas Artis, nel 1926.[1][2][4]
  • Medalla d'Oru ena Esposición Iberu-Almericana, nel 1929.[1][4]
  • Nombramientu en Badajós comu Iju Prediletu dela provincia estremeña, nel 1942.[2]
  • Medalla d'Onol ena Esposición Nacional por Altar i La siembra, nel 1948.[2][4]
  • El Círculu delas Bellas Artis de Mairil le hizu una esposición endispués de moril, nel 1964.[2][4]
  • La Real Academia delas Bellas Artis de Santa Isabel d'Ungría en Sevilla le hizu sotra esposición, nel 1967.[2]
  • El Museu delas Bellas Artis de Badajós le hizu tamién un omenagi con una mostración antológica, nel 1999.[2]

Referencias

  1. «Eugenio Hermoso Martínez | Real Academia de la Historia». dbe.rah.es. Consultado el 2 de marzo de 2023.
  2. «Eugenio Hermoso – Fundación Eugenio Hermoso». Consultado el 2 de marzo de 2023.
  3. «Diputacion de Badajoz».
  4. | (26 de julio de 1983). «Eugenio Hermoso (Fregenal de la Sierra, 1883 - Madrid, 1963)». fregenal. Archivado desde el original el 11 de marzo de 2023. Consultado el 10 de marzo de 2023.
  5. «YACIMIENTO ARQUEOLÓGICO DE NERTÓBRIGA». turismo.fregenaldelasierra.es. Consultado el 14 de marzo de 2023.

Biblografía

  • Vida d'Ugeniu Hermosu, col nombri de Francisco Teodoro de Nertóbriga, Mairil, Edicionis Castilla, nel 1955.
  • Discussu de Receción ena Real Academia delas Bellas Artis de San Fernandu, Mairil, Real Academia delas Bellas Artis de San Fernandu nel 1941.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.