Zizur

Zizur Iruñerriko gune metropolitarraren hego-mendebaldean dago, Nafarroa erdialdean, eta Iruñetik 10 kilometrora.

Mugakideak hauek dira: iparraldean Oltza Zendea, Barañain eta Iruñea; ekialdean Galar; hegoaldean, Izarbeibarko Ukar, Uterga, Adios, Legarda eta Gares; eta mendebaldean, Zabaltza eta Etxauri.

Zizurko klima, azpimediterraniar motakoa da, urteko batez besteko tenperatura 10 eta 13 gradu artekoa eta prezipitazioak 1.000 eta 1.400mm bitartekoak dira. Uda garaian, bi hilabete lehor izaten dira, uztaila eta abuztuan, eta urteroko euri egunak 100-120 inguru izaten diren arren, udaberri eta udazkenean izaten dira ohikoen.

Jatorrizko landaredia, arte eta haritzez osatutako basoa, ia erabat desagertu da gaur egun, eta orokorrean, nekazaritzarako pobreagoak diren lurretan bakarrik kontserbatu da. Udalerriaren baso azalera gehiena, birlandaturiko pinudiek osatzen dute (396 hektarea pinu beltz eta Austriatik ekarritako pinu lariziarra batez ere).

Zizur ondoko herri hauek osatzen dute: Astrain, Baternain, Gatzolatz, Larraia, Muru Astrain, Sagues, Undio, Zarikiegi eta Zizur Txikia. Eriete eta Gendulain ere zendeako beste herriak dira, baina berriki hustu ziren.

Zizur Nagusia, Barañain, Eultza eta Etxabakoitz ere Zizur Zendeako herriak izan dira baina azken hamarkadetan udalerrian aldaketak suertatu dira:

• Etxabakoitz 1953 arte zendeako herria zen; geroztik Iruñeko auzoa da.
• Barañain udalerria 1984an sortu zen, herri honek Iruñearen gerizpean pairatu zuen transformazio izugarria dela medio. Eultza herriska ere udalerri berrian sartu zen eta bere urbanizazio berriaren barruan integratu da.
• Zizur Nagusia 1992an bereizi zen; kasu honetan ere azken urteetan biztanleria asko handitu da.

Zendeako herriburua Gatzolatz da, bertan ere udaletxea dagoelarik.

Herriak

Herria	Biztanleria (2011)	Koordenadak	Distantzia	Mapa
Astrain	375		5,7	Astrain Zizur Txikia Eriete Gatzolatz Gendulain Larraia Muru Astrain Baternain Sagues Undio Zarikiegi
Zizur Txikia	2.113	42°47′11″N 1°40′38″W	4,3
Eriete	1	42°47′16″N 1°46′16″W	5,8
Gatzolatz	140	42°47′31″N 1°43′04″W	0
Gendulain	0	42°45′47″N 1°43′01″W	8,2
Larraia	61	42°46′36″N 1°45′54″W	4,6
Muru Astrain	63	42°45′59″N 1°44′30″W	4,6
Baternain	344	42°47′04″N 1°44′41″W	2,5
Sagues	29	42°47′06″N 1°43′25″W	1,5
Undio	194	42°45′29″N 1°45′52″W	7,7
Zarikiegi	179	42°44′54″N 1°43′22″W	7,7
Guztira	3.499			Herriburua. Kontzejua. Auzunea.
Iturriak: Espainiako Estatistika Institutua eta Google Earth

Gendulain, Zizur Zendeako kontzeju hustua da gaur egun. Antzinako jauregiaren arrastoak baino ez dira geratzen bertan. 2005. urtean Nafarroako udalak bertan hiri berri bat eraikitzeko asmoa erakutsi zuen, 1960ko hamarkadan Barañain, Burlata eta Iruña inguruko hainbat herriren eraikuntzarekin egindakoa errepikatu nahian.

Hasierako plangintzaren arabera 15.000 etxebizitza ziren eraiki beharrekoak. 2006. urtean behin-behineko plangintza aurkeztu eta gero, etxebizitza kopurua 18.000ra igo zen. Ondoren, Iruñeko tranbiaren proiektua aurkeztu eta gero, tranbia Gendulainera eramango zela esan zen. Lehen etxebizitzak 2009. urtean eraikiko zirela uste bazen ere, proiektua bertan behera gelditu zen higiezinen burbuilaren leherketarengatik eta honen ondorioz etorri zen krisialdi ekonomikoarengatik. Ordutik gobernuak ez du proiektua berriz martxan jartzeko nahirik adierazi, Etxabakoitzeko eta Kordobilako hirigintza planei lehentasuna emanez.

Zendearen hegoaldean, Zarikiegi eta Undio kontzejuetan, Erreniega mendilerroan, EHN enpresak eraikitako parke eolikoa dago. Instalaturiko potentzia 20,30 megawattekoa da. Parkearen jabea Acciona da gaur egun.

Zizur Zendeako alkatea UPNtik gertu dagoen Agrupación Independiente Cendea de Zizur (AICC) zerrendako José Ricardo Pérez Torrano atera zen 2007ko udal hauteskundeetan. Udaleko hamaika zinegotzietatik zazpi lau lortu zituen, eta hortaz gehiengo absolutua udalean. Baliogabeko botoak 9 izan ziren (emandako guztien %0,63a) eta zurizko 54 boto izan ziren (botoen %3,63a). Abstentzioa %20,76koa izan zen.

2011n lehen aldiz zerrenda aurkeztu zuen UPNk (5 zinegotzi) irabazi zuen; emaitzetan hori AICCk (7tik 2ra jaitsiz) pairatu zuen. UPNko José Joaquín San Martín Murillo alkate bihurtu zen. Erreniega ezkerreko hautesle taldeak (2), NaBai 2011k (1) eta PSNk (1) ere ordezkaritza lortu zuten, ez ordea PPk. UPNz beste talde guztiek AICCko Josetxo Pérez Torranori botoa emateko saiakerak porrot egin zuen[4]. Pérez Torrano Zizur Nagusia bereizi zenetik 2011 arte udalerriak izan duen alkate bakarra izan da[5].

Zendeako udaletxeak hainbat kokagune desberdin izan ditu historian zehar. Gaur egun, Gatzolazen dago, kontzejuko elizatik gertu. Zendeako armarria duen balkoidun fatxadako eraikin erromanikoa da.

Udaletxea alkatea eta hamar zinegotzik osatzen dute.

• HELBIDEA: Andre Mariaren kalea, 1 (Gatzolatz kontzejua)

• Zendeako eguna, ekainaren 14tik ekainaren 15era ospatzen dira..
• Larraiako jaiak, ekainaren 6tik ekainaren 8ra ospatzen dira.
• Baternaingo jaiak, maiatzaren 30etik ekainaren 1era ospatzen dira.
• Zarikiegiko jaiak, ekaineko hirugarren asteburuan ospatzen dira.
• Muru Astraingo jaiak, abuztuaren 1etik abuztuaren 3ra ospatzen dira.
• Zizur Txikiko jaiak, iraileko lehen asteburuan ospatzen dira.
• Gatzolazko jaiak, irailaren 4tik irailaren 6ra ospatzen dira.
• Undioko jaiak, iraileko hirugarren asteburuan ospatzen dira.
• Astraingo jaiak, iraileko azken asteburuan ospatzen dira.

Pazko astelehenean antolatzen da, eta zendeako herri guztiek hartzen dute parte.