Xabier García Ramsden

Nafarroako Unibertsitatean Kazetaritza ikasten hasi zen 2001ean, eta 2005ean lizentziatu zen.[1] 2003-2004 denboraldian La Burunda saioa aurkeztu zuen Radio Vitorian, unibertsitateko estudioetatik.[2] Ikasketak burutu bitartean Nafarroako Unibertsitateko Irratian (Radio UNAV) ere aritu zen, besteak beste, Aula Reservada saioan.

2004an Radio Euskadin lanean hasi zen.[3] Forum irratsaioan aritu ondoren, 2011ra arte goizeko Boulevard albistegian egin zuen lan, Dani Álvarezen ordezko gisa. 2011ko martxoan Ganbara, politika eta gaurkotasunari buruzko iluntzeko irratsaioa, zuzentzera igaro zen, Ainara Torreren lekua hartuta.[4] 2016ko ekainean Radio Euskaditik kaleratua izan zen.[5]

2016ko irailean, hainbat proba gainditu ondoren, EITBk berriz kontratatu zuen telebistan lan egiteko. 2016ko irailaren 5etik aurrera iluntzeko Teleberri albistegiaren edizioa aurkeztu zuen ETB2n.[6] Bestalde, Ganbara irratsaioko tertulia atala gidatu zuen 2016-2017 denboraldian.[7][8] 2017ko martxoan irratsaioaren 30. urteurreneko saio berezia aurkeztu zuen, Sonia Hernandorekin batera.[9][10] 2018ko ekainean utzi zuen Ganbara.[11] 2017-2018 denboraldian hainbat erreportaje aurkeztu zituen 360º saioan.[12][13]

2018-2019 denboraldian asteburuko Teleberri aurkeztera igaro zen, editore lanak ere hartuta.[14][15] Albistegiak aurkeztu zituen tartean hauteskunde saioak, politikariei elkarrizketak eta hauteskunde debateak aurkeztea ere egokitu zitzaion.[16][17] 2021ean Boulevard irratsaioko gidaria izango zela iragarri zen (Miriam Duquerekin batera), Ander Arzaken lekua hartuz.[18] Martxoaren 14an azken albistegia aurkeztu zuen ETB2n.[19] Apirilaren 12an hasi zen Boulevard aurkezten Radio Euskadin.[20]

Algortan bizi da.[21] 2020an Euskaraldian parte hartu zuen, belarriprest rolean.[22]