Txikipedia:Klimograma

Klimograma edo diagrama klimatikoa grafiko mota bat da, halako leku batean denbora-tarte jakin batean (urtean normalean) izandako prezipitazioak eta tenperaturak adierazteko erabiltzen dena; normalean, urteko hil bakoitzean batez beste izandako datuak ematen dira.

Donostiako klimograma.

Artikulu honetako grafikoan, barra urdinek hil bakoitzeko batez besteko prezipitazioa adierazten dute, marra berdeak batez besteko tenperatura, eta marra gorriak eta urdinak, berriz, tenperatura maximoa eta minimoa, hurrenez hurren. Klimogramek leku bateko klima nolakoa den erakusten digute.

Klimograma nola egin

Orri kuadrikulatu bat erabiliz, honako hau egin behar da:

Ardatz horizontal bat marraztu eta bi ertzetan bi lerro bertikal egin.
Ardatz horizontalean, urteko hamabi hilak markatu.
Ezkerreko ardatz bertikalean, tenperaturen eskala markatu. Tenperatura-balioak gradu zentigradotan doaz, normalean bosnaka; adibidez: -5, 0, 5, 10, 15, 20, 25, 30...
Eskuineko ardatz bertikalean, prezipitazioen eskala markatzen da, normalean hamarnaka ur milimetrotan, positiboan beti: 0, 10, 20, 30...
Diagramak adierazten duen lekuan izandako prezipitazioari eta tenperaturari buruzko datuak puntu bidez markatzen dira grafikoan.
Prezipitazioak barren bidez adierazten dira.
Tenperaturak, berriz, marra jarraitu bat eginez adierazten dira, hil bakoitzeko puntuak elkartuz.

Klimogramak nola ulertu

* Tenperatura adierazten duen marra ikusita, urtean zehar izandako aldaketekin (gorabeherekin) honako ondorio hauek atera ahal dira:

Tenperatura altu eta egonkorrak baditu, leku horretako klima beroa da.
Tenperatura-aldaketa badaude urtaro batetik bestera urtean zehar, leku horretako klima epela da.
Tenperatura baxuak baditu, klima hotza da, mendikoa. Oso baxuak badira, polarra edo mendialdeko klima.

* Prezipitazioak adierazten dituzten barrak ikusita, honako ondorioak atera daitezke:

a) Klima beroaren kasuan:

Prezipitazioak egonkorrak badira, klima ekuatoriala da.
Urtaro bat lehorra bada, klima tropikala da.
Ia prezipitaziorik ez badago, basamortuko klima da.

b) Klima epelaren kasuan:

Prezipitazioak urte osoan gertatzen badira, klima ozeanikoa da.
Uda lehorra bada, klima mediterraneoa da.
Prezipitazioak urriak badira eta udan gertatzen badira, klima kontinentala da.

c) Klima mendiko edo polarraren kasuan:

Prezipitazioak ugariak badira, mendiko klima da.
Prezipitazioak urriak badira, klima polarra da.

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.