Txikipedia:Burdin Aroa

Burdin Aroa historiaurreko garai bat izan zen; jendea burdinazko lanabes edo erreminta eta armak erabiltzen hasi zen garaia, hain zuzen. Denborari begiratzen badiogu, ordea, Burdin Aroa ez zen mundu osoan garai berean hasi ez eta bukatu ere; adibidez, lehenengo Burdin Aroa ziur aski Ekialde Hurbilean eta Europako hego-ekialdean gertatu zen, gutxi gorabehera K.a. 1200. urte inguruan.

K.a. V edo IV. mendeko ezkutu zeltiberiar baten ardiko babeserako erdian jartzen zuten brontzezko pieza. Ezkutua bera egurrezkoa izango zen.

Eta Burdin Aroa baino lehenago?

Burdin Aroaren aurreko garaia Brontze Aroa deitzen duguna da eta Metal Aroaren azken garai da. Metal Aroaren aurretik, Harri Aroko herriek harrizko erreminta eta armak egiten zituzten. Metal Aroan ordea, metalezko objektuak egiten ziren, hasieran kobrezkoak eta geroago brontzezko lanabes edo tresnak egiten ikasi zuten; brontzea eztainu eta arteko nahasketa da. Kobrearen garaiari Kobre Aroa edo Kalkolitoa esaten zaio eta brontzea erabiltzen ikasi zuren garaia Brontze Aroa izenez ezagutzen dena. Burdin Aroa hasi zen jendeak burdina lortzen ikasi zuenean arroketatik hartuz eta su oso oso beroa erabiliz. Burdina brontzea baino hobea zen erremintak eta armak egiteko, gogorragoa zelako.

Zer gertatu zen Burdin Aroan?

Burdina harritik atera eta burdinazko erremintak egiteko jakin beharrekoak oso azkar zabaldu ziren. Turkian asmatu zuten burdina lantzeko teknika, eta ondoren Ekialde Hurbilera, Antzinako Egiptora eta Greziara hedatu ziren. Gero, Burdin Aroa Mendebaldeko Afrikara zabaldu zen, baita Europako iparraldera, Indiara eta Ekialdeko Asiara ere. Australia eta Amerikan ez zen Burdin Arorik egon; lurralde haietara, kolono europarrek eraman zuten burdina, urte asko geroago.

Burdina erabili ahal izateak aldaketa garrantzitsuak eragin zituen gizakion bizitzan. Jendeak tresna gogorrak egiteko erabiltzen zuen burdina, eta horrek asko erraztu zuen nekazari-lana, adibidez. Soldaduen armada handiak ere azkar hasi ziren burdinazko armak erabiltzen; arma horiek zituztenek askoz errazago lortzen zuten garaipena gerran eta horrela, leku askotan, armada horiek beste lurralde batzuetara bidaiatzen hasi ziren, nahi zituzten lurrez jabetzeko.

teknologian ere aldaketa handiak gertatu ziren Burdin Aroan: jendeak zubiak eta gotorleku handiak eraiki zituen; eltzegintza eta ehungintza hobetu ziren. Gizakiek meategi oso sakonak zulatu zituzten lurrean gatza eta beste mineral baliotsu batzuk aurkitzeko.

Noiz amaitu zen Burdin Aroa?

Burdin Aroa historiaurreko azken garaia da, hau da, gizakiok garai horretan oraindik ez genuen idazten; beraz, Burdin Aroa idazkera zabaltzen hasi zenean amaitu zen. Hala ere, burdina metal garrantzitsuena izan zen XIX. mendera arte. Jendeak askotan burdina beste material batzuekin nahasten zuen, indartsuagoa izateko; gero, XIX. mendean, hori bera egiteko modu errazagoak topatu zituzten. Horri esker, altzairua sortu zen, burdina eta karbonoarekin egindakoa, eta gehien erabiltzen zen metala da geroztik.

Burdin Aroko irudiak

Burdin Aroko irudiak
Okabeko harrespila, Nafarroa Beherean
Burdin Aroko etxea barrutik
Eskoriatzan aurkitutako ontzia
Burdin Aroko armak
Burdin Aroko kaskoa

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.