The Breakfast Club

The Breakfast Club
Jatorria
Argitaratze-data	1985
Izenburua	The Breakfast Club
Jatorrizko hizkuntza	ingelesa
Jatorrizko herrialdea	Ameriketako Estatu Batuak
Banatze bidea	eskatu ahalako bideo
Ezaugarriak
Genero artistikoa	teen film (en) , komedia dramatikoa, sarbide-bizipena eta film dramatikoa
Iraupena	93 minutu
Kolorea	koloretakoa
Deskribapena
Honen parte da	National Film Registry (en)
Zuzendaritza eta gidoia
Zuzendaria(k)	John Hughes
Gidoigilea(k)	John Hughes
Antzezlea(k)
	Emilio Estevez ; Molly Ringwald ; Ally Sheedy ; Anthony Michael Hall ; Judd Nelson ; Paul Gleason (en) ; John Kapelos ; John Hughes
Ekoizpena
Ekoizlea	John Hughes; Ned Tanen (en) ; Michelle Manning (en)
Konpainia ekoizlea	Universal Studios
Edizioa	Dede Allen (en)
Bestelako lanak
Musikagilea	Keith Forsey
Argazki-zuzendaria	Thomas Del Ruth
Fikzioa
Kontakizunaren tokia	Chicago

The Breakfast Club (euskaraz Gosariaren Elkartea) 1985eko John Hughes estatubatuar zinema zuzendariak zuzendutako nerabe drama-komedia filma bat da. Emilio Estevez, Paul Gleason, Anthony Michael Hall, John Kapelos, Judd Nelson, Molly Ringwald eta Ally Sheedy aktoreek antzeztu zuten.

Kritikari askoren arabera institutu garaiko eta nerabezaroari buruzko inoizko filma onenetakoa omen da, Hughesen filma nabarmenetakoa ere bada. Nerabezaroko estereotipo edo rol, kezka, beldur, ardura, etorkizuneko amets, ilusio, itxaropen, adiskidetasun, amodio, frustrazio eta arazo ezberdinetan sakontzen da.

Urteen poderioz kultuzko filma bilakatu da, estatubatuar hedabideek filmako bost nerabeak antzeztu zituzten aktore taldeari "The Brat Pack" (literalki, “Mukizu Koadrila”) deitzen diote.

Argumentua

1984ko martxoaren 24a, larunbata, arratsaldeko 19:00ak. Chicago hiriko Shermer auzunean dagoen institutuko bost ikasle arrazoi ezberdinengatik bertako liburutegian egotera zigorturik daude. Bost ikasleak honako hauek dira: Allison Reynolds (Ally Sheedy) neska ixil eta barnerakoia, Andrew Clark (Emilio Estevez) kirolaria, John Bender (Judd Nelson) makarra errebeldea, Brian Johnson (Anthony Michael Hall) buruargi eta jakintsua, eta Claire Standish (Molly Ringwald) neska eder eta xaloa, ondorioz, berez izaera nahiz bizimoduz elkarren artean batere ikustekorik ez duten nerabeak. Zigorraldian institutuko Richard Vernon (Paul Gleason) zuzendari ordearen zaintzapean egongo dira.

Zigorraren hasieran elkarrekin ez mintzatzea agindu zaie, ezta bertatik mugitu edota lo egitea ere. Liburutegi barnean zortzi ordu eta berrogeita hamalau minutuz egotera zigortuak daude (arratsaldeko 19:06etatik goizeko 4:00etara gau pasa eginez). Epe horren barnean, ikasleek gutxienez 1000 hitz izango dituen idazlan bana idatzi beharko dute, honetan euretako bakoitzak bere burua nor uste duten dela aipatu beharko dute. Vernon jaunak zigorra irauten duen denbora gehienean zaintzarik gabe eta liburutegian giltzapean eta bakarrik lagako ditu, noizbehinka zer moduz dauden ikusteko bertaratuz. Bender lotsagabeak Vernonekin harreman txarra du, arauei muzin egin eta ikaskideez aisa trufatzen da, gainera Claireri proposamen lizunak egingo dizkio. Allison aldiz, modu bitxian lasai dago eta ez du inorrekin hitzegin nahi. Orduak igaro hala, bakoitzak bere burua ireki, mintzatzen hasi eta elkarren artean harreman berezia sortuko da.

Zigortuek orduak era ezberdinetan igaroko dituzte, Benderrek liburutegitik inork ikusi gabe ateratzea lortu eta bere aldagelatik eskuratuko dien marihuana errez, txistuka, marraztuz, euren bizitzaz solastuz edota soilik lo eginez. Pixkanaka-pixkanaka batak-besteari bihotzak ireki eta beren sekretu ezkutukoenak azalduko dizkiete, tartean zigortuak izateko bakoitzari leporatu dizkieten arrazoiak. Adibidez, Allison gezurti hutsa da, Bender sozialki marjinatua eta desorekatua dagoen familia bateko senidea da, Andrewk bere aita gorrotatzen du, bere semearen iritziari jaramonik egin gabe, nola edo hala ohiko kirolari eta irabazlea izan dadin etengabe bultzarazten baitu, Claire bere birjintasunaz lotsatzen da, eta Brian buruargia izanik ikasketak nota bikainekin gainditzeko presio izugarriaren ondorioz zenbaitetan bere buruaz beste egitea serioski pentsatzera ere iritsi da. Modu honetan bost ikasleek euren gurasoekin harreman gatazkatsuak dituztela ohartuko dira. Halere, zigor epean sortu berri den elkarren arteko ustekabeko adiskidetasun berri hau, itxialdia amaitu eta bakoitza bere eguneroko bizimodura itzultzean amaituko dela pentsatzen dute, alegia, haien artean sortutako lotura estua larunbata horretatik eta liburutegitik haratago ez dela joango.

Taldeko gainontzekoek hala eskatuta, Brianek aurretik Vernon jaunak eskatu dien idazlana denen izenean idatziko du, baina zuzendari ordeak eskatutako gaiari buruz idatzi beharrean, maisuari nortzuk diren deskribatzeari ukatzen dioten idazlana idatziko du, Vernonek bost nerabeak aurrez bost estereotipoetara mugatu nahi dituela uste baitute. Idazlanaren amaieran "The Breakfast Club" edo "Gosariaren Elkartea" sinatuz.

Izena	Aktorea	Deskribapena	Zigorraren arrazoia
Claire Standish	Molly Ringwald	Printzesatxoa: Institutuan neska aski ezaguna, aitatxo eta amatxok ongiegi eta kotoi artean hezitua, nahi duena eskura du, bere familia aberatsa baita	Moda dendetan erosketak egiteko asmoz institutuko klaseetatik piper egitea
Andrew Clark	Emilio Estévez	Kirolaria: Institutuko borroka taldeko kidea	Ikaslekide baten "koskabiloak" esparadrapoz biltzea
Brian Johnson	Anthony Michael Hall	Garuna: Ohiko institutuko adimen bikaineko ikasle buruargia	Ezkutuan institutuan bengaladun pistola sartzea, istripuz bere aldagelan lehertu eta kalte txikiak eraginez
John Bender	Judd Nelson	Kriminala: ohiko nerabe kinki edo makarra. Institutuan bereak eta bi egiten dituen liskarzalea	Institutuko suteen aurkako alarma martxan jarri eta ikasle eta maisu guztiei larrialdia sortaraztea, filma aurrera doan heinean, Bender berak maiz zigortzen dutela ulertzera ematen du
Allison Reynolds	Ally Sheedy	Kasu klinikoa: neska desegokitua, bitxia eta gezurti hutsa	Ez zuen beste egitekorik

Aktoreak

Emilio Estevez: Andrew "Andy" Clarke, "kirolaria"
Paul Gleason: Richard "Dick" Vernon, institutuko zuzendari ordea
Anthony Michael Hall: Brian Ralph Johnson, "garuna"
Judd Nelson: John Bender, "kriminala"
Molly Ringwald: Claire Standish, "printzesatxoa"
Ally Sheedy: Allison Reynolds, "kasu klinikoa"
John Kapelos: Carl Reed, institutuko atezaina
Ron Dean: Clarke jauna
Mercedes Hall: Johnson andrea
John Hughes (krediturik gabe): Johnson jauna
Mary Christian: Brianen arreba
Tim Gamble: Standish jauna
Perry Crawford: Reynolds jauna
Fran Gargano: Reynolds andrea

Kanpo estekak

The Breakfast Club filmaren jatorrizko trailer edo iragarkia ikusgai. Youtube.com (Ingelesez)
The Breakfast Club filmaren IMDBko fitxa irakurgai (Ingelesez)

Datuak: Q499152
Multimedia: The Breakfast Club / Q499152

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.