Ruwiki

Proiektua Vladimir Medeiko errusiar wikilariak sortu zuen[1]. Ruwikiren pertsona juridikoa 2023ko apirilaren 19an erregistratu zen[8]. 2023ko maiatzaren 24an, Medeikok proiektu berriaren sorrera iragarri zuen Errusiako Interneteko Foroan[9]. Horren ostean, betiko blokeatu zuten errusierazko Wikipedian eta Wikimedia RU Fundazioa utzi zuen[10].

Ruwiki izena asko erabiltzen da errusierazko Wikipediako eta Wikimedia Fundazioko beste proiektu batzuetan errusierazko Wikipedia berari erreferentzia egiteko[1][11].

Ruwiki proiektuaren beta bertsioa 2023ko ekainaren 24an jarri zen abian[12]. 2023ko abuztuaren 21ean, izena emateko aukera ireki zen[13][12]. 2024ko urtarrilaren 15ean modu ofizialean abiarazi zen proiektua[2][3][4].

2024. urtearen hasieran, Ruwikik 1,94 milioi artikulu zituen errusieraz eta guztira 1,1 milioi artikulu Errusiako beste hizkuntzatan[14][15][6].

Proiektuaren finantzaketari buruzko informazio fidagarririk ez dago[12][11].

Ruwiki sortzean, Errusiako agintariek debekatu zituzten gaiei buruzko artikuluak, hala nola Butxako sarraskia eta Putin khuilo! esamoldea, errusierazko Wikipediatik hartutako artikuluetatik kendu ziren. Ukrainako inbasioari buruzko artikuluak ez du inbasio hitza erabiltzen, operazio militar baizik[1]. Ukrainako hirien errusiar okupazioa eta Krimeako penintsularen egoera polemikoaren aipamenak kentzen dituzte, baita Errusian «atzerriko agente» gisa aitortutako iturrietako erreferentziak ere. Horrez gain, George Orwellen 1984 eleberriari buruzko artikulua ere zentsuratu zuten Errusia putinistan gertatzen ari zenarekin alderatzeagatik[16]. Ruwiki berari eskainitako artikuluan entziklopediaren kritika kendu zuten[16].

• Errusierazko Wikipedia