Prest!
"Prest!" Deustuko Berbaizu Euskara Elkarteak hilabetero Deusturako argitaratzen duen doako aldizkaria da, euskaraz idatzia. Bere eduki nagusienak auzoko eguneroko gertaerak eta aparteko ekitaldiak izan ohi dira.
| Prest!: Deustualdeko aldizkaria | |
|---|---|
 | |
| Mota | toki informazioa |
| Fitxa teknikoa | |
| Hizkuntza | euskara |
| Formatua | paperezkoa |
| Argitaletxea | BLB Komunikazioa Koop. Elk. |
| Banaketa | |
| Ekoizpen osoa | 233 (2022ko martxoa) |
| Banatze-eremua | Deustu |
| Maiztasuna | hilabetero |
| Salneurria | doan[1] |
| Historia | |
| Ideologia | euskaltzalea |
| Zuzendaria | Nerea Cubillo Urkizu |
| Identifikadoreak | |
| ISSN | 1577-9017 |
| https://uriola.eus/prentsa/prest/ | |
Prest! Deustualdeko aldizkariak Bilboko lehenengo barrutiko irakurleak biltzen ditu. Bilboko 1. barrutia auzo txikiagoetan banatzen da: Arangoiti, Deustu, Elorrieta, Erribera, Ibarrekolanda eta San Ignacio. Euskara hutsean idatzitako hilabetekaria da. Aldizkariaren helburuak Deustualdeko euskaldun komunitatea trinkotzea, euskarazko irakurketa sustatzea eta tokiko informazioa ematea dira.
Historia
Prest! aldizkaria Berbaizu Deustuko Euskara Elkartearen eskutik sortu zen. Berbaizu 2000. urtean jaio zen eta aldizkariaren lehen alea urte bat geroago argitaratu zen. Aurretik, hiruhilabetekari euskaldun bat egon zen Deustualdean 1996tik 1998ra arte iraun zuena eta Hitzartu izenarekin ezagutzen zena.[2] 2001eko martxoan, Deustun ospatzen diren San José jaien bezperan publikatu zen lehen zenbakia. 2021ean 20 urte bete zituen hilabetekariak.
Edukiak
Hilabetero argitaratutako aldizkariak 30 orri inguru ditu. Azala elkarrizketatuaren argazki handi batek betetzen du beti. Erreportajeak, artikuluak, iritziak eta elkarrizketak dira, besteak beste, lantzen diren kazetaritza-generoak. Informazio orokorra eskaintzen da, tokiko ikuspegi batetik. Normalean, Deustualdeko barrutian izandako gertakariak, ekitaldiak edota kontakizunak irakurri ahal dira. Deustualdean gertatutako istoriotxoak eta auzoko irudi historikoak ere agertu daitezke.
Hilabetero elkarrizketa bat publikatzen da eta normalean Deustualdeko pertsona bat elkarrizketatzen dute. 2022ko martxoan, adibidez, Iñigo Lekue Athleticeko jokalari deustuarra izan zen elkarrizketatua. Azken orrietan komiki bat txertatzen dute askotan.
Orrialde guztiak euskara hutsean daude idatzita.
Ildo editoriala
Euskararen normalizazioaren alde lan egiten du hedabideak. Hortaz, aldizkari euskaltzalea da. Hedabidea herritik eta herriarrentzat ekoizten da. Esaterako, aldizkariaren orrietan herri-mugimendu ezberdinen berri ematen dute (Talde Feminista, auzolana, Gaztetxea…). Hortaz, ezker ikuspegiz eta behetik idatzita dagoela esan dezakegu.
Egitura
Aldizkariaren zuzendaria Nerea Cubillo Urkizu da. Erredakzioa lanetan 20 idazle inguru aritzen dira. Hedabideak kolaboratzaileak ditu ere, haien artean: Deustuko Eskola, Deustuko Ikastola, Ibarrekolanda BHI, Intxixu Ikastola, Deustuko Gazte Lokala eta abar. Hilabetekarian agertzen diren argazkiak Ecuador Etxeak egiten ditu.
Enpresa
Prest! aldizkaria Berbaizu Euskara Elkartea-k sortu zuen eta BLB Komunikazioa Kooperatiba Elkarteak argitaratzen du. Uriola Bilboko hedabide digitala ere argitaratzen du BLBk. Antza Komunikazio Grafikoak inprimategian inprimatzen da Prest!. Hedabidea ren sustatzaile bakarra . Aldizkariaren babesleak Deustualdeko elkarteak dira nagusiki; hala nola: Bihotz Alai Dantza Taldea, Deustu Arraun Taldea, Elorri Bertso Eskola, Deustuko Jai Batzordea, S.D Deusto eta abar.
Hedabidearen laguntzaileak dira Bizkaiko Foru Aldundia eta Bilboko Udala. Prest!-ek erakunde hauen dirulaguntzak jasotzen ditu.
Prest! Tokikom elkartean [3] dago sartuta. Euskarazko tokiko hedabideak sustatzea du helburu sare honek. Egun, 76 hedabidek osatzen dute tokiko komunikabideen bateragunea.
Negozio eredua eta hedapena
Aldizkari fisikoa doakoa da eta edizio digitala dohainik irakur daiteke ere Uriola Bilboko hedabide digitalaren plataforman[4]. Hala ere, hedabideak babesteko eta laguntzeko aukera ematen du harpidetzaren bidez[5]. Beraz, urtean 25€ ordainduz, aldizkaria etxean jasotzen du harpidedunak hilabetero.
Bilboko 1. Barrutiko 2.700 etxeetara iristen da aldizkaria hilabetero. Horrez gain, aleak Deustualdeko ikastoletan, liburutegietan, dendetan, euskaltegietan eta tabernetan ere aurkitu ahal dira. Hedabideak bere 233. zenbakia atera zuen 2022ko martxoan.
Erreferentziak
- http://prestaldizkaria.wordpress.com/harpidedun-egin/
- «Bilbo eta herri aldizkari euskaldunak: "Berton" eta "Prest!"» www.euskonews.eus (Noiz kontsultatua: 2022-04-29).
- «Zer da TOKIKOM? - TOKIKOM» tokikom.eus 2015-01-19 (Noiz kontsultatua: 2022-04-29).
- uriola.eus (Noiz kontsultatua: 2022-04-29).
- «Harpidedun egin» PREST! aldizkaria 2012-01-05 (Noiz kontsultatua: 2022-04-29).
