Potentzial grabitatorio

Fisikako newtondar mekanikan, potentzial grabitatorioa magnitude fisiko eskalar bat da, gorputz batek masa-unitateko duen energia potentzial grabitatorioa adierazten duena. Beste era batean esanda, m₂ masadun gorputz bat m₁ masadun gorputz batek sortutako eremu grabitatorioan barrena infinitutik B puntura higiarazteko indar grabitatorioak masa-unitateko egin behar duen lana adierazten du potentzial grabitatorioak. Matematikoki honela adierazi dezakegu:[1]

${\displaystyle V={\frac {E_{p}}{m_{2}}}}$

Zeinetan V potentzial grabitatorioa den, E_p energia potentzial grabitatorioa eta m₂ beste gorputz batek sortutako eremu grabitatorioan higitzen den masa. Ekuazio horretan energia potentzial grabitatorioaren adierazpen matematikoa ordezkatuz gero, potentzial grabitatorioaren ondorengo adierazpena lor dezakegu, aurrekoa baino praktikoagoa:

${\displaystyle V=-G{\frac {m_{1}}{r}}}$

Zeinetan G grabitazio unibertsalaren legeko konstantea den, m₁ eremu grabitatorioa sortzen duen masa eta r eremu grabitatorioa sortzen duen masaren eta masa mugikorraren (m₂) artean dagoen distantzia edo orbita-erradioa.