Pirogeno
Pirogeno sukarra eragiten duen eragileari deritzo. Pirogenoek gorputzeko tenperatura erregulatzen duen egituraren gain (hipotalamoaren gain) jarduten dute, tenperatura hori igoaraziz.
Sukarra, kasu gehienetan, infekzio baten ondorioz agertzen da [1]. Beraz, ohiko pirogenoak infekzioarekin lotutako eragileak dira, bi hauek izanik garrantzitsuenak:
- bakterioen endotoxinak: bakterio Gram negatiboek haien zelula-horman dituztenak; lipopolisakaridoak, esaterako. Sukarra ez ezik, beherakoak, hantura, tronbozitopenia eta leukopenia eragin ditzakete endotoxinek.
- zitokinak: batez ere, interleukinaren bat (IL-1), makrofagoek sortua. Goian aipatutako endotoxinek eta mikrobio patogenoek dituzten beste antigeno batzuek makrofagoak aktibatzen dituzte, interleukina-1 ekoizten dutenak. Interleukina honek gorputzeko termostatoaren gainean jarduten du, hipotalamoaren gainean, bere ohiko funtzionamendua desorekatuz eta sukarraren agerpena erraztuz. Efektu hori ez du modu zuzenean sortzen interleukina-1ek, prostaglandinen bidez baizik (interleukina horrek prostaglandinen sintesia eragiten du, prostaglandina horiek izanik gorputzeko tenperatura igotzen dutenak) [2]. Botika batzuen efektu antipiretikoa (aspirina, parazetamol...) prostaglandinen sintesia inhibitzean datza.
Erreferentziak
- Madigan M.T., Martinko J.M., Parker J. Brock Mikroorganismoen biologia (2007) E.H.U-ak euskaratua: 799 orr. ISBN: 978-84-9860-026-1
- ¿Qué son los pirógenos? Fujifilm Wako Chemicals USA Corporation (2020ko otsaila)
Kanpo estekak
| Autoritate kontrola |
|
|---|
Datuak: Q1492069
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.