Pascual Aldabe Rodríguez

Pascual Rodríguez Aldabe[1] (Lesaka, 1924ko ekainaren 22a - Donostia, 2013ko martxoaren 27a) nafar musikagilea izan zen, 51eko belaunaldia delakoaren partaide.

Pascual Aldabe Rodríguez
Bizitza
Jaiotza	Lesaka, 1924ko ekainaren 22a
Herrialdea	Nafarroa Garaia, Euskal Herria
Heriotza	Donostia, 2013ko martxoaren 27a (88 urte)
Familia
Anai-arrebak	ikusi Alfonso Rodríguez Aldabe
Hezkuntza
Hizkuntzak	gaztelania
Irakaslea(k)	Francisco Escudero Nadia Boulanger Agnelle Bundervoët (en) Eugène Bigot (en)
Jarduerak
Jarduerak	musikagilea
Kidetza	San Fernandoko Arte Ederren Errege Akademia

Victor Albistur organo-jotzailearekin hasi zen musikan, bere jaioterrian, eta pianoaren lehen nozioak Salvador Radarekin ikasi zituen. Azken honek prestatu zuen ikasle libre gisa Bilboko Musika Kontserbatorioan ikasteko . 1947an Lesakako parrokiako organista izendatu zuten eta herri honetan Santa Maria Abesbatza sortu zuen. 1949an Bartzelonako Goi Mailako Musika Kontserbatorioan jarraitu zuen ikasten eta Donostiako Udal Kontserbatorioan amaitu zituen ikasketa ofizialak: pianoa José María Iraolarekin, harmonia eta konposizioa Francisco Escuderorekin.

1954 eta 1973 artean Parisen bizi izan zen eta musika arloan bere ezagutzak hobetu zituen: konposizioa Nadia Boulangerrekin, pianoa Agnelle Bundervoët eta Andrée Bonnevillerekin, orkestrazioa Jean Françaisekin eta orkestra zuzendaritza Eugène Bigotekin. Frantziako Gobernuaren beka jaso ondoren, piano errezitaldiak eskaini zituen Londresen, Parisen, Madrilen eta Donostian. 1958 eta 1966 artean, bere jarduera artistikoa Musikaren Historiako irakaskuntzarekin uztartu zuen Frantziako hainbat ikastetxetan. 1967 eta 1973 artean Frantziako Irrati eta Telebistaren Orkestrarekin musika gaietan kolaboratu zuen. Nafarroara itzultzean, Iruñeko Pablo Sarasate Kontserbatorioko zuzendari kargua hartu zuen 1973 eta 1983 bitartean. Ganbera Orkestra eta Zentroko abesbatza sortu zituen, eta Eslava, Remacha, Berlioz, Charpentier edo Stravinski bezalako egileen obra sinfoniko-koralak ezagutzera eman zituen. Nafarroako herri nagusietan eskainitako kontzertu horietako batzuk estreinaldi zorrotzak izan ziren Espainian. 1976tik 1982ra organo ikasketak egin zituen Luis Tabernarekin. Autore batzuek, Aurelio Sagaseta nafarrak kasu, uste dute bere obra Ravelen obratik hurbil dagoela eta abangoardiako lerro moderatuan mantentzen dela, XX. mendeko estetikarik erradikalenetan barneratu gabe.

1974tik aurrera San Fernando Arte Ederretako Errege Akademiaren kidea izan zen.

Alfonso Rodriguez Aldaberen anaia zen.