Nehemiasen liburua

Nehemias Bibliako pertsonaia bat da, eta, exegeta batzuen arabera, haren izena duen liburuaren egilea da. Judaren leinukoa izango zen, eta Jerusalemen bizi izango zen. Judea persiarren mende zegoen garaian bizi izan zen, eta Artaxerxes erregearen baimena lortu zuen hebrearren herrialdea gobernatzeko, kultu-arazoak konpontzearren. Esdras-en obrak osatu zituen.

Hasieran, Esdrasen liburua eta Nehemiasen liburua obra bakar bat ziren, eta gerora banatuak izan ziren. Bi liburuek, gaiari eta estiloari dagokionez, talde bat osatzen dute Kronikak liburuekin.

Tradizioaren arabera, Nehemiasek berak idatzia da liburua, baina hori ez dago frogatzerik. Zantzu guztien arabera, Esdrasen liburua idatzi zuen pertsona berak idatzia da Nehemiasen liburua, nahiz eta, gerora hainbat ordena-aldaketa, eransketa eta mozte izan direnez, zaila izan oso hori frogatzea. Liburuaren zati batzuk lehen pertsonan idatzita daude, Nehemiasek berak idatzi izan balitu bezala (Neh. 1-7, 12:27-47 eta 13). Adibidez:

1 Hau da Hakaliasen seme Nehemiasen historia. Artaxerxesen erregealdiko hogeigarren urtean, Kisleu hilean, Susa hiri gotorrean nengoela, 2 Hanani, neure anaietako bat, etorri zitzaidan Judatik, gizon-talde batekin. Erbestealditik libre gelditu ziren juduen eta Jerusalem hiriko berriak eskatu nizkien. 3 Eta erantzun zidaten: «Erbestealditik libre gelditu direnak zoritxar handian eta egoera lotsagarrian daude Juda eskualdean; Jerusalemgo harresiak, berriz, zuloz beteak daude, eta hiriko ateak suak kiskaliak».

Hala ere, badira Nehemias hirugarren pertsonan aipatzen duten kapituluak ere (Neh. 8, 9 eta 10). Adibidez:

9 Herri osoak negarrari eman zion legearen hitzak entzutean. Orduan, Nehemias gobernariak, Esdras lege-maisuak eta irakasten ari ziren lebitarrek esan zioten herriari: «Gaurko eguna Jaunari, gure Jainkoari, sagaratua dugu. Beraz, ez egon triste, ez egin negarrik».

Nehemias izan bazen benetako egilea, orduan liburua K.a. 431 eta K.a. 430 bitartean idatziko zen, Nehemias benetako pertsonaiak Jerusalemera bigarren aldiz itzuli zenean Persian izan eta gero.

Nehemiasen liburuak lau atal ditu:

• Jerusalemgo harresien berreraikuntzaren historia, eta Nehemiasek Babiloniatik itzulitakoak aurkitu izana (1-7 kapituluak).

Nehemiasek Jerusalemgo berriak jakin (1,1-11)

Nehemiasek Jerusalemera itzultzeko baimena lortu (2,1-10)

Nehemias hiriko harresiak ikusten (2,11-20)

Jerusalemgo harresiak eraikitzen (3,1-32)

Etsaiek lanak geldiarazi nahi (3,33-38)

Nehemiasek lanean ari direnak armatu (4,1-17)

Gizarteko zuzengabekerien aurrean Nehemiasen jokaera (5,1-19)

Etsaiak oztopoak jartzen berriro (6,1-19)

Hiria babesteko neurriak (7,1-3)

Herrira itzulitakoen zerrenda (7,4-71)

• Garai hartako juduen praktika erlijiosoen deskribapena (8-10).

Esdras jendaurrean legea irakurtzen (7,72-8,12)

Etxola Jaia (8,13-18)

Batzarrak bekatuen barkamena eskatu (9,1-4)

Otoitz nagusia (9,5-37)

Herriak legea beteko duela hitzeman (10,1-40)

• Jerusalemen hazkuntza demografikoaren berri, gizon helduen zerrenda, familiaburuen eta apaizen erregistroa (11 - 12:1-26).

Jerusalemgo bizilagunen zerrenda (11,1-24)

Beste herrietako juduak (11,25-36)

Apaiz eta lebitarren zerrenda (12,1-26)

• Jerusalemgo harresiaren sagarapena, tenpluaren konponketa eta Nehemiasek egindako erreformak

(12:27 - 13).

Harresiaren sagarapen-jaia (12,27-47)

Nehemiasek usadioak zaharberritu (13,1-31)

Nehemiasen liburuaren balio historikoa ukaezina da. Idazlea historia-idazle iaioa eta zuzena da bere herriaren historiari dagokionez, eta berak erabili zituen iturriak baliagarriak dira gaur egun ere.