Nazioarteko Garapen Elkartea
Nazioarteko Garapen Elkartea (NGE) nazioarteko finantza erakunde bat da, garabidean diren munduko herrialde pobreenei maileguak eta dirulaguntzak eskaintzen dizkiena baldintza errazetan.1950eko hamarkadan, Munduko Bankuko kide ziren herrialdeak ohartu ziren merkatuko interes tasako maileguak ez zirela aski herrialde pobreenak finantzatzeko. 1960an NGE sortu zen, behar horri irtenbide bat eman nahirik.[1] Elkarteko kideek ekarpenak egiten dituzte, era horretan Munduko Bankuak (MB) urtean 6.000 eta 7.000 milioi dolar bitartean eman diezaien 79 herrialde pobreenei, ia interesik gabe. Interes tasaren hobariaz gain, NGEren maileguek Berreraikuntza eta Garapeneko Nazioarteko Bankuarenak baino itzulera epe luzeagoa izan ohi dute, 35 eta 40 urte bitartekoa.
Nazioarteko Garapen Elkartea | |
---|---|
![]() | |
Datuak | |
Mota | multilateral development bank (en) ![]() |
Jarduera sektorea | international governmental or non-governmental organizations (en) ![]() |
Jarduera | |
Kide kopurua | 174 (2021eko azaroa) |
Honen parte | Munduko Bankua |
Agintea | |
Zuzendari exekutiboa | Kristalina Georgieva |
Egoitza nagusi | |
Jabea | Munduko Bankuaren Taldea |
Historia | |
Sorrera | 1960 |
webgune ofiziala![]() ![]() ![]() |
NGEren eginkizuna
NGEk eginkizun garrantzitsu bat betetzen du, garapen bidean diren herrialde askok ezin baitute finantzaziorik jaso merkatu baldintza ohikoetan. Elkarte honek dirua ematen die oinarrizko zerbitzuak eraikitzeko (hezkuntza, etxebizitza, edateko ura, saneamendua), produktibitatea eta enplegua areagotzeko berrikuntzak eta inbertsioak bultzatuz.
Gaur egun, NGEk emandako maileguen erdia baino gehiago Afrikako herrialdeetara joaten da.
Elkarteak bat egiten du Munduko Bankuaren xedearekin: pobrezia murriztea eta garapenerako finantzaketa eskuragarria ematea herrialdeei, bereziki kreditu arrisku hain handia izateagatik kreditu komertzialak eskuratzea edo Munduko Bankuaren beste programa batzuk eskatzea ezinezkoa gertatzen zaien herrialdeei.[2] Ikuspegi horrekin, NGEren helburua da herrialde pobreenei laguntzea azkarrago, modu bidezkoagoan eta modu iraunkorrean hazten, pobrezia murriztu ahal izateko.[3]
Datuak
NGE munduko herrialde pobreenetako giza garapena sustatzeko proiektuetarako funts hornitzailerik handiena da.[4] Zehazki, 2000tik 2010era, 3 milioi irakasle bildu eta gaitu zituzten proiektuak finantzatu zituen, 310 milioi haur immunizatu zituen, 120.000 enpresa txiki eta ertaini maileguak emateko 792 milioi dolar finantzatu zituen, 118.000 kilometro bide zolatu eraiki edo zaharberritu zituen, 1.600 zubi eraiki edo berritu zituen, 113 milioi pertsonarentzako ur hodietarako sarbidea zabaldu zuen, eta 5,8 milioi pertsonen saneamendu instalazioak hobetu zituen. NGEk guztira 238 mila milioi dolar jaulki ditu mailegu eta dohaintzetan 1960az geroztik.[5]
Partaidetza
![](../I/International_Development_Association.png.webp)
NGEk 173 herrialde kide ditu, hiru urtean behin beren kapitalaz hornitzeko ekarpenak ordaintzen dituztenak. 75 herrialdetan ematen ditu maileguak, eta horien erdiak baino gehiago (39) Afrikan daude.[1][6] NGEko kide izatea soilik Munduko Bankuko partaide diren herrialdeentzat dago eskuragarri, bereziki Berreraikuntza eta Garapeneko Nazioarteko Bankuko kideentzat.[7] Bere bizitzan zehar, 44 herrialde mailegu hartzaile graduatu dira elkartetik, hau da, irten dira finantzaketa jasotzeko baldintzetatik, nahiz eta herrialde horietatik 9 mailegu hartzaile izan diren graduatu estatusari eutsi ahal izan ez diotenean.[8]
NGEren laguntza jasotzeko hautagai izateko, ebaluazio bat egiten zaie herrialdeei, pobreziaz eta mailegu komertzialetarako edo Berreraikuntza eta Garapeneko Nazioarteko Bankuaren maileguak jaso ahal izateko kaudimenaz.[9] Elkarteak herrialde bakoitzean ebaluatzen ditu per capita diru sarrerak, kapital pribatuko merkatuetarako sartzeko ezintasuna, eta hazkundearen edo pobreziaren aurkako borrokaren aldeko erreforma ekonomiko edo sozialak ezartzeko politiketan egindako lana.[3][10]2019. urtera arte, NGEren maileguak eskuratu ahal izateko, herrialde bateko per capita diru sarrera nazional gordina ez zen izan behar 1.145 dolar (2019ko dolarraren balioaz) baino handiagoa.[6]
NGEren maileguetatik graduatu ziren herrialdeak
Herrialde hauek graduatu ziren NGEren maileguetarako baldintzetatik.[8]
Albania (2008)
Azerbaijan (2011)
Botswana (1974)
Txile (1961)
Txinako Herri Errepublika (1999)
Kolonbia (1962)
Costa Rica (1962)
Dominikar Errepublika (1973)
Ekuador (1974)
Egipto (1999) - 1981ean graduatu zen, 1991an itzuli zen, eta berriro graduatu zen 1999an
El Salvador (1977)
Ekuatore Ginea (1999)
India (1994)
Indonesia (2008) - 1980an graduatu zen, 1998an itzuli zen, eta berriro graduatu zen 2008an
Jordania (1978)
Maurizio (1975)
Montenegro (2008)
Maroko (1975)
Ipar Mazedonia (2002)
Paraguai (1977)
Filipinak (1993) - 1979an graduatu zen, 1991an itzuli zen, eta berriro graduatu zen 1993an
Saint Kitts eta Nevis (1994)
Serbia (2007)
Hego Korea (1973)
Eswatini (1975)
Thailandia (1979)
Tunisia (1977)
Turkia (1973)
NGEren maileguak erabili zituzten herrialdeak
Herrialde hauek NGEren maileguak eskuratzeko baldintzetara itzuli ziren, eta oraindik ez dira berriro graduatu edo, aldiz, hein batean hautagai bihurtu dira (herrialde misto ere deitzen zaie).[8]
Kamerun (1994)
Kongo (1994)
Boli Kosta (1992)
Honduras (1991)
Nikaragua (1991)
Nigeria (1989)
Papua Ginea Berria (2003, zati batez)
Siria (2017)
Zimbabwe (1992)
Maileguak
NGEk maileguak ematen ditu azpiegiturak garatzeko eta hezkuntza, osasun laguntza, ur garbia, saneamendu instalazioak eta ingurumen erantzukizuna hobetzeko.[1][11] Munduko Bankuaren mailegu bigunen leihatila da; Berreraikuntza eta Garapeneko Nazioarteko Bankua, berriz, mailegu gogorren leihoa.[12][13] Elkarteak dirulaguntzak eta maileguak eskaintzen ditu, 25 eta 40 urte bitarteko mugaegunekin, 5 eta 10 urte bitarteko gabezia aldiekin eta % 2,8ko edo % 1,25eko interes tasekin, mailegu hartzailea herrialde mistoa den eta zein gradutan aukeragarria den kontuan hartuta. NGErako mailegu hartzaile erregularrek interesik gabeko maileguak aprobetxa ditzakete, baldintza jakin batzuetan.[14] Finantza baliabideak herrialde hautagarrietan esleitzen dira, hazkundearen eta pobreziaren murrizketaren aldeko politika nazionalak ezartzeko arrakastaren arabera. NGEk Munduko Bankuaren Ebaluazio Instituzionalaren eta Politika Nazionalen (CPIA) garapenaren adierazlea erabiltzen du herrialde bakoitza baliabideak esleitzeko indize batean kokatzeko.[15] Ondoren, lehentasuna ematen die etorkizun handieneko herrialdeen maileguei, aldeko politikei eta laguntzaren eraginkortasunari dagokienez.[10][16][17] NGEk krisiari erantzuteko leihoa hartu zuen 2007an, krisiei aurre egiteko larrialdiko finantzazioa azkar eman ahal izateko. Elkarteak berehalako erantzuna emateko mekanismo bat onartu zuen 2011n, NGEko mailegu hartzaileei maileguen zati ordaindu gabeak berehala eskuratu ahal izateko, mekanismoaren irizpideak betetzen dituen krisia sortuz gero.[18]
Afrika
Afrikako herrialdeek pobrezia eta azpigarapen egoera larrienetako bati aurre egin behar diotelako eta herrialde horietako 39 NGEko estatu kide pobreenak direlako, elkarteak NGEren baliabideen erdia inguru esleitzen izan du herrialde horietako proiektuak finantzatzeko. Eskualdea hobetzeko egindako ahaleginaren ondorioz, NGEk 66 milioi afrikar herritarrengana iritsarazi du elektrizitate zerbitzua 1997tik, 240,000 kilometro bide zolatu eraikitzen edo berritzen lagundu du, eta Afrikako 15 milioi haur eskolan sartzen lagundu du 2002tik.[19] NGEk 2012ko maiatzean onartu zuen 50 milioi dolarreko kreditua ematea Emakume Ekintzaileak Garatzeko Proiektuari, Etiopian emakumeek langile edo lider kualifikatu gisa negozioetan parte hartzen laguntzeko egindako ahaleginaren zati gisa.[20] NGEk Afrikann egindako ahaleginaren emaitza positiboak historian zehar motelak izan diren arren, Afrikako herrialdeei emandako diru kopuru handiak emaitza positiboak ukan zituen, bereziki azpiegiturak eta nekazaritza garatzeko ahaleginetan.[21]
Asia
NGEk Asian egindako ahaleginak bereziki emaitza onekoak izan dira. Asiako herrialde asko graduatu dira elkartearen mailegu programatik, Filipinak, Txina, Hego Korea eta Thailandia barne.[22] Elkartearen ekarpenak jasotzen dituzten herrialdeetatik, 20 inguru Asian daude. Asiako hegoaldean elkarteak egin izan duen ahalegina oinarritu da, batez ere, hezkuntza, osasuna, garraioa, nekazaritza eta energia arloko proiektuetan.[6][22] Asiako herrialdeetako populazioen hazkunde azkarraren ondorioz, pobrezia poltsa batzuk sortu dira. Ondorio hori arintzeko, NGEk ekintza ekonomikorako plan bat onartu zuen, hezkuntza eta arreta medikoa hobetzeko erakundeak ezarri zituena, Asiako nazioetan pobrezia murrizteari begira, tokiko kulturarekin bateragarriak diren moduetan.[22]
Erreferentziak
- «What Is IDA? | About | International Development Association - World Bank» ida.worldbank.org (Noiz kontsultatua: 2022-12-15).
- «World Bank (IBRD & IDA) | Bank Information Center: Monitoring the projects and policies of the World Bank, IMF and other international financial institutions» web.archive.org 2011-11-05 (Noiz kontsultatua: 2022-12-15).
- (Ingelesez) «Double Standards on IDA and Debt: The Case for Reclassifying Nigeria» Center for Global Development | Ideas to Action (Noiz kontsultatua: 2022-12-15).
- (Ingelesez) «Building a Better IDA» Center for Global Development | Ideas to Action (Noiz kontsultatua: 2022-12-15).
- «Health | International Development Association - World Bank | International Development Association - World Bank» ida.worldbank.org (Noiz kontsultatua: 2022-12-15).
- «IDA Borrowing Countries | What is IDA? | International Development Association - World Bank» ida.worldbank.org (Noiz kontsultatua: 2022-12-15).
- (Ingelesez) «Member Countries» World Bank (Noiz kontsultatua: 2022-12-15).
- «IDA Graduates | Borrowing Countries | What is IDA? | International Development Association - World Bank» ida.worldbank.org (Noiz kontsultatua: 2022-12-15).
- (Ingelesez) «IDA : eligibility and allocations criteria» World Bank (Noiz kontsultatua: 2022-12-15).
- (Ingelesez) Adler, Nicole; Yazhemsky, Ekaterina; Tarverdyan, Ruzanana. (2010-06-01). «A framework to measure the relative socio-economic performance of developing countries» Socio-Economic Planning Sciences 44 (2): 73–88. doi: . ISSN 0038-0121. (Noiz kontsultatua: 2022-12-15).
- (Ingelesez) Mallick, Sushanta; Moore, Tomoe. (2005-12-01). «Impact of World Bank lending in an adjustment-led growth model» Economic Systems 29 (4): 366–383. doi: . ISSN 0939-3625. (Noiz kontsultatua: 2022-12-15).
- (Ingelesez) Cline, William R.; Sargen, Nicholas P.. (1975-06-01). «Performance criteria and multilateral aid allocation» World Development 3 (6): 383–391. doi: . ISSN 0305-750X. (Noiz kontsultatua: 2022-12-15).
- (Ingelesez) Van de Laar, Aart J. M.. (1976-10-01). «The World Bank and the world's poor» World Development 4 (10): 837–851. doi: . ISSN 0305-750X. (Noiz kontsultatua: 2022-12-15).
- «IDA Lending Terms | Financing | International Development Association - World Bank» ida.worldbank.org (Noiz kontsultatua: 2022-12-15).
- (Ingelesez) «Country Policy and Institutional Assessment - Data Catalog» datacatalog.worldbank.org (Noiz kontsultatua: 2022-12-15).
- (Ingelesez) Epstein, Gil S.; Gang, Ira N.. (2009-05-01). «Good governance and good aid allocation» Journal of Development Economics 89 (1): 12–18. doi: . ISSN 0304-3878. (Noiz kontsultatua: 2022-12-15).
- «Resource Management | Financing | International Development Association - World Bank» ida.worldbank.org (Noiz kontsultatua: 2022-12-15).
- «Crisis Financing | Financing | International Development Association - World Bank» ida.worldbank.org (Noiz kontsultatua: 2022-12-15).
- (Ingelesez) «International Trade Can Help Africa Grow» blogs.worldbank.org (Noiz kontsultatua: 2022-12-15).
- (Ingelesez) «World Bank provides funding to unleash the economic potential of Ethiopian Women Entrepreneurs» World Bank (Noiz kontsultatua: 2022-12-15).
- Burki, Shahid Javid. (1982). «International Development Association in Retrospect» Finance and Development 19 (4): 23..
- (Ingelesez) «IDA in Asia» World Bank (Noiz kontsultatua: 2022-12-15).