Naukograd

Naukograd (errusieraz: наукогра́д, translit.: naukograd), baita ere Teknopoli edo Zientzia-hiri, Sobietar Batasunean eta, gaur egun, Errusian ikerketa eta garapen zientifikoen kontzentrazio handia duten hiriak aipatzeko termino formal bat da. Hiri horietako asko Sobietar Batasunaren garaian eraiki ziren, berariazko asmo horrekin. Haietako batzuk isilpekoak ziren eta garai hartan itxitako hirien sistema handi baten parte ziren. Egun, definizioa aldatu da.[1]

Obninsk 2000. urtean naukogradu izendatu zuten.

Banaketa

Naukograduak hogeita hamar inguru Moskuko oblastan daude, eta gainerakoak, batez ere, Volga, Ural eta Siberiako eskualdeetan. Gutxi dira orain "itxiak": hamar hiri nuklear baino ez daude itxita, eta oraindik Errusiako lan militar nuklearra egiten da. Batzuk oraindik konexio militarrak dituzte, Fryazino adibidez, non gailu elektronikoak eta irrati aurreratuak garatzen diren, baina gehienak orain mendebaldeko laguntza funtsen laguntzarekin lan zibilean zentratzen dira.

Egungo naukograduak

Gaur egun, Errusiar Federazioan, termino hau, orokorrean, ekoizpen eta ikerketa zientifikoko kontzentrazioak dituzten hirurogeita hamar hiri ingururi erreferentzia egiteko erabiltzen da, eta, bereziki, bere potentzial zientifikoagatik aintzatetsiak izan diren eta pribilegio bereziak dituzten hiri gutxi batzuei erreferentzia egiteko.

Ofizialki naukogradu bihurtu zen lehen hiria Obninsk izan zen, 2000. urtean, material nuklearra eta ikerketa mediko eta meteorologikorako instalazioak zituen herria. Berehala beste hiru hiri gehitu ziren zerrendara: Dubna, ikerketa nuklearrerako nazioarteko zentroa; Koroliov, ikerketa espazialeko instalazio asko dauden lekua; eta Koltsovo, Akademgorodoketik gertu,[2] hasiera batean gerra biologikoaren ikerketarako gunea, gaur egun ikerketa mediko eta farmazeutikorako zentroa dena.

Naukogradu batzuk Errusiako Zientzien Akademiak operatzen ditu, Pushchino, zientzia biologikoen zentroa barne, eta Chernogolovka, fisika eta kimikako zentroa. Zelenograd (Moskuko hiri eta administrazio-barrutia) elektronikaren arloko ikerketa, hezkuntza eta ekoizpenerako zentro errusiarra da.

Erreferentziak
  1. https://misteriosdeleste.blogspot.com/2013/10/naukogrado.html
  2. https://es.rbth.com/articles/2012/12/24/akademgorodok_la_capital_cientifica_de_siberia_23423

Kanpo estekak
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.