Montreal (eskualde administratiboa)

Montreal (frantsesez région administrative de Montréal) Quebeceko eskualde administratiboa da. 06 kodea erabiltzen da eskualde hau identifikatzeko. Nazio honetako eskualderik txikiena da baina biztanle kopuruan lehena da eta bertan dago Montreal hiri nagusia. Bere lurraldeak Montrealgo aglomerazioarekin (Agglomération de Montréal) bat egiten du[1] baina ez, ordea, zabalagoa den Montrealgo metropoli komunitatearekin (Communauté métropolitaine de Montréal, CMM); azken hau beste lau eskualdetako lurrek (Laval osoa; Montérégie, Laurentides eta Lanaudièreko zatiak) ere osatzen dute[2].

Montréal
 Kanada
Administrazioa
Estatu burujabe Kanada
Probintzia Quebec
HiriburuaMontreal
Zatiketa
Geografia
Koordenatuak45°30′00″N 73°41′00″W
Azalera499,6 km²
MugakideakMontérégie eta Laval
Demografia
Biztanleria2.074.068 (2020)
2.004.265 (2021)
Adierazpen errorea: Ustekabeko < eragileaAdierazpen errorea: Hitz ezezaguna "br" (2020)
Dentsitatea3.816,68 bizt/km²
Informazio gehigarria
www.montreal.gouv.qc.ca/
Eskualdeko udalerriak: Montreal (gorriz) eta beste 15ak (urdinez).

2002ko Quebecen egindako fusioetatik 2006ko desanexioetara udalerri bakarra ere osatzen zuen; egun 16 ditu, 2002 baino lehen 28 zeuden arren.

Geografia

Eskualde hau San Laurendi ibaiaren adarren arteko uharte batzuek osatzen dute; nagusia Montrealgo uhartea da eta horrez gain Bizard, Dorval eta beste batzuk daude. Hochelagako uhartedi osoa, ordea, ez dago bere barnean: alde batetik Jésus uhartea eta beste batzuk Lavalen daude, bestetik Perrot uhartea eta beste batzuk Montérégien. Beraz, hegoaldean San Laurendi ibaiaren adar nagusia -eta bere izena daramana- eta iparraldean Rivière des Prairies bere adarrak (Jésus uhartearekin banatzen duenak) mugatzen dute.

Lur eremu gehiena laua da eta puntu gorena hiriari izena ematen dion mont Royal (234 m) da, nahiko zentrikoa uharte nagusi zein eskualdean. "Monteregiar muinoak" (collines montérégiennes) deitzen direnetakoa da.

Mugakideak

Geografia atalean ikusi bezala, lurrez ez du auzokiderik. Ibaiez beste aldeetara dituen udalerri guztiak Montrealgo metropoli komunitatearen kide dira eta eskualde hauen barruan daude:

  • Alde batetik Laval eta Couronne Nord edo Rive-Nord de Montréal ("Montrealgo iparraldeko ibarra") osatzen duten Laurentides eta Lanaudièreko udalerri batzuk.
  • Bestetik Montérégie: Couronne Sud edo Rive-Sud de Montréal ("Montrealgo hegoaldeko ibarra") osatzen duten udalerri ugari.

Historia

1966an Quebeceko eskualde administratiboak eratu zirenean Montrealgoa askoz ere handiagoa zen. 1987an eskualde batzuk banatzeari ekin zitzaion, oreka lortu nahirik; tartean desberdintasun handiz biztanle kopururik handiena zuen Montrealgoa. Hortik bost eskualde atera ziren: Montreal (zaharrak zuen 06 kodea gorde zuena), Laval (13 kodea), Lanaudière (14 kodea), Laurentides (15 kodea) osorik eta Montérégie (16 kodea; zati batzuk Cantons-de-l'Estetik aterata).

Demografia
  • Biztanleria: 1.906.811 (2009)
  • Azalera: 499,6 km²
  • Dentsitatea: 3.816,7 bizt./km²
  • Jaiotza-tasa: ‰ 12,1 (2009)
  • Heriotza-tasa: ‰ 7,8 (2009)[3]

Hizkuntzak

2006an Montreal eskualdean frantsesa ama-hizkuntza dutenak % 50,2 besterik ez ziren; bi elementuk Quebecen osotasunean frantsesak duen nagusitasunari aurre egiten diote:

  • Aspalditik ingeles hiztunen gutxiengo handia egon den eremua izan da; batez ere eskualdearen mendebaldean ("West Island"" izenez ezagututako udalerri eta Montrealgo auzoak) ehuneko altuak ematen dira: Montréal-Ouest % 67,6, Baie-D'Urfé % 63,4, Kirkland % 62,7...Oro har eskualdean % 17,3 dira.
  • Quebeceko "alofonoek", hau da, ama-hizkuntza frantsesa edo ingelesa ez den beste bat eduki eta batez ere azken hamarkadetako etorkin komunitateek osatzen dutenek, Montrealen inguruan pilatzeko joera oso markatua dute; eskualdean % 32,6 dira. Montreal udalerrian altuagoa da (% 33,3) eta ehunekorik handiena Côte-Saint-Lucen (% 38) dago[4].

Banaketa administratiboa
Montrealgo, uharteko eta eskualdeko mendebaldea mont Royaletik.

Eskualdeak Quebecen banaketa administratiboan lehen maila betetzen du. Bigarrenean, "Eskualdeko konderriko udalerriak" (municipalités régionales de comté, MRC) edo bere baliokideak daude; Montrealen ez dago halakorik -eskualdeak berak betetzen du- eta zuzenean salto egiten da hirugarrenera, udalerrira.

Egun eskualdea osatzen duen eremuan gorabehera batzuk egon dira udalerriei dagokienez, XXI .mendeko lehen urteetako fusio eta desanexioen ondorioz. 2002 baino lehen 28 udalerri egon ziren baina nazio mailan Quebectar Alderdiaren Quebeceko gobernuak bultzatutako fusio prozesuaren barruan eta Une île, une ville ("Uharte bat, udalerri bat") lelopean denek bat egin zuten. Adostasunik gabeko fusioak izan ziren eta horren ondorioz Alderdi Liberalak gobernura sartu ostean desanexiorako erreferendumak egitea onartu zuen; kasu askotan arrakastatsuak izan ziren eta gaur egun eskualdeak 16 udalerri ditu[5]:

  • Baie-D'Urfé
  • Beaconsfield
  • Côte-Saint-Luc
  • Dollard-Des Ormeaux
  • Dorval
  • Hampstead
  • Kirkland
  • L'Île-Dorval
  • Mont-Royal
  • Montreal
  • Montréal-Est
  • Montréal-Ouest
  • Pointe-Claire
  • Sainte-Anne-de-Bellevue
  • Senneville
  • Westmount

Erreferentziak
  1. Aglomerazioaz Montreal hiriaren webgunean.
  2. Montrealgo metropoli komunitatearen webgunea.
  3. Iturria: Quebeceko estatistika institutua.
  4. Ama-hizkuntza Quebeceko estatistika institutuan.
  5. Mouvements de territoires Quebeceko udal eta eskualdeetako ministerioaren webgunean.

Ikus, gainera

Kanpo estekak


This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.