Mitropa Kopa

1897an Austria-Hungariako Inperioko futbol txapelketa sortu zen. Talderik gehienak Viena, Budapest eta Pragakoak ziren eta Challenge Cup izenarekin 1911 arte jokatu zen. Vienako taldeak izan ziren arrakastatsuenak, 9 garaipen lortu zituzten. Ferencvárosi TC hungariarra izan zen vienarra ez zen talde garaile bakarra.

• Garaipenak:

Taldea	Garaipenak	Urteak
Wiener AC	3	1901, 1903, 1904
First Vienna FC	2	1899, 1900
Vienna Cricket FC	2	1898, 1902
Wiener Sportclub	2	1905, 1911
Ferencvárosi TC	1	1909

Lehen Mundu Gerrak Austria-Hungariako Inperioa desegin eta hainbat herrialde berri sortu ziren. 1920. hamarkadan herrialde bakoitzak bere liga profesionala eratu zuen eta aintzinako inperioko herrialdeen arteko txapelketa antolatzea erabaki zen. Hasiera batean Austria, Hungaria, Txekoslovakia eta Jugoslaviako taldeek hartu zuten parte, baina 1929an Italiako taldeek jugoslaviarren tokia hartu zuten.

Txapelketa horretan trebatu ondoren, herrialde bakoitzeko selekzioen mailak gora egin zuen eta horrek txapelketa bera nabarmen indartu zuen. Italiak bi Munduko Futbol Txapelketa irabazi zituen (1934 eta 1938), Lehenengo finalean Txekoslovakia aritu zen eta bigarrenean, Hungaria.

Bigarren Mundu Gerrak 11 urteko etena eragin zuen. 1951n Zentropa Cup izenarekin hasi zen berriz. 1958an Donaupokal izena hartu zuen ("Danubioko Kopa") eta Jugoslaviako taldeak berriz sartu ziren txapelketan. Ordurako Europa osoko txapelketa bat antolatzeko asmoa agertu zen eta horrela sortu zen Europako Kopa. 1960an 6 herrialdetako futbol selekzioen arteko txapelketa jokatu zen eta Hungariak irabazi zuen. Hurrengo urtean berriz ere kluben arteko txapelketa izatera itzuli zen baina ordutik aurrera Mitropa Koparen garrantzia nabarmen jaitsi zen, Europako Koparen mesedetan.

1980. hamarkadaren hasieran txapelketa anekdotiko bihurtu zen eta 1983tik aurrera herrialdeko bakoitzeko bigarren mailetako txapeldunen artean jokatu zen. 1992an azken ekitaldia izan zen eta FK Borac Banja Lukak irabazi zuen: finalean mila ikusle ere ez zeuden.

• Garai hartako herrialdeak:

Herrialdea	Garaipenak	Taldeak
Hungaria	15	Vasas (6), Ferencvárosi (2), Újpest (2), MTK (2), Tatabánya (1), Honvéd (1), Hungariako selekzioa (1)
Italia	11	Bologna (3), Pisa (2), Fiorentina (1), Udinese (1), Milan (1), Ascoli (1), Bari (1), Torino (1)
Jugoslavia	8	Izar Gorria (2), Čelik (2), Vojvodina (1), Partizan (1), Iskra (1), Borac (1)
Austria	7	Austria (2), Rapid (2), Wacker (2), Eisenstadt (1)
Txekoslovakia	7	Sparta Praga (3), Slavia (1), Spartak Trnava (1), Inter (1), Baník (1)

• Gaur egungo herrialdeak:

Herrialdea	Garaipenak	Taldeak
Hungaria	15	Vasas (6), Ferencvárosi (2), Újpest (2), MTK (2), Tatabánya (1), Honvéd (1), Hungariako selekzioa (1)
Italia	11	Bologna (3), Pisa (2), Fiorentina (1), Udinese (1), Milan (1), Ascoli (1), Bari (1), Torino (1)
Austria	7	Austria (2), Rapid (2), Wacker (2), Eisenstadt (1)
Txekia	5	Sparta (3), Slavia (1), Baník (1)
Serbia	4	Izar Gorria (2), Vojvodina (1), Partizan (1)
Bosnia-Herzegovina	4	Čelik (2), Iskra (1), Borac (1)
Eslovakia	2	Spartak (1), Inter (1)