Mishna

Mishna, euskaraz «errepika», juduen ahozko legeen bilduma da, hebrearren Bibliako legeen osagarria, Gemara iruzkinarekin batera, Talmud erlijio-liburua osatzen duena.

Mishnaren zati bat.

Bibliarekin batera, juduen bizitzaren eta pentsamenduaren oinarrizko liburua da. Lege-bilketa K.a. I. mendean hasi zen, eta Judah ha-Nasi jakitunak edo tannaimak burutu zuen K. o. III. mendearen hasieran. Ondoren, Palestinan eta Babilonian Mishnari buruzko bi iruzkin egin ziren, bi Gemara hain zuzen, eta ondorioz, bi Talmud liburu daude, Mishna bera, baina Gemara desberdina dutenak.

Mishna sei sail nagusitan banatua dago: Zera'im (Haziak) edo nekazaritzari buruzkoa, Mo'ed (Jaialdia) edo ospakizunei buruzkoa, Nashim (Emakumeak) edo ezkontzari buruzkoa, Neziqin (Kalteak) edo Zuzenbide Zibilari eta Penalari buruzkoa, Qodashim (Gauza Santuak) edo erlijio-zuzenbideari buruzkoa eta Tohorot (Garbikuntza) edo garbitasun-errituei buruzkoa.

Mishna hizkuntza askotara itzuli da, eta eragin handia izan du erlijio askotan.