Kontxako Banderarako Sailkapen estropada

Lehenagoko hamarkadetan Kontxako Banderan txandak osatzeko partaideak biltzeko ere lan handiak izan ziren arren, 1960ko hamarkadaren bukaeran arraun talde asko sortu ziren. Ondorioz, 1970 eta 1971n Gipuzkoako traineruek baino ez zuten arraun egin, eta Bizkaia eta Kantabriakoak lehiatik at gelditu ziren, jadanik traineru asko zeudela argudiatuz.

Hauek protesta egin zuten, eta 1972ko ekitaldirako sailkapen estropada ezarri zen lehen aldiz, sistema berezia erabilita: Gipuzkoako txapelduna zuzenean sailkatutzat eman zen; gipuzkoako beste traineruek jokatu zuten Hondarribiako eliminatoria, eta lehenengo bostak sailkatu ziren. Sailkatutako seigarren eta zazpigarrenek beste estropada bat jokatu zuten Bizkaiko eta Kantabriako txapeldunekin, azken bi txartelak erabakitzeko (azken bi hauek lortu zuten).

1973tik aurrera, guztien arteko sailkapen estropada eratu zen. Dena dela, sailkapen estropada jokatu gabe Kontxara sailkatzeko modu bereziak erabili izan ziren hainbat urtetan: 1975ean, Bizkaiko eta Kantabriako txapeldunak zuzenean sailkatu ziren, inskribaturiko sei gipuzkoarrekin batera; eta 1979an, berriz, herrialdeko txapelketetako aurreneko bi bizkaitarrek, bi kantabriarrek eta lau gipuzkoarrek lortu zuten txartela.

1981ean, Donostiako traineruari lekua gorde zioten, 1982an ez, eta, 1983tik aurrera, donostiarren arteko sailkapen estropada bat jokatu izan da Donostiako traineru bat baino gehiago izan den denboraldietan.

Gaur egun, 24 ontzik parte hartzen dute, eta honela hautatzen dira traineru horiek: TKE Ligako klub guztiak, Euskadiko Txapelketako lau onenak, Gipuzkoako Txapelketako parte hartzen duten gipuzkoar guztiak, eta KAE Liga eta Galiziako Traineruen Ligako klub onenak (azken liga honetakoak gehienez hiru).

Datu jakingarriak 2011n, lehen hiru sailkatuen artean 38 ehuneneko aldea besterik ez zen izan, eta photo finisha erabili behar izan zen ordena finkatzeko: Astillero (19'19"28), Kaiku (19'19"48) eta Tirán (19'19"66).

Errekorra Urdaibaik du: 19'04"64 (2004).

(*) Donostiarra izateagatik automatikoki sailkatuez aparte, sailkapen estropadetan sailkatuak
(**) Donostiarra bateratuaren parte hartzeak, sailkapen estropada pasa beharrik gabe

• Ur-Kirolak: Zortzi garaipen, 1983, 1985, 1986, 1993, 1995, 1996, 2003 eta 2004ean.
• Donostia Arraun Lagunak: Zazpi garaipen, 1997, 1998, 1999, 2000, 2001, 2006 eta 2007an.
• Arraun Lagunak: Bost garaipen, 1988, 1990, 1991, 1992 eta 1994an.
• Donostia A.B.: Bi garaipen, 1984 eta 1989an.
• Donostia Arraun-Santiagotarrak: Garaipen bat, 2002an.
• Fortuna 1987an aritu zen, baina traineru donostiar bakarra zelako; beraz, ez zuen sailkapenik jokatu behar izan.

Galiziako emakumezkoen arraun taldeak Donostiako portuan, 2018an.

Hasierako ekitaldietan jardunaldi bakarra zutenez (gizonezkoen bigarrenaren aurretik jokatzen zena), bezperan egiten zen sailkapen estropada. Gaur egun gizonezkoen sailkapen estropadaren aurretik aritzen dira lehian, ostegunean. Edozein traineruk aurkez dezake bere burua, eta Katalunia eta Valentziatik ere etorri izan dira elkarteak.