Kanarietako itsaslasterra

Kanarietako itsaslasterra[1] Ozeano Atlantikoaren iparraldeko itsaslasterren sistemako lasterretako bat da. Sistema hori Karibeko itsaslasterrak, Iparraldeko itsaslaster ekuatorialak, Golkoko itsaslasterrak, Floridako itsaslasterrak, Ipar Atlantikoko itsaslasterrak, Azoreetako itsaslasterrak eta Kanarietako itsaslasterrak eratzen dute.

Ezaugarriak

Kanarietako itsaslasterra ur hotzekoa da. Hari zor zaio Kanarietako klima latitudeagatik legokiokeen bezain beroa ez izatea. Ipar Atlantikoko itsaslasterretik hegoaldera sortzen da, hego-mendebalderantz egin eta Senegalen pareraino iristen da. Inguru hartan, mendebalderantz biratzen da, eta Iparraldeko itsaslaster ekuatorialarekin batzen da.

Itsaslasterrak 500 km inguruko zabalera du, eta ipar-ekialdetik hego-mendebalderantz higitzen da. Ez da oso azkarra: 25 cm/s-ko abiadura du. Hala ere, Kanarietara iristean, uharteek eragindako hesi-efektuaren ondorioz, abiadura handitu egiten da, eta 60 cm/s-ra iristen da Kanaria uharteen artean igarotzean.

Kanarietako itsaslasterrak badu kontralaster bat, 200-300 m-ko sakoneran, Cabo Verderen eta Bojador lurmuturraren artean. Abiadura txikia du, 15 cm/s gutxi gorabehera, eta 40 km zabal da. Afrikako kostatik oso gertu igarotzen da. Kontralaster hori sakoneko ur hotzen azaleratzea da. Ur horiek oso aberatsak dira mantenugaitan, eta, ondorioz, fitoplanktonaren ekoizpena handiagoa da, eta, ondorioz, arrantza gune aberatsa da Saharako kostaldea.

Erreferentziak
  1. Euskaltzaindia. (2012-10-18). 172. araua: Itsaslasterren izenak, itsasgune batzuen izenak eta Antartikako toponimia. (Noiz kontsultatua: 2013-02-10).

Kanpo estekak
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.