Kalitatearen kudeaketa

Kalitatearen kudeaketa erakunde batean kalitate-helburuei begira erabiltzen diren antolakuntza eta tresnen multzoa da. Izan ere, kalitatea kontzeptu konplexua izanik eta erakundeko arlo eta eragile guztiak barnehartzen dituenez, beharrezkoa da kalitatea lortzeko antolakuntza bat eratu eta antolakuntza horretarako tresnak diseinatzea.

Kalitatearen kontzeptu moderno baten arabera, kalitatea prozesu baten emaitza da eta beraz, erakundearen prozesu osoan zehar hartu behar dira erabakiak kalitataren hobekuntzarako. ISO 9004 arauaren arabera, lau arlo ezberdinetan biltzen dira kalitate-kudeaketarako jarduerak [1]:

1. kalitaterako zuzendaritzak helburuak eman eta horretarako baliabideak zehaztu, erabakiak hartu eta lorpenen kontrola definitu beharko du;
2. baliabideen kudeaketan kalitatea lortzeko beharrezko diren baliabideak ezarri beharko dira (makina baten mantenimendua maizago egin behar bada, horretarako baliabidea jarri, adibidez);
3. prozesuaren kontrolean erakundeko baliabideak konbinatu eta produktuak eta zerbitzuak sortzen diren prozesuaren hobekuntzarako tresnak eta metodoak ere abiarazi beharko dira (langileen artean hobekuntzarako taldeak sortu behar ote diren, adibidez);
4. kalitate-kontrolak, berriz, kalitate-helburuak bete diren egiaztatzeko metodo eta teknikak biltzen ditu (ekoiztutako produktu guztietatik lagin bat aukeratuz, esaterako),
5. kalitaterako zuzendaritzak, azkenik eta berriz ere, helburuen lorpena ebaluatu, helburu berriak planteatu eta abiarazteko. Horrela, kalitatearen kudeaketak planifikazio estrategikoaren eskema hartzen ud bere gain.

Oro har, kalitatearen kudeaketa erakundeko kudeaketatik at kokatu behar dela gomendatzen da, kalitatearen hobekuntzarako hartutako erabakien independentzia ziurtatzeko.